ISAYA 39
39
Warumi vauka Babilony
(2 Vam 20:12-19)
1Fyeeri filya, mangyi ya Babilony we Merodaki-baladani, mwana wa Baladani karikya Esekia barrwa na findo fya pya, kimmba emiita sheelyi elwee na ulaalu ammeshya. 2Esekia kafura, kaora vandu valya mmba yakwe na findo fyakwe fyoose; nafyo fyeekee ni findo fya uuru uniini sha mafura, saabu, manemane na fesa. Kavevaora na mmba titiraa fisha fya fira na fyoose eetiri. Nkwiifo kindo kyimwi yefo mmba yakwe na urukeny lwakwe kulaore aleora veny valya-fo.
3Naasa nkisuku Isaya kaengya mangyi Esekia kammbesa, “Andesa vandu eva mmbo vaamba inda? A nkwi valeuka vakasha kwafo?” Esekia kaamba, “Vandu mmbaleuka kwaasha; valeuka Babilony.” 4Isaya kavesa, “A ndesa nkyokyi valelollya kunu mmba yafo?” Esekia kaamba, “Mmbo valelollya findo fyoose fya kunu kwakwa; nkwiifo kindo kulaore shilevaorafo.”
5Naasa Isaya kavia Esekia, “Arannya kirero kya Nndumi Iruva muni matorito. 6Lola mikonu isheshaa, fyindo fyoose fya mmba yafo, naakwa ni yefyo vamiku vafo veesurumyi kutani kwafika inu, fisheipowaa firawo Babilony; nkwiifo kindo kishesaau-fo. Ni Nndumi Iruva arera. 7Naakwa ni vana vafo kumuni na yewo vasheonikyaa kwafo vasheipowaa vandeva mashinga efo mmba ya mangyi ya Babilony.”
8Naasa Esekia kavia Isaya, “Kirero kya nndumi Iruva kwarera ni kisha, mashika nnyalekusara nkushekaafo ufoo fyeeri fyakwa yeny.”
Currently Selected:
ISAYA 39: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
