ISAYA 7

Nrumi ya mangyi Ahasi

1Kyeeri mangyi Ahasi, mwana wa Yotamu na nshuku wa Ussia veshillya Yuda mmbo yesha fira. Resin mangyi ya Ashuru na Pekah mwana wa Remali, mangyi ya Israeli mmbo vekapa firra muri wa Yerusalemu lyo valaidimi yuutira.

2Kyeeri mbony yeti tefikya mangyi ya Yuda, sheelyi matorito a Vaashuru nnyoo minyanuny ya Vaisraeli vamfika, we na vandu vakwe woose mmbo eereya kafina kitanga ngata ya miri ikeevivitwa ni uraato.

3Nndumi Iruva kavia Isaya, “Enda yewe na mwana wafo Shear-jashub kundekwaanannya na mangyi Ahasi. Kundekooya ando vakeesongosya soori, masiiyo a mfongo yeto usotaa mura wuuke yefo iruweny lya taari ya uroou. 4Kummbye, alale shoovi alafwe nrima nta yeereya kyimaruma kya nyashi na unyaasi lwa mangyi Rasin wa Ashuru na ya mwana wa Ramalia-fo, yewo vavii ni kyimwi sha nsu wa ngwi tikeerumika. 5Vaashuru na Vaisraeli amwi na vamangyi vawo mmbo vamfisha kyama. 6Lweende ikapa fira uruka lwa Yuda lweerese vandu vawo woose naambo vakooye ikulunga na yese lundevika mwana wa Tabeel kitiminy nave mangyi yaawo.

7“Indi Nndumi Iruva kaamba, “Ekyi kyindo kilashiidimika nta kilakaa kitanyike, 8mashika Siria nnyitiri finya ikailannya Demasiko-fo na muri wawo nniini mmbutiri finya ukailannya mangyi Resin-fo, mashika Israeli ando a myaaka makumi arindaru na iraanu mmbo ikooywa ni kindo kyuumu deny isalala sha uruka. 9Israeli nnyitiri finya ikailannya Samaria-fo, miri yaawo miniini nnyitiri finya ikailannya mangyi Pakali-fo. Kwakooya kulashiirikya mbony yei nkukaa kusalale-fo.”

Kiring'isyo kya Imanueli

10Nndumi Iruva karuma nrumi ingyi kwa Ahasi. 11Kammbia, “Vesa nndumi Iruva, Iruva wafo, akoore kiringisyo, kishiidimaa yuuka sumbai efo kwa vafu! Ao kyuuka iruveeu.”

12Ahasi, karouwa kaamba, “Nshiidima ivesa kiringisyo-fo, mmbo shilemyi ivika nndumi Iruva fyeesony.”

13Isaya karouwa kaamba, Arannyiny yeni vammba ya Davidi! Ni kindo kilavaa yaatara vandu, ulaalu mmbo mwankunda nayaatara naakwa ni Iruva! 14Kyasia Nndumi muni ashemooraa kiringisyo, mwana wa kyika ashekufingaa nawe ashewona mwana wa vomi, nawe ashemmbaanga irina lyakwe ni Imanueli. 15Nawe mmbo ashelyaa mafura na ukyi, kutani ang'ana wa iimanya itana mesha na makasha. 16Nta kulaore mwana ammanya ilema itana findo fikasha na isauwa itana mesha, ngyuruka ta vamangyi yewo vavii mmbo tikooywa tammba marama,

17“Nndumi Iruva uwe yaany na uwe ya vandu vafo va mmba toose ta kyimangyi, Nndumi Iruva mmbo ashemweengye ukyiva uwe yaany na uwe ya vandu vafo va mmba toose ta kyimangyi kulaore lulellollywa kupookya kyeeri kilya vandu va Efraim velakana na vandu va Yuda. Ashemwenngye mangyi ya Ashuru.”

18Elyi kyeeri ekyo kyishefikaa, nndumi Iruva mmbo ashemuvaanga namukapye mwiiri yeni vandu va Misri vashe vafye sha nri wooka taari toose ta mura wa Naili. Na Vaashuru vashe wooka urukeny lwawo sha shukyi. 19Mmbo vashesha makamba kwi makamba, nawo vasheishura mamungo kundo kupaparikye mindeshe, ikee yefo mbangyeny na kundo kutiri miinga na ngorosho ya yiisa findo fyeevikya fyoose. 20Elyi kyeeri ekyo kyifikaa, Nndumi Iruva mmbo asheakkwa weembe kwa kulya ya mura wa Efrate kwa mangyi ya Ashuru ashoota nalo fii ta mirwe yaany, miili yaany naakwa ni nguyo tany nato mmbo tisheutwaa.

21Kyeeri ekyo mmbo nndu ashevikyaa ngashe iimwi na moonri avii. 22Nato mmbo tisheende malela meengyi neengyi asongosye-fo mafura. Vandu vashekooywa-fo mmbo vashevaa na shoonga teelya tifye, mafura na wukyi. 23Kyeeri ekyo wo ando kweetiri nnda mmbiiri wa misabibu na nrema ta wuuru lwa fesa mafiku, mmbo tishemmya miraamboo na miinga. 24Mmbo kushevaa ngorosho ya mafisi, vandu vashesha-fo iwaa mafisi veerye mife na ngyura. Yee uruka loose mmbo lushevaa ngorosho itiri miinga na misuu-se 25Fidooro fyoose filya fyeeremwa na ikumbi kya ngorosho na miinga yiifo. Ulaalu ni kundo kweisa ng'umbe na moonri.

Currently Selected:

ISAYA 7: MAS2

Highlight

Copy

Compare