ISAYA 59
59
Mwiawuya fisuku autya uvingo makasha a vandu
1Lola woko lwa Iruva llulekwaanguya-fo, luledimi ikira; nta kuri kyakwe nshi karoo-fo, kilaidimi iita, 2indi maravi any ammurauwa na Iruva waany, ngyulyamari tany tansuruma kisangu kyakwe mulakillolye, nta nnyakundye iita-fo. 3Mashika maako any anreveeswa nsamu, na mini yaany yanreveeswa ni uravi; firomu fyany fyammaamba wongo, ngyulumi tany tanrera ukasha. 4Nkwiifo akevesa kindo kya usumanu-fo, nta nkwiifo akeyaamba dede-fo; mmbo vavikyensia findo fya ntambo, vakeyaamba wongo, ikufinga lyawo llya mavina, na iira ulyamari. 5Mmbo vakevika mapore a shoka titiri suumu, vakaoka mbivi ta mbuu mbuu, yeto alya mapore yoo awo mmbo afwaa, na yelyo lyaparika lyikaukafo shoka. 6Mireiyo yaawo nnyivaa soori-fo, nta mashora awo nnyashidimaa ivasikya-fo; mashora awo ni mashora a uravi, na mashora a kiila mmbo akee maakony awo. 7Marende awo mmbo akerishya makasha, nawo mmbo wakerishya ileta samu ilatiri mbese, makusaro awo ni makusaro a ulyamari; ukiva na urumato mfyo fikelollywa efo shieny tawo shilangari. 8Mmbeeshi shia ya urilalyi-fo, mmbalesongosya shia tawo shikasha nkwiifo usumanu-fo nkwiifo nta umwi ashiiraa nnang'ani yaawo awonise urilalyi tara-fo.
Vandu Vakurya kya Ulyamari Lwawo
9Kweekyo usumanu mmbo lukee kwaasha deny na yese. Yese mmbo lukee vana va sa indi ireema lyikalurovya lwiishi mmbo lukee vandu va sa ate mmbo lukee ireeminy. 10Mmbo lukeasharya isimamba sha mfu miso, yee, lukaasharya sha vandu valatiri miso, lukauta-u nsindara kyeeri kya nsanyiny, kyikava sheelyi ni ifishi lya ngama, nnang'ani ya yewo varavi mmbo lwawa sha vandu vafu. 11Yese loose mmbo lukeyora sha ifisi lya ngoroshony; mmbo lukekapa kiiyo sha mbeta, mmbo lukundye ilollya usumanu indi lwiifo-fo, na ukiro mmbo lwava kwaasha neese. 12Mashika ngyulyamari teru taengera iva shiingyi mbee yafo, na ngyulyamari teru mmbo tikelukureekya to sheni uwe yeeru, mashika maravi eru mmbo luryani nang'u, na makasha eru luyeeshi; 13shaasa lulelyamara na ilema Nndumi Iruva, na shaasa lulealashika lulalatye shia ta Iruva weeru, lwiirera mbony ta uriiti na ilema, ikusara mbony ta wongo na ityuuta nriminy. 14Na uvingo lwammalashika lukawuya numa, na usumanu lukakaa kwaasha-deny; mashika dede yammbwa efo shieny shiniini ya mbasaro, na wiindi llulolywaafo-fo. 15Yee, udede lwammaangwa-deny, na yeto alakana na uravi kava mfungwa;
Nndumi Iruva Adeesya Ivauwwa Vandu Vakwe
Nndumi Iruva kalollya indo, kasua kimaruma kuleefo usumanu.
16Kalollya sheelyi nkwiifo nndu-fo, kating'wa elyi kuleefo nndu mwiterevya; naasany woko lwakwe muni llo lulemmweengye ukiro na usumanu lwakwe llo lulemweekya. 17Karaa usumanu sha mbafu ya minya ya ikuringa kyeeri kya fira na kofya ya ikuringa nrweny mmbwakwe kakuvika masara a ukiduva sha masara akwe, nawe kavikwa kififi sha ikoti lyakwe. 18Shaasa mashora awo akai ni indo-da vatawaa, unyaasi kwa yewo wakeenlema, nataiye vakiduva vakwe; nawe aviiryaa maruva weesi lwa vayo. 19Naasany, vasheruuyaa irina lya Nndumi Iruva uka taari ya nkwaany, na usuri lwakwe uka taari ya ngama, mashika mmbo ashaa sha mura wiishwe, wiisheetwaa ni mmumuyo wa Nndumi Iruva. 20“Na mwikira ashaa Sioni, kwa yewo wara kiila kyawo efo kwa Yakobo, ni Nndumi Iruva aamba. 21Lyingyi kyuuka na mbony takwa, ekyi nkyo kyaasa kyakwa nawo, ni Nndumi Iruva aamba; mumuyo wakwa ukee uwe yafo, na marero akwa shileavika kaniny kyafo, nnyashukaafo-fo, nta kaniny kya vana vafo ao washuku wafo-fo, ni Nndumi Iruva aamba, uka ulaalu fika llung'anu.”
Currently Selected:
ISAYA 59: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.