ISAYA 64
64
1Kyekee ng'waana kweparaa ngina, na yolooka naambo mafumbu nareremi mbee yafo; 2Shaasa muro ukekora ngorosho, na muro ukesambuta mura, naambo koore vakiduva vafo irina lyafo, masanga nareremi mbee yafo! 3Kyeeri kuletana findo fya wende kulaore lweefiishi, kuleoloka, mafumbu akarerema mbee yafo. 4Mashika uka kyeeri kya kasha vandu mmbalekwaraanya-fo, nta imanya na maarwi, nta iriso llyilelollya Iruva akuvakye yewe-fo, kutanaa mbony kimaruma kya yewo wakuvikye nsia. 5Yewe kwawarya yeto akefurya usumanu na itana, vandu valya vakeevallya na shia tafo; lola, kwetirwa ni ngoo, neese lukatana ulyamari; lwankaa findony efyo fyeeri fyaasha, ndesa neese lukirwaa? 6Mashika yese loose lwammba sha nndu afwani kirinda, na mitannye yeeru myoose ya usumanu, ikava sha soori tirinndye, yese loose mmbo lukeyuuma sha ire, na uravi lweru mmbo lukee iluvivita sha uraato. 7Nta nkwiifo akevaanga irina lyafo-fo, akekuvangisa ikutira; kimmba kwallusuruma kisangu kyafo neewe kwalura kyuuka na maravi eru.
8Indi ulaalu, yee Nndumi Iruva, yewe mmbo kukee Nde weeru; yese loose ni uteri neewe kukee muumbi weeru, yese loose mmbo lukee mashora a maako afo. 9Woi Nndumi Iruva kularooywa nngoo shiingyi, nta kulakummbwe ulyamari kyeeri kyoose; lola, lwakutereva, yese loose mmbo lukee vandu vafo. 10Miri yafo meele yammba kasa koomu, Sioni, kwammba kasa, Yerusalemu yanrumaka. 11Mmba yeeru sheele shisha, kundo vekwarafumyaa vande veru, kwa nrumatwa mmuro; findo fyeru fyoose fyesennyi miso fyanlyamarika. 12Mmbo kukwimaa kulalole mbony eti, yewe Nndumi Iruva? Mmbo kumalallyaa na ilulyilyisa deny?
The Holy Bible in Kimashami © Bible Society of Tanzania, 2016.