ESRA 6

Ishingo lya Koreshi lyakooywa

1Naasa llyo mangyi Dario kauta ivavasyo lya ikutwa efo Ekbatana Babilony efo mmba ya fitabu efo mmareiyo ekee mavike. 2Na kulya Ekbatana muri nniini wa uruka lwa Media kukakooywa-fo kyitabu kikee kireiye:

3“Kwikee mwaka wa mbee wa ushiilyi lwa mangyi Koreshi aleniingya ivavaso lya itana mmba ya Iruva kwa wiiya efo muriny wa Yerusalemu ando kweyuutya firaso, firaso fyekora na muro fyeendwa-u. Waasha lwa yeenda uwe ni mmeta makumi avii na mfungare na ivari lya vayo ni meta makumi avii na mfungare. 4Nayo itire korofa ivii, titanwa mawe maniini, na mboshiki shiiya, Efyo fyoose fitaiyo m-mboloko ya mangyi. 5Na fiiya filya fya saabu na fya fesa fya mmba ya Iruva, filya mangyi Nebukadresa alefyuuta kulya mmba ya mwiindye ya Yerusalemu kafyeende kunu Babilony fiviirwa findevikwase efo mmba ya mwiindye efo Yerusalemu, wo kimwi kiwuye ando kwa vayo: yewe kumuni kufivike efo mmba ya Iruva.”

Dario avavasa mashora eetikwa Mmwasi

6Naasany yeni, Tatenai, kukee nshilyi wa taari ya nkwaany ya mura wa Efrati na Shetar-bosenai, na wooroye vany mukee taari ya nkwaany ya murawa Efrati. 7Reny ishora elyi lya mmba ya Iruva. Reeyeny nshilyi yeto wa Vayuda na vamiku va Vayuda vatani-se mmba yei ya Iruva yoo uvasheny lwa vayo. 8Na yeny mmbo shaniingya ivavaso inu ekyo mutanaa kwa vamiku yewo va Vayuda elyi mmba yei ya Iruva yiifoo itanwaa-se, muute efo mbolokony ya ushilyi lwa mangyi, usanu elo lwasanyirwa efo urukeny lwa taari ya nkwaany ya mura wa Efrati, vandu yewo vaniingyo fesa toose kuleefo ikyeyo. 9Na wo kindo kyikundikaa, kwakooya ng'umbe ta shau, suva, ao moonri, kwa firaso fyekora na muro kwa Iruva wa ruveeu nganu, na shumbi, mfinyo, ao mafura, fyoose efyo shaasa vakohani va mmba ya Iruva ya Yerusalemu vavavasya, vaniingyo indo wo nkonu kulaifoo iveema. 10Naambo vautye Iruva wa ruveeu firaso fitiri nrungo nsha, veedimi iterevya mangyi na vana vakwe vakee na muu, 11Na lyingyi mmbo shavavasa, nndu yeto ashalashaa ivavaso elyi, nakapyoo uvambony lwa urungo lusomuwaa efo mmbeny yakwe, na mmbaakwe kuve kundo kwa yuumba mbulula. 12Nawe Iruva yeu alesauwa irina lyakwe lyikaae alya, namamite mangyi moose, ao vandu yewo vashealashaa kindo ekyi, ao ilyamara mmba ya Iruva ikee Yerusalemu. Ni yeny Dario shavika ivavaso. Rundeny na sina shoose.”

Mmba ya mwiindye yasamywa

13Naasa kyuuka na irero alerera mangyi Dario llyo Tafenai ekee nshilyi nniini wa uruka lwa taari ya nkwaany ya mura wa Efrati na Sheta-boenai na wooroye vavo vakarunda na sina shoose kilya mangyi Dario alevavasya. 14Nawo vamiku va Vayuda vakatana mmba vakavesyo, kyuuka na ukisuku lwa Hagai na Sakaria mwana wa Ido. Vakamarisya itana mmba kwi ivavasyo lya Iruva wa Israeli na kwa ivavasyo lya Koreshi na Dario na Ahasuero mangyi ya Uajemi 15mmba yei ikamarisyo itanwa kwikee nkonu wa karau mwiiri wa Adari, vikee mwaka wa karindaru wa ushilyi lwa mangyyi Dario.

16Nawo vandu va Israeli, vakohani na Valevi amwi na woose valewuya kuuka usamorony vakava na sukukuu ya isamya mmba yei ya Iruva kwa ifura. 17Sukukuu ya isamya mmba yei ya Iruva mmbo valeuta kiraso kya shau iyana lyimwi, suva mayana avii ngurana ta moonri mayana aana, na kiraso lya ulyamari lwa Israeli shoose valeniiingya ndafu ikumi na ivii shaasa kukee yekena lya ngyufyari ta Israeli. 18Vakavika vakohani ando awo na ivika ukamba lwa Valevi kwa urundi lwa Iruva efo Yerusalemu shaasa kikee kireiye efo kyitabuny kya Mose.

Pasaka

19Kwikee nkonu wa ikumi na kaana mwiiri wa Nisani valya valewuya uka usamirony vakaindya Pasaka. 20Mashika vakohani na Valevi vammaa ikweremuta wo veni ando amwi, woose vakavany veremute. Llyony vakashisha ngurana ya Pasaka kimaruma kya yewo woose valewuya wooka usamirony, na kimaruma kya kyawo veni. 21Mmbo ilelyiwa ni vandu valya wooka usaamirony amwi na umwi enkulunga nawo na ikuuta utefusuny lwa vandu va uruka elo na iinndya Nndumi Iruva, Iruva wa Israeli. 22Vakavika sukukuu ya mikate ilatiri ntarang'o ando a mikonu mfungare vefuraa. Mashika Nndumi Iruva alevaidimisya ifura na yaalasha nrima wa mangyi wa Uajemi ivakunda, kaveekya ishora lya itana mmba ya Iruva, we Iruva wa Israeli.

Currently Selected:

ESRA 6: MAS2

Highlight

Copy

Compare