YEREMIA 27
27
Yeremia araa nguvanu ya shau
1Mapookyony a ushilyi lwa Sedekia mwana wa Yosia mangyi ya Yuda, irero elyi llyesheya Yeremia lyuuka kwa Nndumi Iruva. 2Nndumi Iruva kashivia, “Songosya fyaaru fya fyoove na mitaato ya yookyi kwa kwaavika singony. 3Kwarummya mangyi ya Edomu, mangyi ya Moabu, mangyi ya vana va Amon, mangyi ya Tiro kwa maako a varumi yewo valesha Yerusalemu kwa Sedekia mangyi ya Yuda. 4Vaniinge ivavaso elyi kwa vamangyi vawo: 5‘Ni Yeny kwa wiidimi lwakwa uniini na woko lwakwa woorrwe shiletana uruka na vandu na mafisi akee yefo urukeny, neeny nshiniinga kwa nndu moose shilollyaa kyikwaani. 6Ulaalu Yeny sanniingya ngyuruka yeti toose wokony lwa Nebukadnesa mangyi ya Yuda, nrundi wakwa, neeny nshaniinga na mafisi a ngoroshony na nrundye. 7Masanga moose nnyanrundyaa we na nsero vakwe na nshuku wakwe fika kyeeri kya uruka lwakwe muni lushaa; llyoony masanga na vamangyi vaniini vashemwaallwaa ishinga.’
8“Indi lyo kwakooya isanga lyoose ao umangyi kulaore lurunndyaa Nebukadresa yeu mangyi ya Babilony, na yaata singo ya vayo yookyiny ya mangyi ya Babilony, Yeny nshikapaa isanga yelyo na usu, shaa na ndwari shinyaasi, fika shalyimamita na woko lwakwe, ni Nndumi Iruva aamba. 9Kweekyo muarannyi vakisuku vany nta veekapa ulwaa, nta veyorya nta veefissha mbaka nta vasavi vany-fo, yewo vakemuvia, ‘Yeni mmurundyaa mangyi ya Babilony-fo.’ 10Mashika yelo ni wongo vakemwaawuya fisuku naambo muumbutywa kwaasha na uruka lwany na Yeny shimurishisaa, na yeni mmumamikaa. 11Indi lyo wo isanga lyikwaavika yookyi ya mangyi ya Babilony na inrundya, nshilyiraa urukeny lwa vayo yeni, valuremyi na ikaa-fo, ni Nndumi Iruva aamba.”
12Ni kyiwo kwa Sedekia mangyi ya Yuda sheelyi; “Avika singo yafo yookyiny ya mangyi ya Babilony na inrudya we na vandu vakwe kusee na muu. 13A nkyikyi yewe na vandu vafo mufwe ni usu, shaa na ndwari shinyaasi shaasa Nndumi Iruva anrera kya wo isanga kulaore lyirundyaa mangyi ya Babilony? 14Mulaarannye marero a vakisuku yewo vakeemuvia, ‘Yeni mmurundyaa mangyi ya Babilony-fo,’ mashika ni wongo vakemwaawuya. 15Nndumi Iruva aamba, nshiilevaruma-fo, indi lyo mmbakeeyaawuya wongo na irina lyakwa, naambo shimuumbute na mufwe, yeni na vakisuku yewo vakeemwaawuya fisuku.” 16Llyoony sharera na vakohani na vandu yeva woose shaamba; “Nndumi Iruva aamba ule; Mulaarannye marero a vakisuku vany yewo vakeemwaawuya fisuku veeshaambaa, ‘Loleny fiyya fya mmba ya Nndumi Iruva nkufii deny fiviirwa fyuuka Babilony,’ mashika ni wongo vakeemwaawuya. 17Mulavaarannye-fo; rundyeny mangyi ya Babilony mukkye muu. A nkyikyi muri yeu waaluke sama? 18Kwakooya vakee vakisuku na kwakooya vatiri irero lya Nndumi Iruva lyikee kwao vatereve Nndumi Iruva wa matorito sheelyi fiyya fisaari kulya mmba ya Nndumi Iruva na mmbeny ya mangyi ya Yuda na Yerusalemu fileende Babilony. 19Mashika Nndumi Iruva wa matorito aamba ule kya ngo, yeeve, ngara na fiyya fisaari muriny yeu, 20yefyo Nebukadnesa mangyi ya Babilony kulaore alefiipoo, llya ekamara Yekonia mwana wa Yehoyakimu mangyi ya Yuda ushingeny uka Yerusalemu, na vasongoru va Yuda na Yerusalemu, 21Nndumi Iruva wa matorito, Iruva wa Israeli aamba ule kya fiyya fyerewa mmba ya Nndumi Iruva, mmba kwa mangyi ya Yuda na Yerusalemu: 22Yefyo nfishiipowoo fika Babilony, fikee-fo fika nkonu shifisheyaa, ni Nndumi Iruva aamba. Llyo Yeny shishefiviira na ifisuruma ando andi.”
The Holy Bible in Kimashami © Bible Society of Tanzania, 2016.