YEREMIA 10
10
Maruva a wongo na irero lya dede
1Nndumi Iruva mmbo akeemuvia; yeni va mmba ya Israeli. 2Nndumi Iruva mmbo aamba indi;
“Kulalatye shia ta vandu va masanga-fo
nta mulasheesongololo kya ngyende iruvee-u,
mashika masanga mmbo akeesongololo kimaruma kya ngyende yeto.
3Mashika mikaaye ya vandu yewo nnya wongo,
nri mmbo ukeentuule-si
ni mashora a nndu atiri kyaara.
4Nndu mmbo aushopa na arera na saabu;
neewiikara na misumari na kyiria ulashesi-ngasinga.
5Maruwa awo mmbo avakye mitende ikeemivaaye nndeny kwi nstare;
nayo ilashiidima irera mashika nnyishiidima yeenda-fo;
Kweekyo kulayeereye-fo mashika nnyitiri wiidimi lwa itana makasha-fo nta itana mesha-fo.”
6Yewe Nndumi Iruva, nkwiifo ungyi akuvakye-fo,
uniini ni lwafo irina lyafo llyilyimmbye.
7A mmbi alakweereyye yewe mangyi ya masanga?
Mashika yewe mmbo kukwaani yiinndywa
nnyelyi kuleefo ungyi nrango sha yewe
nnang'ani ya masanga moose,
naakwa ni yefo ngyumangyiny tawo kuleefo nta umwi akuvakye.
8Woose mmbo vakee matondo na varung'ani,
fyoose ni maruva a wongo eepasha.
9Arera shipashe mmbo yuukye Tarshishi,
na saabu ikooka Efasi.
Yoo ni mashora a nndu mfuru, a maako a yeeta saabu;
na masara awo ni fwana ya Samawi na Urujuani,
yoo moose ni mashora a nndu mfuru.
10Indi Nndumi Iruva, ni Iruva wa dede,
Iruva wa llung'anu eefo na muu
na umangyi lwakwe ni lwa llung'anu
fidina-si na masanga mfishiidima isiika nyashi yakwe-fo.
11Mmbo kushevavia indi, “Maruva yoo alashiidimaa itana nginiiu na ulana,
mmbo ashemamitwa yaa ulaniny na irekyeka kunu-si ya ngina.”
Kyiimbo kyeerrumisha Iruva
12Mmbwe aleumba ulana na finya takwe,
mmbwe asongosya uruka na urango lwakwe,
kwa umanyo lwakwe kaala ngina.
13Kyeeri oota unyanga lwakwe, mmbo kwava-fo yoona lya mura ngiini-u,
na ifishi lyikasaama lyuuka mafurumyony a uruka,
kaata fimwii fya mmbwa na yeende uraato lwa finya luuka kwakwe.
14Wo nndu mmbo akee itondo alatiri umanyo;
wo nndu mwiyeeta saabu mmbo asutoo mmaruva akwe muni,
mashika mafwanu akwe ni a ulembi,
mashika nnyatir mumuyo nnang'ani avayo-fo.
15Mashika nnyatiri mbusha-fo, ni mashora a ulembi,
kyeeri kya mwaandu mmbo ashemamitwa.
16Nkwiifo sha yeu aukye mmba ya Yakobo-fo,
mashika we mmbwe aumbe findo fyoose,
na Israeli mmbwe muyading'u yakwe.
Ushinga lukeesha
17Ummbya shashu yafo,
yee, yeni mukee varingitye!
18Mashika mmbo Nndumi Iruva aamba:
“Yeny, shiveerya kwaasha na iwe lya nkoveny,
vandu va uruka lwa kyeeri ekyi,
shisheveengye ukiva valakaa varekywa.”
19Woshiny lwakwa kimaruma kya kyaasha kyakwa!
Ngapo yakwa mmbo ikeeshivavya
indi shaamba, “Ni kya dede nkimaruma kya mavavywo ni kuti shisisirye.”
20Yeema lyakwa mmbo lyallyamarwa, na isimamba mmbo tamfishwa;
vana vakwa vanshirisha mmbakiiyo-fo,
nkukyiiyo nndu weereiya-se yeema lyakwa-fo,
nta wa yoorrwa fitambaa fya matirisha akwa-fo.
21Mashika veesi mmbarung'ani
mmbakeeruuya weeki kwa Nndumi Iruva-fo,
kweekyo mmbakeevesywa-fo, na moonri moose mmbo ammeenyanyaka.
22Aranya, shammiita miiso,
ikeesha yuuka taari ya ndoo
isheallwa miri ya Yuda ive ukiva
na kundo kweeka maparwe.
23Yee Nndumi Iruva mmbo shiishi sheelyi nndu nnyatiri wiidimi-fo,
we muni nnyashiidima itetera muu wakwe-fo.
24Sheekya woi Nndumi Iruva kwa ilyillya lyafo;
kulanyafukwa kyakwa-fo, shilyillya yeny shikee mfwafwa.
25Vapusuye nyashi yafo masanga yoo alakwiishi,
na uwe ya vandu yeva valashiinndya irina lyafo;
mashika mmbo vallya Yakobo,
yee, mmbo vammulya neemmamita deny
nayaallwa ukyiva kundo kwakwe kwekaa.
The Holy Bible in Kimashami © Bible Society of Tanzania, 2016.