YOSUA 10
10
Vaamori Vavingwa
1Naasa, kyeeri Adoni-sedeki, eekee mangyi Yerusalemu, aleita shaasa Yosua aletanya mangyi ya Ai na yuulyamara deny, shaasa aleveetannya Yeriko na mangyi ya vayo. Na shaasa vandu va Gibeoni valevikyana kyaasa kya ufoo na Israeli, vakakaa kwawo. 2Llyo vandu va Yerusalemu valeawukwa nnu, mashika Gibeon nato wekee muri nniini shaasa ivekee miri ingi ya kimangyi myoose nato weeng'ani ukairya Ai. Na vandu va vayo woose vekee vandu va fira. 3Nkyo Adonisedeki mangyi ya Yerusalemu karuma nrumi kwa Hohamu akee mangyi ya Hebron, kwa Piramu mangyi ya Yarmuti, kwa Yafia, mangyi ya Lakishi na kwa Debiri mangyi ya Elgon kavavia, 4“Angusyeny sere isha kwakwa, musheekye lukabe Gibeoni, mashika elyi valevika kyaasa kya ufoo na Yosua na vandu va Israeli.” 5Llyo vamangyi yewo varaanu va Vaamori, nawo ni vamangyi va Yerusalemu na Hebron na Yarmuti na Lakishi na Elglon vakakwaananya, vakarwa ando amwi na itorito lyawo woose, vakamannya ulale usumanu na Gibeon vaukape fira.
6Kive indo llyo vandu va Gibeon valeruma nrumi kwa Yosua kulya Gilgali ulaleny, vakammbia, “Woi Nndumi Iruva-dwa kulaelelise woko lwafo kulure yese mashinga afo! ‘Osho na kweru uvinyi lwakutereva-dwa kushelwaauwa sha mashika vamangyi woose va Vaamori yewo vakee ngyurukeny ta fidooro mmbo valekulunga naambo valukabe.’” 7Naasa Yosua karwa auka Gilgali, we na vandu va fira woose, na itorito vakaari va fira woose. 8Nndumi Iruva kavia Yosua, “Lola kulasheeiryaa vandu yeva, mashika lola yeny shammaa ivavika maakony afo, nta nkwiiyo nndu ashekyaa mbee yafo-fo.”
9Naasa Yosua karrwa kio kyoose na vandu vakwe kandefika Gibeon Gilgali. 10Naasa Nndumi Iruva kanyanyata vandu valya mbee ya Israeli, nawo Israeli vakawaa vandu veengyi nnu nnu yoo Gibeon, vengyi vakoombuka vakarishya shia yeyo yeerwa na Bet-horoni, vakeenda veekabwaa fika Aseka, na Makeda. 11Na kyeeri vekeerisha mbee ya Israeli, veeshooloka yeenda Bet-horoni, llyo Nndumi Iruva alewoolotya mawe ooka uwe ukau fika Eseka nawo vakafwa deny, Neewo valewaawa mmawe yoo a mura wa mbyoo vakailanya yewo valewaawa ni usu lwa Vaisraeli.
12Naasa nkonu yeto Nndumi Iruva aleauwa vana va Israeli Vaamori Yosua karera na Nndumi Iruva mbee ya vana va Israeli, kaamba,
“Yewe mwi, salala sau yoo Gibeon
Neewe mwiiri, salala yoo imungony lya Aiyaloni.”
13Nato mwi na mwiiri fikasalala kutani elyi ironda elyo lyilemaa itaiya vakiduva vawo. A yefyo nshi fikee fireiye efo kyitabuny kya Yashari? Mwi mmbo wesalala sau kulya iruveen ando a nkonu moose. 14Nta nkulenkafo nkonu sha yeto-fo elyo mbee ao numa ya vayo-fo, kutani Nndumi Iruva alearannya unyanga lwa nndu wa vandu, kimba Nndumi Iruva alekabana fira ando amwi na Israeli.
15Naasa Yosua kawuya ooka fireny ando amwi na Israeli woose, vakashefika Gilgali alya ulaleny.
Yosua Atira Vamangyi Varaanu Vaamori
16Vamangyi yewo vakarisha vakandeovya mbangeny ya Makeda. 17Naasa Yosua kashevio sheelyi vamangyi valya varaanu vallollyo veoovye kulya mbangeny ya Makeda. 18Naasa Yosua kavavasya kaamba, “Endeny pirimityeny mawe maroo yoo mwaangony wa mbanga yeyo, muvevikau na vandu veeringau. 19Neeni vengyi endeny mundevingya vakiduva veru yewo valesaa numa muvakabe, mulavare vawuyese na kulya miiriny yaawo, mashika Nndumi Iruva waany mmbo ambavika maakony any.”
20Naasa kyeeri Yosua na vana va Israeli vemmaa iwaa vandu veengyi nnu, na valya valesaafo vakawuya na kulya miriny yaawo ikee miikare na mimbombo. 21Nawo vandu va Yosua vakambuiya woose alya ulaleny lwa Makeda. Na yewo valeturunya iwaawa kulakaefo nta nndu akarya itarambwa kana irera kikasha kya Israeli. 22Naasa llyo Yosua aleamba, “Kyasia, enden musomute vamangyi valya varaanu kulya mbangeny muveende yoo mwaangony.” 23Nawo vakandemwengye vamangyi yewo yo mwangony wa mbanga: ni vamangyi va Yerusalemu, na Hebron, na Yarmut na Lakishi na wa Egloni. 24Na veekimweengye. Yosua kavaanga womu woose va Israeli, kavia vasongovu valya va fira valeenda nawe firenyi, “Nkyesembeyeny na yaa kufii-te, muvarye fishii! Yoo singony tawo. Vakasembeya neetana indo.” 25Yosua kavavia, “Mulairyae-fo-te, nta mulaawukwa-fo, kaaryen, mutire mirima mikaari mashika niindo Nndumi Iruva ashetanyaa vakiduva veru woose yewo mushekabanaa nawo.” 26Naasa Yosua kavakaba, kavawaa neevavanika miriny iraanu, vakakaau fika nkwaany. 27Kyeeri kya nkwany, Yosua kavavasya vakandeolotwa kulya miriny vakandeolotwa kulya mbangeny veoovye numa vakavika mawe maniini yoo mwaangony wa mbanga fika inu.
Yosua atira muri taari ya sinde
28Nkonu yeto Yosua katira muri wa Makeda, vandu vakawaawa noosu sanda na mangyi yaawo, vakamamitwa woose deny kulasae-fo nta umwi. Na mangyi yeto wa Makeda mmbo alentannya kimwi sha mangyi ya Yeriko.
29Naasa Yosua kooka yoo Makeda kafika Libna, na Israeli woose veeriani nawe, vakakaba Libna. 30Nawe Nndumi Iruva kavika muri yeu nato maakony a Israeli nato ukakabwa noosu ando amwi na woose veefo, kulasaefo nta nndu umwi. Na mangyi yaawo kantanya shaasa aletanya mangyi ya Yeriko.
31Naasa Yosua kooka Libna ando amwi na Israeli woose, vakafika Lakishi, vakamanyaa ulale vakankaba. 32Nndumi Iruva kavika Muri yeu wa Lakishi maakony a Israeli, ukavingwa deny elyi lya ndesi, ukakabwa noosu na woose va vayo, vakatannyo shaasa Libna nato uletannyo.
33Kyeeri ekyo mangyi Horamu wa Geresi, karwa naambo nandetarama Lakishi, lyo Yosua kankaba we na vandu vakwe, nalasaareu nta nndu umwi.
34Yosua kooka yoo Lakishi, keenda aryani na Israeli woose vakafika Eglon, vakamanyau ulale, vakankaba. 35Nkonu yeto mweni vakauvinga, vakavakaba noosu, na woose veefo vakasarumya deny shaasa valetanya Lakishi.
36Naasa Yosua karwa ooka yoo Eglon na Israeli woose ando amwi nawe, vakafika Hebron, vakakabana nawo. 37Vakatira muri yeu na yuukaba noosu, na mangyi ya vayo na miri myoose, na vandu va vayo woose, valasevo-u nta nndu umwi, indo kimwi sha filya filetannyo Eglon, vakaulyamara deny na vandu vavayo.
38Llyo Yosua alewuya na vandu vakwe woose vakandefika Debiri, vakakabana nato. 39Vakambinga ando amwi na mangyi yaawo, na miri ya vayo, vakavawaa noosu, neemamita woose, nalasaefo nta nndu, shaasa valetannya Hebron na Debiri niindo, na mangyi yaawo, na Libna na mangyi yaawo.
40Niindo Yosua alevinga na itira uruka loose lwa fidooro, na uruka lwa Negebu, na lwa Shefela, uruka lwa fisambalo na vamangyi vavayo woose. Valasaefo nta umwi, kavamamita woose, shaasa Nndumi Iruva wa Israeli ulevavasya. 41Yosua kavakaba abookya kadesh-barnea fika Gaza, na uruka loose lwa Goshen fika Gibeon. 42Na ngyumangyi yeto toose na ngyuruka ta vayo Yosua katiringa kimmba Nndumi Iruva wa Israeli alekabannya Israeli. 43Naasa Yosua kawuya eeryani na vandu vakwe va Israeli vakafika ulaleny lwa Gilgali.
Currently Selected:
YOSUA 10: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
