YEREMIA 20
20
Nkohani Pashuri awarana na Yeremia
1Ulaalu Pashuri nkohani mwana wa Imeri yeto ekee nniini va mmba ya Nndumi Iruva, keeta Yeremia eshaawuya fisuku yefi. 2Llyoony Pashuri kakapa Yeremia nkisuku kamfingya nguvanuny yeeke uwe ya ngyiri ya Benyaminy ya mmba ya Nndumi Iruva. 3Ndesi ya vayo, elyi Pashuri elekeya Yeremia uka nguvanuny Yeremia kammbia, “Nndumi Iruva nnyakuvaanga-se Pashuri-fo indi ni weeresi taari toose. 4Mashika Nndumi Iruva aamba indi: Lola nshishekwaallwaa weeresi kwafo kumuni na vambuya vafo. Mmbawaawaa ni usu lwa vakyiduva vawo kwiilolaa. Na nshisheningyaa Yuda shoose wokony lwa mangyi ya Babilony; nnyavakamaraa mifungwa fika Babilony navawee na usu. 5Mmwasi, yeny nshisheningyaa umasi lwa muri, ileri, findo fya vayo fya usuri, na masina moose a vamangyi va Yuda wokony lwa vakyiduva vawo, yewo mmbo vashevasokaa, vaashillye na iyakamara fika Babilony. 6Yewe Pashuri na yewo woose vakee yefo mmba kwafo mmbakamarwaa mifungwa; Babilony nkusheenda; na mfo kundo kufiyyaa, na mfo kundo kurikwaa yewe na vambuya vafo woose, yewo kulevaawuya fisuku fya wongo.”
Yeremia akunung'una
7Woi Nndumi Iruva nkuleshilemba shalembika; yewe nkutiri finya ngota yeny,
na yewe kwashilyimba,
Yeny shammaluka seko nkonu simu;
wo nndu nnyakeeshiipala.
8Mashika wo kyeeri sharera, nshikeiffwa,
na ikapa kyoorongye, “Kyituuru na ulyamaro!”
Kya elyi irero lya Nndumi Iruva lyanshivia kyiila na iminwa nkonu simu.
9Kwakooya shaamba, “yeny nshinsendaa lyingyi ao irera lyingyi na irina lyakwe,”
nriminy mbwakwa kukakaafo sha kindo muro ushaakaa ukemfingye maffony akwa,
neeny nshamaaraa isisirya nta nshikeidima-fo.
10Mashika mmbo shiitye kyiviriviri.
Weeresi llukee taari toose!
“Llyingyeny! Ndifony llullyingye!”
Ni indo vambuya vakwa woose vakeeyaamba, veevereyaa iwa lyakwa.
“Kulakooye alembika lullyimbe na intaiyya kyiduva kyeru.”
11Indi lyo Nndumi Iruva akee neeny sha isiingo lya fira;
kweekyo vakiduva vakwa mmbashetulwaa, mmbashilyimbaa-fo.
Mmbashesukaa kyuumu, mashika mmbashiinukyaa-fo.
Mmbatirwaa ni sony ya llung'anu ilakaa irekyiwa.
12Woi Nndumi Iruva wa matorito, yewe kweesa nsumanu,
yewe kulolyaa ngoo na mirima,
sheekya shilollye kwiivataiyya kyiduva,
kya elyi shakurambikkya mbony takwa.
13Imbya Nndumi Iruva; itikiseny Nndumi Iruva!
Kya elyi alekyira muu va vaturi maakony a valyamari.
14Udengwa nkonu ulya shewonika!
Nkonu ulya maaye-akwa eshiira, ulalyimywa mbora-fo!
15Nadengwa nndu ulya
eengye rumi nde akwa sheelyi,
“Kwammiirywa mwana nsero,”
vakamfurisa nnu.
16Nndu yeto naaluke sha miri Nndumi Iruva aleikapa kuleifo ilyillya;
neete kyiyyio ngama na ngusana nsanyiny nnang'ani,
17kya elyi kulaore aleshiwoiyya ndeuny;
indo-da ma-akwa nyeshaaluka kifu kyakwa
na ndeu yakwe ya mwana ing'ane llung'anu.
18A nkyikyi shooka sangeny wa maye akwa,
ishelollya makyiva na ting'wa,
na ilyiyya mikonu yakwa usutuny?
The Holy Bible in Kimashami © Bible Society of Tanzania, 2016.