YEREMIA 18
18
Yeremia kwa muumba nungu
1Irero lya Nnndmi Iruva lyikasheya Yeremia: 2“Kwiipoo, oloka fika mmba ya mwuumba-nungu, yoo nng'u shishekureryaa marero akwa.” 3Llyoony, shooloka shafika mmba ya muumbi wa nungu, shankooya eerunda na ngalyi. 4Kyindo kilya eekee-uumba kya uteri lwa sena kyikawunduka etiri maakony akwe, keepo uteri lulya lwawunduka kaumba-fo kyindo kyingyi shaasa elollya kyevaa nisha.
5Llyoony irero lya Nndumi Iruva lyikashisheya: 6“Yewe mmba ya Israeli, a shishiidima-se itana sha mwuumbi-yeu-wa-nungu? Ni Nndumi Iruva avesa. Lola sha uteri lukee wokony lwa mwiuumba-nungu ni indo mukee wokony lwakwa yeni mmba ya Israeli. 7Kwakooya, nkonu moose sharummbwa kya isanga ao umangyi sheelyi shilukurwaa tushu na ilimamita, 8lyo isanga elyo shalyirumbuya lyikuryaa, nshishaalashaa kya ngapo yeyo shenkusara iveengye. 9Na nkonu moose sharumbuya isanga ao umangyi sheelyi shilutumarisaa na iluvaaya, 10lukashiipala na itana uravi nshishaalashaa kya mesha shellukusarya. 11Kweekyo ulaalu, rera na vandu va Yuda na veekaa va Yerusalemu, ‘Nndumi Iruva aamba, lola nshikeeveyya makasha na yaala ngapo kyany. Kuriyeny, wo umwi uka uraviny lwa shia takwe, mukaalashika shieny na mitannyi yaany.’” 12Lyo vakaamba, “Yekyo ni ruu-da! Llulatya makusaro eru luveni, na wo umwi natane umbafu lwa nrima wakwe.”
Vandu valakana na Nndumi
13“Nndumi Iruva aamba, kweekyo:
veseny nnang'ani ya masanga, mmbi alemmitya ekyi?
Mwana wa kyeny Israeli
antana kyindo kya tangalu.
14A kyaamwi kya Lebanoni nkiree mawe a ngyina?
A mura va mafumbuu umyaa,
mifongo irelelaa iisokaa?
15Llyo vandu vakwa mmbaleshirekkywa,
vakakorya ubani maruva a wongo;
vakatula shieny tawo,
shieny tawo ta kasha,
vakalatya miko vakara shia ikwaani,
16vakaallwa uruka lwawo kyido kya yeerese nnu.
kyindo kya ipalwa llung'anu.
wo nndu ashiiraa kufii nyakesaukwa kaining'ina nrwe.
17Nshivanyanyataa sha uraato lwa taari ya ngama mbee ya vakyiduva vawo.
Shivakape mungo ando a iwoora kisangu kyakwa,
nkonu wa iwoywa lyawo.”
Yeremia avikyo ikwaanu kirika
18Llyo vaamba, “Oshony lulye kyama kya Yeremia, mashika llusheuwaa nkoani wa ilulosha-fo, nta nndu nrango, nta nkisuku wa irero-fo. Oshony llukape na ngyulumi nta lulakwise kya marero akwe-fo.”
19Naasa yeny shatereva; “Woi Nndumi Iruva shaarannya,
irikkya yooshora lyakwa.
20A uravi llutaiyyaa mesha?
Naakwa ni indo mmbashisumya irina.
Kummbwa shaasa shesalala mbee yafo ivaterevya mesha,
ipaaya nyashi yafo ilavawoye.
21Kweekyo rambikya vana vawo vafwe shaa,
vare vamamitwa ni finya ya usu,
vaka vawo vawe fyuumba na yaaluka vaka va ding'u.
Womi vawo vawaawa ni ndwari sheeresi,
vasero vawo vawaawa ni usu fireny.
22Kyiiyyo kyiitiwa mmbeny tawo,
elyi kuvarikkya itorito lya fira lyivawoye tiny!
Mashika mmbaleshisumya irina
na mbaleshivikkya nreiyo utire marende akwa.
23Naakwa ni indo woi Nndumi Iruva,
kwiishi kyama kyawo kya ishiwaa.
Kulasarye uravi lwawo
nta yuuta ulyamari lwawo misony afo-fo.
Ra veerwa-si mbee yafo;
kuvakabe kyeeri kya nyashi yafo.”
The Holy Bible in Kimashami © Bible Society of Tanzania, 2016.