VALETI 13

Samson Awonika

1Vana va Israeli vakalyamarya-se Nndumi Iruva, nawe Nndumi Iruva kavavika maakony a Vafilisti ando a myaaka makumi aana.

2Naasa efo ufyariny lwa Dani kweefo nndu wa Sora evaangwa Manoa, na nkaakwe naleira mwana. 3Nsu wa Nndumi Iruva kasheya nka wakwe kammbia, “Mai, yewe mmbo kukee kyuummba, kyeendi ulaalu mmbo kukufingaa kwiire mwana wa kyuumi.” 4Nkyo ulaalu kukwiise nnu, kulane mfinyo nta kindo kinangaa-fo, nta kulalye kindo kitefusu-fo. 5Mashika mmbo kukufingaa kwiire mwana wa kyuumi, nawe nnyashootwaa fii ta nrwe-fo, mashika mwana yeto mmbo ashevaa wa kyaasa kwa Iruva uka nalandewonika. We mmbwe asheauwaa Israeli efo maakony a Vafilisti.

6Naasa nka ulya keenda kandevia mmi wakwe, kammbia, “Mmbo kwiifoo nndu wa Iruva anshisheya, kisangu kyakwe kimikaa sha nsu wa Iruva, kyeeresye nnu, lyo yeny shilammbese, Nkwikooka” ao nta nnyaleshivia irina lyakwe-fo. 7Nawe mmbo aleshivia, “Yewe mmbo kushekufingaa, kwiire mwana wa kyuumi. Nkyo uka ulaalu kulasheena mfinyo nta kindo kinangaa-fo, nta kulalye kindo kitefusu-fo. Mashika mwana yeto mmbo akee wa kyaasa kwa Iruva uka nalandewonike, fika nkonu yeto ashefwaa.”

8Naasa Manoa katereva Nndumi Iruva kammbia, “Woi Nndumi Iruva shakutereva nndu yeto wa Iruva nakusheye kwakwa lya kavii, naloore nisha ekyo kisumani itannya mwana yeto awonikaa.” 9Iruva kaaranya kyiterewo kya Manoa. Nsu ulya wa Iruva kashesheya nka yeto kyeeri ekee nreminy, na mmi wakwe Manoa nnyeiyo nawe-fo. 10Naasa nka wa Manoa karisha sere kandevia mmi wakwe, kammbia, “Nndu ulya wa Iruva aleshisheya ansha lyingyi.” 11Naasa Manoa kaangusya we na nkaakwe vakasora nndu yeto, vakandekooya nndu yeto, Manoa kammbesa, “A ndesa ni yewe kulerera na nka yeu wakwa?” Kammbia, “Yee mmbwe yeny.” 12Manoa kammbesa, “Elyi kyaasa ekyo kyafo kisheinukyaa, mwana yeto mmbo ashevaa wa ngata-ki na ishora lyakwe?” 13Nsu yeto wa Nndumi Iruva kavia Manoa, “Nka wafo nakwiise nnu na efyo shilemmbia. 14Nalalye kindo kyoose kyuukye nsabibuny-fo, nalani mfinyo-fo, nta nalalye kindo kitefusu-fo. Naringe efyo fyoose.” 15Naasa Manoa kavia nsu yeto wa Nndumi Iruva, “Mmbo shakutereva kwiirishe kyaangu, shinderuuya ngurana ya mburu kimaruma kyafo” 16Lyo nsu wa Nndumi Iruva kammbia, “Naakwa sheerisha, nshishidimaa ilya shoonga yafo-fo, na kwakooya kukunndye yuuta kiraso kyeekora na muro, ekyo utya Nndumi Iruva. Mmashika elyi kulore Manoa alemanya ni Nsu wa Nndumi Iruva.” 17Manoa kavia nsu yeto wa Nndumi Iruva, “A irina lyafo ni vi? Naambo elyi efyo kwaammba fisheinukyaa lumanye ni yewe kuleammba.” 18Nsu yeto wa Nndumi Iruva kammbia, “Nkwi kurwaa irina lyakwa, mmbo lyikee inda?” 19Na lyo Manoa keende mburu ilya na kiraso kya nswa, kootya Nndumi Iruva kiraso. Nawe nsu yeto katana kindo kya wende na Manoa na nkaakwe vakalollya. 20Kyeeri nsu wa kiraso ekyo wekeerwa na uwe wuuka alya kirasony, nsu ulya wa Nndumi Iruva karwa na kipalapala kilya kya muro, Manoa na nka valollya kive indo vakawa si na kisangu. 21Naasa, nsu yeto nnyalekisheya se Manoa na nkaakwe-fo. Lyo Manoa alemanya dede yeto ni nsu wa Nndumi Iruva. 22Manoa kavia nka, “Nkutilufwe mashika elyi lwalollya Iruva na miso.” 23Lyo nka wakwe kammbia, “Kukooye Nndumi Iruva eekunndye iluwaa nnyewaryaa kiraso kilya kyeekora na muro, nta kiraso kya nswa, nta nnyelooraa nai luviaa findo efyo-fo.”

24Nawe nka ulya keera mwana wa kyuumi, kammbaanga Samson Nndumi Iruva kavikya mwana yeu mbora nawe kang'ana nisha. 25Nato Mumuyo wa Nndumi Iruva ukammbangisa ekee Mahane-dani nnang'ani ya Sora na Eshtaoli.

Currently Selected:

VALETI 13: MAS2

Highlight

Compare

Copy