Valevi 21
21
Weele lwa Nkohani
1Naasa Nndumi Iruva kavia Mose, “Rera na vakohani, wo vana va Aron, kuvavie, Nndu nalakutefuse muni kimaruma kya ipaana nndu mfu, 2lyo nave nndu wakwe wa kufii, sha maye ao ndeye, na mwanaakwe, ao mfu wakwe ao mwanamaye, 3ao mfwamaye, nalandeorwa. 4Nalakutefuse naakwa ava nsongoru wa vandu vakwe. 5Valavike nrwe iwoya nta valaute nguyo ngata-fo, nta valarashe miili yaawo-fo. 6Nkuti vave veele kwa Iruva waawo, nta valatefuse irina lya Iruva, mashika mmbo vaserisaa firaso fya Nndumi Iruva na muro, shoonga ya Iruva waawo, na kimaruma kya vayo vave veele. 7Valarwaa nka isonga, ao akee ntefusu, nta valarwaa nka akeenre ni mmi, mashika we nkohani ni mweele kwa Iruva vakwe. 8Naasa kumwiilyise, mashika mbwe mwiserisya-u shoonga ya Iruva wafo, mmbo avaa mweele kwafo yewe, mashika ni yeny Nndumi Iruva shamwiilyisa yeni shikee mweele.” 9Kwakooya mwana wa kyeny wa nkohani akutefusa kya usonga, mmbo atefusa ndeye, mmbo akorwaa na muro.
10Neeto akee nkohani nniini kwa vanavamaye, akee mwambe mafura naambo araa masara yoo meele, nnyaraa fii takwe mwaala-fo, nta iraa masara a firami-fo mashika mmwaambe mafura; 11nalaange ando nndu mfu akai-fo, nta nalakutefuse kimaruma kya ndeye ao kya maye-fo; 12nta nalooke ando yoo kweele-fo, naambo nalatefuse ando yoo kweele a Iruva wakwe, mafura yoo a yiilyiswa lyakwe mmbo akee nawe, Yeny ni Nndumi Iruva. 13Nawe mmbo ashoora mwana wa kyeny. 14Nalaore nka wa ding'u-fo ao nka arewa ni mmi-fo, ao nka ntefusu, nta nka wa shia-fo, lyo noore mwana wa kyeny efo vanduny vakwe. 15Nawe nalatefuse irika lya vandu vakwe, mashika ni yeny Nndumi Iruva shikemwilyisa.
16Naasa Nndumi Iruva karera na Mose kammbia, 17“Rera na Aron kummbie Nndu moose wa mmba yafo, efo kwawo, afikkye kyuungo kya mwiili wakwe nalasembeye-u-fo, 18mfu miso, ao mbwa irumbukye, 19ao nndu afirikye urende ao woko, 20ao akapye sombe, ao ngongo alwee iriso, ao atiri woye, ao nkape ndafu, 21nndu moose wa mmba ya Aron afirikye nalasheserisa firaso fya Nndumi Iruva wafo, na muro-fo yeto atiri ufiri nasembeye iserisya-u shoonga ya Iruva-fo. 22Mmbo alyaa shoonga ya Iruva wakwa kyuuka yoo kindony ekyo kikee kyeele nnu. 23Lyo nalaange kari-fo, nta nalasembeye yoo kitareny kyeerasya-fo, mashika elyi akee mfiri naambo nalatefuse ando akwa kweele; mashika yeny ni Nndumi Iruva yeu mwiivailyisa. 24Naasa Mose karera na Aron na vasero vakwe, na vana va Israeli woose.”
Currently Selected:
Valevi 21: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
