FIIYO 1
1
Ting'wa ya Yerusalemu
1Apaa shaasa muri yeu wa Yerusalemu weishwe vandu,
lyo ulaalu wanrewa irama!
Muri weishiwa ni ulana loose, lyo ulaalu wammbaka
nka wa ding'u.
Muri wa itumbe ukailanya ulaalu wanrawa ushingeny.
2Kio kyoose kutani kwakya mmbo akeffwa,
misoru ikansangya kisangu.
Vambuya vakwe woose kulakae-fo mwimbiirya muu alesaa-u.
Valya vankundye mmbo valendEringya vakakaa mbai nawe.
3Vandu va Yuda mmbatiri kyeetana-fo,
vakakamarwa ushingeny.
Mmbo vakee kundo kweny valakitiri kwawo.
vakaringityo ni vakiruva valaidimi yuuka-fo kya iteere.
Mmbo vakee
4Nkwiifo akiidimaa nta iindya Iruva mikonu ilya myeele-fo.
Veembi va kika mmbo valya ukiva, na vakohani vakaiya.
Myaango ya muri mmbo iiyo-indo,
na Sioni mmbo akeevavyo nnu.
5Vakiduva vakwe mmbo valeidima intira na finya imaye
Nawe Nndumi Iruva kanra nasisyo kyeendwa ni ngyulyamari takwe shiingyi.
Vana vakwe vakashingillyo vakakamarwa mifungwa kwaasha.
6Itumbe lya Yerusalemu ulaalu ni kindo kilemmiira
Vasongoru vavayo vakava sha ngare ikewaawa n'shaa.
Finya ya-vayo ikeengya deny iirisha ilasheaswa mmbeasa mafisi.
7Yerusalemu wamba nrapu kakumbwa itumbe lyavayo lya kasha,
kyeeri ulewoywa ni vakiduva mmbulewo na ventarama-fo.
Vamisa vavayo vakauseka elyi wavingwa.
8Nnduma ulya wakwe wansia,
mmbo ukee mbereto wiisukaa.
Mmbo ukeeiya ukasikya kisangu wiisukaa.
Yerusalemu ulekuraveesa nnu na ulyamari uroo.
9Utefusu lwakwe mmbo lulelollyo paa,
lyo alasare ekyo kyisheukoOyaa.
Mmbo ulewo kikasha,
ulavaa iviirya muu-fo.
vakiduva mmbo valemmbinga,
vakafuya Nndumi Iruva ulaalu.
10Vakiduva vakwe vakansoka usimba lwakwe loose.
Kalollya vaanga naakwa ni efo mmba ya Iruva kweni,
Ando Nndumi Iruva eelemyi vandu va masanga valavarye.
11Vandu vakwe mmbo vakeffwa vaoni kyeelya
Vakaalasha findo fya itumbe na shoonga, vakkye muu.
“Woi Nndumi Iruva shilola-dwa,
kunu ukiveny lwakwa,”
nkiiyo kya Yerusalemu.
12Kafuuya wo nndu ashiraa shia kammbia, “Nkyeshilola-dwa!
Nkwiifo nndu alembaviswa sha yeny-fo.
Nndumi Iruva aleshikaba nang'u kimaruma kya unyafi lwakwe.
13“Mmbo aleshirikya muro wuuka uwe,
ukashikora ukaanga deny.”
Kashivikya nsoori ukashitira shawa si
Kashira-u shisheengeraa ivavyo.
14“Kasang'irya maravi akwa ando amwi moose
Kaafingya singony yakwa, akashirovya kutani ashinirisa,
Nndumi Iruva kashirambikya vakiduva vakwa,
shilaidimi ivatanya nta kindo.
15“Nndumi Iruva mmbo aleinyala vasero vakwa vakaari valakive kindo,
Kavarikya ironda lyeevamamita
Kalamya vandu vakwa vakava sha ndunda ta misabibu elyi takamwa.
16“Nkyo kimaruma miso akwa akeepuswa misoru,
Nkwiifo aidima ishiviirya muu nta ishikaarisa-fo.”
Nkiduva mmbo aleshivinga,
vana vakwa valareeywa nta kindo.
17“Shoorrwa maako akwa shitereve ngarami,
lyo nkwiifo mwisheekya-fo.
Nndumi Iruva mmbo aleshirikya vakiduva vashe vauka taari toose.”
Neeny shava sha isasi mbee yaawo
18“Lyo Nndumi Iruva mmbwa usumanu,
ni yeny tupu shilelyamara
Wo nndu nashaaranyi-te, ulana loose,
shiloleny shaasa shikeevavyo
Vana vakwa vakoo, va kyuumi na va kyika mmbo valerawa ushingeny.
19“Shafuuya vambuya vakwa vakalema isheekya
Vakohani vakwa na vandu vasongoru vakawaiyo efo shia ta muri,
veeruyaa shoonga vakkye muu.
20“Woi Nndumi Iruva lola, mavavywa akwa-dwa,
na ngatara ya nrima wakwa!
Nrima wakwa mmbo ukeenrovye ukavavywa kyeendwa ni ulyamari lwakwa.
Vandu mmbo vakewaawa efo shia naneefo mmba ni kiwo.
21“Aranyiny kiiyo kyakwa,
nkwiifo mwishivirya muu-fo-te
Vakiduva vakwa mmbo vakyesye elyi kulesheengye urumato.
Woi Nndumi Iruva inutya kyaasa kyafo,
vakiduva vakwa vaoni ngatara sha yeny.
22“Kuvataiye nawo kyeendwa ni uravi lwawo.
Vakape nawo shaasa kuleshikapa yeny kyeendwa ni ulyamri lwakwa
Mmbo shaerera kimaruma kya ting'wa,
na ilwaa lya nrima wakwa.”
Currently Selected:
FIIYO 1: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
