VALETI 8
8
Ivingwa lya Mafurumyony lya Vamidian
1Naasa vandu va Efraimu veekiita mbony yeto vakavia Gidion, “A nkyiki elyi kwalutannya indi?” Nkuleluvaanga elyi kulendekapana na Vamidiani-fo. Vakasakkya nawe deny. 2Nawe kavavia, “A nkyoki shiletana kiilanyi ekyo muletana yeni? Naakwa ni ndunda ta misabibu yeto ta Efraimu mmbo tiilanyi fimu fya ufyari lwakwa lwa Abieseri. 3Nawe Iruva mmbo alevika vamangyi yewo va Vamidian Orevu na Seebu maakony any. A yeny nkyoki shiletana-n?” Ee kyaammba indo na unyafi lwawo lukawa. 4Naasa Gidion karuuka Yordan ando amwi na vandu yewo eeriani nawo, nawo mmbo vemmaraa vakasya finya deny, lyo vakeengera ivavinngya. 5Naasa kavia vandu va Sukoti, “Niingeny vandu yeva shiriani nawo shoonga, mashika vammba vanana nnu, mmbo lukeevinngya Seba na Salmuna, nawo ni vamangyi va Midian.” 6Vasongoru va Sukoti vakaammba, “A mmbo kwambinga Seba na Salmuna kutani luniingaa itorito lyafo shoonga?”
7Nalyo Gidion kaammba, “Naasany, lyo elyi Nndumi Iruva ashevikaa Seba na Salmuna maakony akwa, mmbo nsheouwa nyama ya miili yaany na yiidoshadosha na miinga ya usakeny.”
8Eekyuukan yoo karwa na Penieli, kavia vandu va vayo marero yoo meni. Vandu va Penieli nawo vakalema ivaniinga shoonga vakasherouwa sha vandu va Sukoti. 9Nawe kavavia “Elyi nshewuyaa shammaa ivinga, mmbo nshewunndwaa nnara yeu wany.”
10Vamangyi yewo Seba na Salmuna mmbo venrishya Karkori, ando amwi na itorito lyawo, iniini sha fiku ikumi na firaanu. Nawo mmbo yewo vensaa-fo vandu yewo va taari ya ngama. Mashika mmbo vemmbwaawa vandu fiku iyana na makumi avii vekee vaskari. 11Naasa Gidion kasora taari ya yewo veekee meemeny nnyo taari ya ngama ya miri ya Noba na Gogbeha, kavakaba uviny mashika mbeekudeesye-fo. 12Nalyo vamangyi yewo vavii Seba na Salmuna na Midian vakarisha, kyeendi vakavavinngya, kavatira, na itorito lyawo lyikanyanyaka. 13Naasa Gidion mwana wa Yoashi kawuya ooka fireny, eeshiraa shia ya irwa na Heresi. 14Naasa kakwaanannya na nndu umwi nkoo wa Sukoti, karera nawe, nawe llyo alensendya marina a vasongoru va Sukoti na vamiku va muri yeto woose vakava vandu makumi mfungare na mfungare. 15Naasa kashesha kwa vandu va Sukoti kavavia, “Mwiishi, vamangyi valya va Midian Seba na Salmuna muleshisela kimaruma kyawo llya muleshivia, ‘A nkyoki kwantannya Seba na Salmuna kutani lukuningaa shoonga.’ Ekakavany ulaalu.” 16Vakandeepoo miinga efo kasa kandeorota nayo vasongoru valya va Sukoti. 17Naasa kookafo kawunndwa nnara wa Penieli, kavewaa na vandu valya mulewaa kulya Tabori mmbo veekee vandu va ngata-ki? Vakammbia, “Mmbo veekuvakye yewe, wo umwi waawo mmbo eevakye mwana wa mangyi.” 18Naasa kavesa Seba na Salmuna “A nkwi womi valya mulewaa kulya Taboni vakai?” Vakarouwa vakaamba, “Shaasa kukai, ni indo veekai wo umwi waawo; mmbo weevakkye vana va mangyi.” 19Nawe kawuya ivavia, “Vandu yewo mmbo veekee vanavama va ivee lyimwi nsi, Mmbo shamuvia dede, kukooye mulekira vandu yewo neeny inu nshemuwaa-fo.” 20Naasa Gidion kavia mwana wakwe mmbee, “Yeteri, salala kwawaa vandu yeva.” Lyo mwana yeto wakwe alesomwa usu lwakwe-fo, kimmba akee mwana nkoo. 21Llyo Seba na Salmuna valeamba, “Salala yewe kumuni kwaluwaa, mashika shaasa nndu akai niindo na finya yakwe ikai. Llyo Gidiaon kasalala kawaa Seba na Salmuna, numa keeboo na findo fya utore efo singony ta ngamula tawo.”
22Naasa vandu va Israeli vakavia Gidion, “Lushillye yewe-te, yewe na mwana wafo na vashuku vafo, kimmba kwallwaauwa maakony a Vamidian.” 23Gidion kavavia, “Yeny nshimushillyaa-fo, na vana vakwa-fo, Ni Nndumi Iruva muni amushillyaa yeni” 24Yeny nkindo kimwi nsi shikunndye kwany, shiniingyeny findo efyo fya maaarwi mulesoka yewo mulevavinga-te. (Mmbo valeonisa-fo nrashi na fivelu fya maarwi mashika elyi veekee Vasumeelyi). 25Vakammbia, “Mmbo lukuningyaa toose deny.” Naasa vakaala soori si, vakavikau findo efyo. 26Uroo lwa vayo lukava ni filo makumi avii, kuutafo findo fingyi fisha filesokwa vandu yewo na Vamangyi va Midian, sha mise na fingyi. 27Naasa Gidion kasongosya-fo ifwanu, kaivika muriny kwakwe efo Ofra, nawo Vaisraeli woose vakeenda-fo vakandelyiinndya, na ifwanu elyo lyikava nreiyo na kyeeso kwa Gidion na mmba yakwe. 28Niindo Vamidia valevingwa ni Vaisraeli, nta valakikwiiboo-se lyingyi. Naasa uruka lukatira ufoo ando a myaaka makumi aana ya Gidion.
Ufu lwa Gidion
29Naasa Gidion mwana wa Yoashi keenda kyeny kwakwe. 30Gidion mmbo eetiri vana makumi mfungare, mashika mbo eetiri vaka nkuka. 31Na nka kishinga wakwe eekee Shekemu kamwiirya mwana, kammbaanga Abimeleki. 32Naasa Gidion wa Yoasi kafwa eetiri myaaka miingyi, kaarwa mmbangeny ya ndeye Yoashi kulya Ofra ya Waabieseri.
33Gidion eekifwa indi, vana va Israeli vakaalashika vakeendya maruva a wongo Baali, na Baal-Beriti vakammbika iruva lyawo. 34Vana va Israeli mmbalekikummbwa Nndumi Iruva waawo-fo, nawe mmbwe alevaauwa maakony a vakiduva vawo woose, 35nta mmbalekiinndya vandu va mmba ya Yerubaali-fo we Gidion-fo, nta mmbalekikummbwa mesha alya alevatannya-fo.
Currently Selected:
VALETI 8: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
