ISAYA 3
3
Ngusanu efo Yerusalemu
1Ulaalu! Nndumi muni finya, Nndumi Iruva wa matorito, mmbo akeesheya Yerusalemu na Yuda ashekamara-fo wo kindo ekyo nndu eevikye nsia. Mmbo akeendevasoka shoonga tawo na mura wawo. 2Vandu masiingo na veekapa-fira vawo, valeti vawo na veawuya fisuku vawo, veelafya vawo neewo veevavikye nsia. 3Neewo vavavikye nsia vandu veekapa fira vasongoru, veesalallya uruka, na valya vengyi woose vakusarye mbony ta usavi. 4Nndumi Iruva mmbo asheniinngya muumu wa ishinllywa ni vana vadu, 5wo nndu mmbo ashetirya ungyi kyiila, valya vadu mmbo vashesela valya vavasongoye, vandu va tangalu vashesela na yiipala vasongoru vawo.
6Kusheshaa kyeeri vandu va ufyari, vashekwiipo vasauwe umwi waawo, vashemmbya, “Yewe ni kyeni kutiri soori ya iraa, kweekyo mmbo lwakusauwa yewe kusheva nsongoru weeru kyeeri ekyi kya ngusana.”
7Nawe llyo asherouwa naambe, “Oode! Nshi yeny-fo nshitiri wiidimi lwaimweekya-fo. Nshitiri soori nta shoonga-fo, kweekyo mulashaallwe nsongoru waany-fo.”
8Mashika Yerusalemu yankapa urende na Yuda yammbwa, mashika mirerye na mitannyi yaawo mmbo ikee kilasha kya Nndumi Iruva, mashika kuleefo weerei mmbo vakeetatala Iruva. 9Ulyamari lwawo mmbo lulollywa na paa. Mitannyi yaawo mmbo ivakye ilya ya vandu va Sodoma; nta kuleefo ikusuruma. Oshiny llwa vandu yewo, mmbo vakweenngyemisindara wo veni.
10“Yewo vasumanu mmbo vashevaa na nsia, neefyo fyoose mmbo fishevaa fisha, nawo vasheiiluula neelya ndunda ta mashora awo.” 11Indi washi ni lwawo, “vandu vakasha, filya valetannya vengyi, mmbo vashefitannywa-wo.”
12Valya veeyakuya fesa, mmbo vakeesya vandu vakwa, neewo vatiri sie tawo mmbo vakeevalemba. Yeni vandu vakwa, yewo vakeemusongoya mmbo vakeemureta shia, naambo mulamanyi kundo kwaiindukya nafo.
Nndumi Iruva Arummbwa mwaandu wa vandu vakwe
13Nndumi Iruva mmbo ammesalala naambo arere mwaandu wa vandu vakwe. 14Nndumi Iruva amuvaanga mwaanduny na vasongoru amwi na vashilyi valya veeketetera vandu vakwe naambo akooye ivarumbuya mwaandu, “Ni yeni mulelyamara irema lya misabibu na masaa a vandu vaturi ni yefo mmba kwany akee masangirye. 15A mmbo kyaamba-kyi, elyi mwalamya vandu vakwa neevasoka masaa awo, vandu vafwafwa valatiri kindo! Ni yeny Nndumi Iruva wa matorito shamuvesa.”
Wiikyimbi kwa vaka va Yerusalemu
16Nndumi Iruva aamba, ankyelola vaka yewo va Yerusalemu ndesa veefo vekushopaa! Vesheenda veipoiyo singo tawo uwe veereveta miso awo a lango sheesi taari na taari vasheenyellye veere fishingele yefo marendeny awo. 17Yeny mmbo shivarikya ngapo, shiwoote fii nrwe vaka yewo va Yerusalemu shivare fipalala.
18Kukeesha nkonu Nndumi Iruva ashesoka vaka yewo findo fyoose vakekwiishika nafyo ni fishengele, mangeeto na mise. 19Naakwa ni ngomita yeto vakufingye mmbo vashesokwaa. 20Neefyo vakufingye fisiny, varee nrrweny, maakony neefyo fyoose vafivikye nsia, mmbo vashesokwaa; 21na rashi yeto varee efo mininy ya maako neefo mmbweny, 22masara awo mesha eto varee, saa ta wokony na mboloko varye. 23Findo fingyi fyoose fyeeraa efo mwiiliny fitambaa fya mbolokony, fya yoososya singony neefyo fyeefinngya nrrweny. 24Ando afwaamaa, mmbo varraa kiraa, ando efinga kimaakova kisiny, mmbo vafingaa makanda a miri, ando eeva na fii shimamiri nrweny mmbashevaa kipalala nrrweny, ando eeraa soori mmbo vasheraa marattwe. Usha lwawo mmbo lushevaa usutu!
25Vandu va muri woose, naakwa ni valya vatiri finya nnu, mmbo vashewaiywa fireny. 26Ngiri ta muri mmbo tishesokywa na kiiyo na muri ushevaka nka akee mwammbwe soori mbereto mbee ya vandu
Currently Selected:
ISAYA 3: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
