ISAYA 5
5
Kyiimbo kya nnda wa misabibu
1Arannya shiimbe kyiimbo kya nkunde wakwa,
kyiimbo kya nnda wakwe wa misabibu.
Mbuya yeu wakwa mmbo etiri nnda wa misabibu uwe ya kidooro kitiri uteeri usha.
2Karema kisha kautokopa koommbyaa mawe moose,
Kavaa-fo misabibu ikee misauwe kisha,
nnang'ani ya nnda ulya katana-u nganga ya iringa nnda ulya wakwe;
uwe ya kidooro kyaasha.
Kasuma kirori kyeevekkya mfinyu.
Naasa kavereya nsabibu wakwe uvike ndunda.
Indi wo nsabibu ukavika ndunda tidooka.
3Ulaalu mbuya wakwa mmbo aamba indi;
“Yeni, vandu va Yerusalemu na yeni mukee yefo Yuda,
mmbo shamutereva murumbwe shila nnang'ani yakwa na nnda wakwa.
4Shivieny, mmbo kwiifo kindo kulore shiletannya nnda yeu?
A kyimaruma nkyokyi ulemi ishivikya misabibu
ilya sheevikye nsia lyikasheshivikya misabibu idooka?
5Ulaalu shimuvia kindo shikeendetannya nnda yeu wakwa wa misabibu,
Mmbo shisammbwa uvaarye nato ushelyamarwa
shiwunndwe isimamba lya vayo,
nato ushekakashywa sumbai.
6Mmbo shiwiisityou,
nshiuvyaa maramba nta nshiuremmya-fo.
Mmbikiri na miinga tishemyaa-fo.”
7Nnda wa misabibu wa Nndumi Iruva wa matorito, ni vana va mmba ya Israeli,
na misabibu misha ikeemivaakye-fo ni vandu va Yuda.
Nawe mmbo evikye nsia vatani fya usumanu,
indi wo vakapuswa samu ta vandu,
mmbo evavikye nsia vatani fya urilalyi,
indi vandu vakakapa kyiiyo kyeelyiswa ukyiva na yiimwa usumanu lwawo.
Kya ulyamari nndu atannyi
8Woshi lwa yeni mushuura mmba uwe ya mmba, mukatira fyaamba na fyaamba, kutani wo ando kwaishurwa mmba, nta kulawonike ando kwedoshya nni, kwatira yewe kuleefo mwaanya wa nndu ungyi. 9Mmbo sheeta Nndumi Iruva wa matorito aamba, “Ni kya dede, mmba tingyi mmbo tirewa marama, mmbo shisha ting'ani tilatiri vandu. 10Nnda wa misabibu wa eka ikumi mmbo lyikamwaa lyita nyanya-nsi ta mfinyu; ashuululaa kilo ikumi ta fimu.” 11Woshiny lwa valya valava ngama shuru irishya inangwa, vani deny kutani kio nanng'ani. 12Yefo mikonuny yaawo yeefura nkuwiika-fo filimbi, sese, marimba, fivale na wari-fo. Lyo mmbakeesara kya mashora a Nndumi Iruva yoo akeetana na maako akwe-fo. 13Kweekyo vandu vakwa mmbo vakamarwa mifungwa kyimaruma kya utondo lwawo, vandu vany va-tokyi m mbo vafwaa ni shaa, na vandu maata vawaawa ni nyura.
14Mmbo vakeevereywa kwa uroo uniini efo kwa varumu, veambirye kana fika yuunduny. Masiingo a vandu sanda na vandu va mwiina va Yerusalemu mmbo vakeyaanga nafo makamba kwa makamba, na valya vengyi woose vakee ifureny. 15Vandu woose mmbo vashesukaa na valya vatiri kyiila mmbo vashemalalyiswaa. 16Indi Nndumi Iruva mwi ya mashora a usumanu kwa vandu vakwe-le mmbo ashewoora usumanu lwakwe na weele lwa mitannyi yakwe. 17Nafo mmbo kushevaa mbata kundo kweiisa findo fya mmba, moonri, mburu na ng'umbe.
18Woshiny ni lwawo, valya vakeeruffwa ulyamari lwawo na fyoove mashika vanlemwa ikwaattwa ngyulyamari tawo. 19Mmbo vakeyaamba, “N-lekeyeny naangusye irunda, aitike irunda mashora yoo akwe, naambo neese lulollye; ra Iruva mweele wa Israeli ainutye mashora akwe, naambo neese lumanyi ekyo akusarye.” 20Woshiny ni lwawo! Valya vaamba, ukasha ni usha na usha ni ukasha, valya vavika ireema ando a sa na sa ando a ireema valya vavika n-dooko ando a wukyi na wukyi ando a n-dooko.
21Woshiny ni lwawo, valya vakulollye wo ni vandu vatiri urango, yee urango uniini nnu. 22Woshiny ni lwawo; valya veeshi inangwa kilanya, vandu veeshivye isasanda wari unangaa. 23Woshiny ni lwawo; valya veewarya findo fya kisurukumu, naambo varete usumanu lwa nndu.
24Ndesa kipala-pala kya muro kyamamita mamburu moomu, ndesa mare moomu amamikaa kipala-paleny kya muro niindo miraari ya-vayo ishekooya ipwaa na fivaro fya-vayo fishevivittwa uwe sha kiluulyi kimaruma elyi vaimmbwa ivavaso lya Nndumi Iruva wa matorito, vakamina wiikyimbi lwa yeto mweele wa Israeli. 25Kwekyo Nndumi Iruva karooywa nngoo kya vandu vakwe. Kaorrwa woko lwakwe kavarikya ngapo ing'ani, vakakapwa na mafumbu akaringina na minying'a yaawo ikakwaana yefo shia koose sha kirashi. Naakwa ni indo nta nyashi yakwe nnyileoloka-fo, keengera ngapo uwe yaawo.
26Nndumi Iruva kasinnya vandu va masanga a kwaasha,
kavakapya mwiiri vandu wooka ngyuruka tingyi,
nawo vakakwiipo vakaafukya veerishaa!
27Mmbakeyaaraa-fo nta ikapa urende-fo
mmbakeerengeya nta ilala rony-fo
nkwiifo ngomita ileporumuka nta nruu ta fyaaru iporumuka-fo.
28Mife yaawo mmbo ikee myoovi nnu,
na ura lwa vayo llwammaa ilemywa
mbungashu ta frasi tawo mmbo tikee shuumu sha mawe,
na fireto fya vayo fikarunguka sha uraato lwa kitita-si.
29Vasikari vawo mmbo vadinaa sha miiso,
mmbo vadinaa sha miiso tantira mireiyo yaawo,
neendesuruma kwaasha ando valashiidimaa isokwa.
30Nkonu yeto mmbo vadinaa kwa vana va Israeli
sha yoona lya yeeve ikeeyalaluka-laluka,
yeto alolaa uruka wuumu mmbo alollya ireema na ukyiva,
mwi mmbo usikywaa ni ireema.
Currently Selected:
ISAYA 5: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
