VAGALATIA 3
3
Iirikyo ao Uvavaso
1Yeni Vagalatia mulatiri urango, a-mmbi alemulyamara mirwe. Yeni muleongoywa paa mbony ta Yesu Kristo sheelyi mmbo alekapywa nsalabeny? 2Ni kindo kimwi nsi shikundye ikimanya kwany. A-ndesa mmbo mulewarya Mumuyo kyuuka na mashora a nndu, ao nkimaruma kya iita yelyo lyileende kikusiryo? 3A ni indii mulerung'ana indi? Mwammaa ipooka na Mumuyo, ulaalu mmbo mukundye ifurummya na findo fya mwiili? 4A-mmbo muleera fyuureny efyo fyoose kisheva kya ruu? A-mmbo kishevaa kya ruu dede? 5Naasany yeto mwimuniinga Mumuyo na irunda mashora maniini nnang'ani yaany mmbo atana indo kyuuka na mashora a mwiili, ao nshi kimaruma kya iita elyo lyishendee kikusiryo? 6Nkimwi sha llya Abrahamu aleirikya Iruva kaeekennywa usumanu.
7Kyasia manyiny sheelyi valya va kyikusiryo mmbo vana va Abrahamu. 8Mareiyo nang'u shaasa aambaye uka elyo sheelyi Iruva mmbo asheekennyaa vandu va masanga usumanu kivaukya efo kikusiryony, mareiyo mmbo alevia Abrahamu Nrumi ya Nsia elyo kasha, kyeyaamba, “Vandu va masanga woose mmbo vashevikywaa mbora yoo kwafo.” 9Naasa yewo va kyikusiryo mmbo vavikywa mbora ando amwi na Abrahamu yeto etiri kikusiryo. 10Mashika valya woose vakeetana fya uvavaso, mmbo valamywa-si nkidengo, mashika nkyireiye indi, “Yeto moose nalawarani na efyo fyoose fikee efo uvavasony nafiinutye mmbo akee n-denge.” 11Nkyo kyaambany nkwiifo nndu asheekennywaa usumanu mbee ya Iruva kyuuka na uvavaso-fo, mashika yeto wa usumanu mmbo ashekaa na muu kimaruma kya kikusiryo. 12Na uvavaso lluleendwa nkikusiryo-fo, kyaindi mwiitana indo mmbo ashekaa na muu kimaruma kya vayo. 13Kristo mmbo aleluwouwa luuke kidengony kya uvavaso, mashika mmbo alealuwa kidengo kimaruma kyeru, mashika nkyireiye kikaambawa, “Yeto moose avanikwa nri-u mmbo akee n-denge.” 14Naambo mbora ya Abrahamu ikooye ifikkya vandu va masanga kwi Yesu Kristo, naambo luwarye kyaasa kya Mumuyo lwikee na kikusiryo.
Uvavaso na Kyaasa
15Vanavama vakwa, mmbo nkeerera sha nndu wa vandu. Na kyikava ni kyaasa kya nndu, lyo kyikammaa ivangiswa nkwiifo nndu akiminaa-fo ao nta yeengerya-u kindo-fo. 16Fyaasa efyo mmbo fileniingwa Abrahamu na mwana wakwe. Nkyaambawa nkwa vana sheelyi mmbo vakee veengyi-fo; kyaindi nkwa umwi, kwa mwana wafo, nawe ni Kristo. 17Ekyo shiifo nshambaa nkyo ekyi, kyaasa ekyo mmbo kilevangiswa mbele ni Iruva, uvavaso yelo lulesha ando a myaaka mayana aana na makumi araru lluleidima yaalasha-u kindo-fo ao ikiuta-u-fo. 18Mashika kwakooya ding'u mmbo yasha na uvavaso, nnyikivaa ya kyaasa-fo, kyaindi we Iruva mmbo alesimba Abrahamu efyo emmbikya kyaasa. 19A-uvavaso nkyokyiny ndesa? Mmbo luleendwa kimaruma kya ukasha lwa vandu kutani asha yeto awonikye kawarya kyaasa ekyo, kyikee kyeende ni nsu wa Iruva akee nrumi nasheamba. 20Na yeto akee nrumi nshi asanda kimaruma kya nndu umwi nsi-fo, lyo yeto akee umwi ni Iruva. 21A-ndesa uvavaso mmbo lulariani na fyaasa fya Iruva? Oode, mashika kukooye lweeningywaa uvavaso lushendee muu, naasa usumanu mmbo lwewonikaa lweendwa ni uvavaso. 22Kyaindi mareiyo mmbo alesandya fyoose na ifivika finyiny ya ulyamari, naambo yewo vakusirye vaniingwa kyaasa ekyo vekutiri efo iirikyony lya Yesu Kristo.
23Lyo kulaore kyikusiryo ekyo kyensha mmbo lwekee si ya uvavaso, lukalamywa si kutani iirikyo elyo lyilesukuwa paa. 24Kikeeny indo uvavaso mmbo luleva sha nteteri wa ilurwaa kwa Kristo, naambo lusheekennywa usumanu kyuuka na kikusiryo. 25Lyo kwankooya kyikusiryo kyansha, llukyikee-se maakony a nteteri-fo. 26Mashika yeni moose mmbo mukee vana va Iruva kyeendwa nkikusiryo kwi Yesu Kristo. 27Mashika yeni moose mulebatisyo irina lya Kristo mmbo muree Kristo. 28Na yoo nkwiiyo Myuda nta Ngriki-fo. Nta nndu lleke na nndu ishinga-fo. Nta nkwiiyo nndu nndumi na nndu nka-fo. Nnyelyi yeni moose mwammba ngata imwi mukee va Yesu Kristo. 29Na kimmba mukee va Kristo, naasany mmbo mwammba ufyari lwa Abrahamu, na veni ding'u shaasa kyaasa kilya kyikai.
Currently Selected:
VAGALATIA 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
