ESRA 8

Vandu valewuya wooka usamirony

1Yeva ni vasongoru va mmba ta vandeye wo na ngyufyari ta woose valya valeuka Babilony amwi na yeny kyeeri kya ushilyi lwa Artashasta. 2Gerson wa ufyari lwa Finehasi, Danieli wa ufyari lwa Itamari, Hatushi, wa ufyari lwa Davidi, 3ekee mwana wa Shekania. Sakaria wa ufyari lwa Porosh, amwi na womi iyana na makuni araanu wa ufyari lwakwe valereiywa amwi. 4Elie-hoenai mwana wa Sekaria, wa ufyari lwa Pahat-moabu, amwi na womi mayana avii. 5Shekania mwana wa Yahasieli, wa ufyari lwa Satu amwi na womi mayana araru. 6Ebedi mwana wa Yonatan, wa ufyari lwa Edin, amwi na womi makumi araanu. 7Yeshaya mwana wa Atalia, wa ufyari lwa Elamu amwi na womi makumi mfungare. 8Sebadia mwana wa Mikaeli wa ufyari lwa Shefatia amwi na womi makumi nyanya. 9Obadia mwana wa Yehieli wa ufyari lwa Yoabu amwi na womi mayana avii ikumi na nyanya. 10Shelomiti mwana wa Yosifia wa ufyari lwa Bani amwi na womi iyana na makumi arindaru. 11Sakaria mwana wa Bebai wa ufyari lwa Bebai, amwi na womi makumi avii na nyanya. 12Yohanani mwana wa Hakatani wa ufyari lwa Asgadi amwi na vandu iyana na ikumi, 13Elifaletti Yeueli na Shemaya wwaufyari lwa Adonikamu amwi na womi makumi arindaru (yeva mmbo valewuya kyeeri kya numa), 14Utai na Sakuri, va ufyari lwa Bigwai amwi na womi makumi mfungare.

Esra aruuya Valevi va irunda efo mmba ya Iruva.

15Naasa shasanyirya vandu woose alya mfony ulya weendaa muriny wa Ahava lukamannyau ulale ando a mikonu iraru, shavalola-lola, vandu na makohani veeiyo, lyo nshilelolya-u vana va Levo-fo. 16Naasa llyo shilerumya Elieseri rumi, na Arieli na Shemaya na Elinatani na Yaribu na Elinatani na Natan na Sakaria na Meshulamu, vandu vasongoru, na Yoyaribu na Elinatani wo mmbo vekee veelosha vawo. 17Shavaruma kwa Ido ulya nsongoru kulya Kasifia, shavavasya kindo vandeviaa Ido na vanavamaye yewo varundi va mmba ya mwiindye naambo valuwonisye vandu efo Kasifia vashefurukanyaa mmba ya Iruva. 18Na shaasa Iruva alelusongoya, vakalurikya Sherebia nndu araiye urango Mlevi wa efo kwa vana va Mali akee mwana wa Levi wa Israeli na Sherebia ando amwi na vana vakwe, vakava woose ni ikumi na nyanya. 19Na valelurikya-se Hashabia na Yeshaya nawo ni va ufyari lwa Merari na vana va maye woose ni vandu makumi avii. 20Mmwasi ya yewo, kweifo vefurukannya mmba ya mwiindye mayana avii na makumi avii vekee mmbo vasaoye vawo vensawuwa ni mangyi Davidi sha ngyama takwe yyeekya Vlevi. Marina yeva woose akeemareiye.

Esra atetera Vandu itereva neekootoya

21Naasa llyo shilevavasya wo umwi weeru nakootoye alya mfo wa Ahava lukunyiise mbee ya Iruva, lusumanise shia teru yese na vana veru ando amwi na findo fyeeru fyoose. 22Mashika mmbo shilelollya sony itereva mangyi naluniinge vasikari na veesama frasi veluringa vakiduva efo shia, mashika shemmukureekya sheelyi, “Iruva weeru mmbo aringa woose yewo veembika nsia, neesua yewo valankusirye.” 23Nkyon lukakootoya lukatereva Iruva weeru, nawe kalwaaranya fiterewo fyeru.

Findo fya pya fya mmba ya mwiindye

24Naasa llyo shilesauwau vasongoru ikumi na vavii va vakohani, nawo ni Sherebia, Hashabia na vengyi ikumi va mmba yaawo, 25shaveesya fesa tilya na saabu na fiiya filya na firaso fya mmba ya Iruva mfyo fileutwa mmangyi na vandu vakwe sanda na Israeli woose. 26Shaveesya tani makumi avii na ivii ta fesa, fiiya iyana fitiri kilo makumi mfungare na saabu kilo fiku firaru na mayana aana, 27na fideeva makumi avii ta saabu kilo nyanya na fiiya fivii fya minya ya arera imikaa, itiri wuuru sha saabu. 28Shooka-fo shavavia, “Yeni mmbo mukee veele va Nndumi Iruva na fiiya yefyo nkiwo mmbo fikee fyeele. Na fesa na saabu mfindo fileutwa fya pya kwa Nndumi Iruva akee Iruva wa vandeye vany. 29Kyasia fikallyeny nisha kutani mwashefyeesa mbee ya vakohani na Valevi na vasongoru va mmba ta vamiku vany va Israeli kulya Yerusalemu efo firyeny fya mmba ya Nndumi Iruva.” 30Nalyo vakohani na Valevi vakaipoo fesa, saabu na fyeese, vakafirwaa kulya Yerusalemu mmba ya Iruva weeru.

Iwuya Yerusalemu

31Naasa lukaipoo kyaaro luuka alya mfony wa Ahava nkonu wa ikumi na kavii wa mwiiri wa mbee, lweende kulya Yerusalemu, nawe Iruva kalusongoya kalwaauwa neewo woose veeluvereye efo shia. 32Lwiikifika Yerusalemu, lukakaafo ando a mikonu iraru. 33Elyi lya nkonu wa kaana fesa, saabu na fiiya, fikeeswa fikarambikyo nkohani Maremoti mwana wa Uria akee amwi na Elieseri mwana wa Finahasi, ando amwi nawo veiyo Valevi yeva, Yosabadi mwana wa Yosua, na Noadia mwana wa Binui. 34Fyoose fileekenwa na yeeswa wo kindo llyony filkareiyo. 35Na vandu valya valeuka usamirony mmbo vasamirwa vakautya Iruva wa Israeli firaso fyeekora na muro, ng'umbe ikumi na ivii kimaruma kya Israeli woose na suva makumi keenda na irindaru na ngurana ta suva makumi mfungare na mfungare, na ndafu ikumi na ivii, five mfiraso fya ulyamari, nafyo ntyekora na muro fyootyo Nndumi Iruva. 36Veekyi valya va mangyi na vasongoru woose va uruka lwa tari ya nkwaany ya mura wa Efrati vakavio shaasa mangyi alevavasya, nawo vakeekya vandu vakoota findo fya yeekya mmba ya Iruva.

Currently Selected:

ESRA 8: MAS2

Highlight

Copy

Compare