ISAYA 36

Vaashuru vaerese Yerusalemu

(2 Vam 18:13-27; 2 Fye 32:1-19)

1Wiikee ni mwaaka wa ikumi na kaana wa ushilyi lwa mangyi Esekia. Senakeribu mangyi ya Ashuru kashekabana na miri myoose ya Yuda ikee miringitye ni isimamba; kaivinga. 2Mangyi ya Ashuru karuma ironda iniini lyuuka Lakishi vakafika Yerusalemu kwa mangyi Esekia. Nsongoru wa ironda lilya kasalala ando a kidooro alya maavyony a shia. 3Kasha nau Eliakimu mwana wa Hikia, ulya ekee mwiisalallya mmba ya mangyi, na Shebna, mwiireiya mbony, na Yoa, mwana wa Asafu, ulya ekee mwireiya fyeeri. 4Nsongoru wa fira Rapishake kavavia, “Enndeny, vieny Esekia mangyi nniini, mangyi ya Ashuru aamba indi. 5A ndesa nkyokyi kukusirye kwakara ishiteenda. 6Lola nkukusirye irere ifwafwa, llyo Misri-llya nndu moose kakusiika nalyo lyishendoshaa ni indo akee Farao, mangyi ya misri kwa yewo woose vammbikye nsia.”

7Kyeendi kwashivia mmbo kuvikye nsia Nndumi Iruva, Iruva weeru, a ndesa nshi we ulya mangyi Esekia alefwafwala ando alya eele eterevya emuviaa, eni vandu va Yuda na Yerusalemu musheterevyaa ando a eele? 8Naasa nkyeni mwiiranyi mangyi yakwa ya Ashuru naambo shimuniinge frasi ta fira fiku fivii kwakooya mutiri vandu vesaama frasi eto. 9A ni inda kushiidimaa ilema yaarannya nnrumi ya nndundi wa mangyi yakwa kukusirye frasi na makari a Misri? 10A mmbo shilesha yaa ikabana na imamita ando yaa kulaore shammbesa Nndumi Iruva? Nndumi Iruva ni we ashivia shishe ishekaba muri yeu na iumamita.

11Naasa Eliakimu mwana wa Halkia na Shebna na Yoa vakivia nsongoru ulya ekee rera, “Woi-dwa rera na vandu ewo vafo kwa kishomu kya Kiashuru mashika yese lwiishi kishomu ekyo; nta kularere neese kishomu kya Kiyuda-fo naambo yewo vakee numa ya isimamba valashe iitya.” 12Kya indi nsongoru ulya wa vasikari valya kavavia, “A nndumi wakwa mmbo ashiruma kwa nndumi wafo na kwafo yewe shirere yoo? A ndesa nnyaleshiruma kwa vandu yewo vasalalyi efo isimambeny naambo valye maando awo veni na ina mavaamu awo kyimwi na eni?” 13Naasa nsongoru ulya kasalala kaongora kwa kishomu kya Kiyahudi kaamba, 14“Aranyiny kirero kya mangyi ya Ashuru, mmbo aamba endi, ‘Esekia nalamulembe mashika nnyashiidimaa imukira-fo.’” 15Nta mulare Esekia namukaarise kya ikusirya Nndumi Iruva eshambaa, “Ni kuti Nndumi Iruva ashemuringaa na muri yeu mmbushemamitwaa ni mangyi ya Ashuru-fo.” 16Mulashe yaarannya mangyi Esekia, mashika mangyi ya Ashuru aamba, kuryeny, muruuye ufoo na yeny. Oshony mushelya wo nndu misabibu yakwe muni na ntini vakwe muni; mushena mura wo nndu uuka efo kiroriny kyakwe. 17Kutani shasha ishemoondwa na imurwaa urukeny luvakye lwany; lutiri shoonga na mfinyu. 18Loleny Esekia nalamulembe eshambaa, “Nndumi Iruva ashemuringaa.” Ndesa mmbo kwiifo maruva alemmiidima iringa vandu kyuuka na maako a mangyi ya Ashuru? 19Nkwi akai maruva a Hamati na a Arpadi? Nkwi akai maruva a Sefavaimu? A ndesa valeidimi ikira Samaria uka maakony akwa? 20A ni maruva angaa alemmidima yauwa vandu vawo kyuuka na maako akwa naambo Nndumi Iruva naidimi ikira Yerusalemu uka maakony akwa? 21Kya indi vandu valya vakamalallya sau, nta mbalerouwa kindofo, kimmba kyekee ni uvavaso lwa mangyi sheelyi valarouwe kindofo. 22Llyo, Eliakimu, mwana wa Hilkia, mwiisalallya mmba ya mangyi, na Shebna, mwireiya fyeeri vakeenda kwa Esekia, Soori tawo tikee firami vakammbia marero alya a nsongoru wa vasikari we Rapishake.

Currently Selected:

ISAYA 36: MAS2

Highlight

Copy

Compare