ISAYA 61
61
Mbony shaantu ta ukiro lwa Yerusalemu
1Mumuyo wa Iruva, we Nndumi Iruva ni uwe yakwa, mashika Nndumi Iruva aleshaamba mafura, shindeongoya yewo vaale nrumi ya nsia; kashiruma shendevavara yewo vammuuta-pa, ivia mashinga mmbo allekwa ulaalu, na yewo vafinge mbony ta iporomuwa lyawo. 2Yaamba mwaaka wa Nndumi Iruva ukemwiirikye, na nkonu wa itaiya kiduva wa Iruva weeru; iviiryaa muu woose vakeeiya. 3ivavasya yewo wakeiya va Sioni, vaniingwa ureto lwa fivaro ando a ifu, mafura a ifura ando a ikapa kiiyo, isarya lya utori ando a irovywa nriminy; vedimi ivaangwa miri ya usumanu ilevakywa ni Nndumi Iruva, naambo naarafumwa. 4Nawo vatanaa ando kwa kasha, kulelyamarwa, vasaleese ando kwekee ukiva kasha, wasongosye miri ilelyamarwa, ando kulerewa ni marika na marika.
5Na veny vasalalaa na iisa maronda any, na vandu va masanga engyi vave varemi vany, na veelola misabibu yaany. 6Indi, yeni mmbo muvaangwa makohani va Iruva weeru, mmbo mulyaa umasi lwa masanga, na iitikisa usuri lwawo. 7Ando a sony tany mmbo muwonisaa kavii, na ando a usutu vafuryaa ekyo kikwaani nawo, naasany efo urukeny kwawo mmbo vashillyaa kavii, ifura lyawo ni lya llung'anu. 8Mashika yeny Nndumi Iruva, mmbo shikunndye uleti, mmbo shisuye unyinyi na ukasha; na yeny mmbo shivataa kya mashora awo kya dede, mmbo shivikaa nawo kyaasa kya llung'anu. 9Na ufyari lwawo mmbo lumanyikaa masangeny na ngyeeri tawo nnang'ani a vandu; yewo woose vavalollyaa mmbo vavikaa ukureekyi sheelyi wo ni ufyari luvikywa mbora ni Nndumi Iruva.
10Mmbo shifuraa nnu na Nndumi Iruva, nrima wakwa ukesaa kya Iruva wakwa; mashika masara a ukiro, ansikya na isarya lya usumanu sha nndumi wa walyi akekushopa na usha lwa masara a walyi, na mwalyi mwaalyikwa akekushopa na findo fya saabu. 11Mashika shaasa uruka lukeemya myooro ya vayo, na shaasa bustani yammya findo filevakywa nnang'ani ya vayo ni indo Nndumi Iruva amiisa usumanu na utore mbee ya masanga moose.
The Holy Bible in Kimashami © Bible Society of Tanzania, 2016.