ESRA 4
4
Valema mmba ya iterevya ilatanwa lyingyi
1Nalyo vakiduva va Yuda na Benyaminy veekiita sheelyi vandu valya valeuka usamirony Babilony mmbo vaketannya Nndumi Iruva we Iruva wa Israeli mmba ya mwiiindye, 2vakasheya Serubabeli na vasongoru va ngyufyari ta vakuu, vakavavia, “Lutani mmba yei loose, mashika naakwa ni yese mmbo lwiinndyaa Iruva sheeni, neese mmbo lumuutyaa firaso uka kyeeri kya Esar-hadoni ekee mangyi ya Ashuru, na mmbwe yeto alelweende yaa” 3Kyeendi we Zerubabeli na Yosua na vasongoru valesa-u va ngyufyari ta vakuu va Israeli, vakavia, “Yeni nkimukooye ilweekya itannya Iruva weeru mmba-fo. Mmbo lutanyaa Nndumi Iruva, Iruva wa Israeli mmba yese luveni, shaasa mangyi Koreshi wa Uajemi aleluvavasya.” 4Nalyo vandu va efo urukeny vakawaa vandu va Yuda nrima, vakavasaerese, vakavaleesa kyeeri vekeetana mmba yeyo. 5Lyingyi vakataa vashilyi va Vajemi vavafulute. Vakatana indo kyeeri kya mangyi Koreshi wa Uajemi, kufike kyeeri kya mangyi Dario.
Valema itana Yerusalemu wiiya
6Nalyo kyeeri kya ushilyi lwa Ahasuero, llyo alepooka ishillya, vakiduva vakareiya mmbony ta uriingi uwe ya vandu va Yuda na Yerusalemu.
7Na fyeeri fya Artashasta, Mitredati, na Tabeeli na wooroye vawo-vesaaye-u vakareiya Artashasta, mangyi ya Uajemi fiidikiro fyakwe, fikareiyo na mireiye ya barrwa yeyo fireiyo fya vayo fyekee fya Kiaramu. 8Na Rehumu nshilyi waawo, na Shinshai, mwiireiya, vakareiya barrwa kwa Artashasta, uwe ya vandu va Yerusalemu ikaamba indi,
9Ni yeny Rehumu, Nshilya nniini, na Shimshai, mwiireiya na vandu vawo, vashilyi va Uajemi, na Vaarkewi, Vababeli, Vashushani, mmbo Vaelamu, 10neewo vengyi valesaafo, valya Ashuri-banipali niini, mwiindyo, alevaruuta kashevavika muriny wa Samaria na kundo kungyi-da, urukeny lwa taari ya nkwaany ya mura wa Efrati.
11Yei nnyo barrwa vandu yewo valerikya mangyi Artashasta na Varundi vafo valya vakee taari ya nkwaany ya mura wa Efrati, vakwiidikira. Na ulaalu 12Mmbo kisumani mangyi namanyi sheelyi Vayuda, valya valeuka kwafo, mmbo valesha kunu kweru Yerusalemu. Nawo mmbo vambooka-se itana wuiya muri yeu llyang'a na nkasha, Mmbo vammaa iveiya uvasha lwa vayo neesaamisa isimamba lya vayo. 13Kyasia yese mmbo lukundye mangyi namanyi sheelyi kwakooya muri yeu watanwa na isimamba lya vayo lyasia itanwa, vandu yewo mmbakiutaa isanu, nta ukamba nta vaavi loose yefo mbolokony ya mangyi-fo, nkuwonika-fo kindo-fo. 14Ulaalu kimmba lukee urundiny lwa mangyi, nta lulakundye ilollya mangyi eturaa wiindi lusumani-u, nkyo kiteve lukaruma rumi ishemanyisya mangyi mbony yeti 15Naambo mbony tisunundo efo kyitabuny kya uramba uka elyo lya vakuu vawo. Llyo kushekooya efo kyitabunyy ekyo imanya dede sheelyi muri mmuri llyang'a utavisaa vamangyi na vashilyi, ukavatannya meesi, na vandu va vayo uka kasha vakarika uriingyi, nkyo kileteva muri yeto ukalyamarwa. 16Mmbo lwavia mangyi paa, kwakooya muri yeto watanwa lyingi na masimamba a vayo akamarisywa efo urukeny lwa taari ya nkwaany ya mura wa Efrati nkuvaa uruka lwafo-se-fo.
17Nawe mangyi kirouwa indi, Kwafo Rehimu, Nshilyi nniini, na Shinshai, mwiireiya na kwa yewo vengyi vakee Samaria neefo taari ya nkwaany ya mura wa Efrati, shamwiidikira. 18Ulaalu barrwa ilya mulelurikya mmbo ilesomwa yoo mbee yakwa. 19Shoota ivavaso mbony yeto tindesumwa. Nakyo kikalollyo sheelyi muri yeu uka mbee mmbo uriingyaa vamangyi, na ulyang'a na uriingyi filembutikafo. 20Nalyo mmbo kweifo vamangyi vatiri nnduma efo Yerusalemu, valya valeshillya uruka loose elo lukee taari ya nkwaany ya mura wa Efrati, vakasannyo usanu na ukamba na udedemi. 21Ulaalu uteny ivavaso naambo ishora elyo lyisalale, muri yeu ulatanwa-fo, kutani elyi yeny nshuuta ivavasyo. 22Kwiiseny mularokoye mbony yei, mashika nkivaa ullyang'a elu lweengereke na mangyi nature usanu-fo.
23Kyeeri barrwa yei ya mangyi Artashasta ilesomyo Rehumu ulya nshilyi nniini, na Shamishai, mwiireiya ando amwi neewo vengyi, vakaangusya vakeenda Yerusalemu, vakandekyeemya Vayuda na finya, na iveema valakitani muri yeto-fo.
Ishora lyeetana mmba ya Iruva lyapooka
24Nalyo ishora lya itana mmba yeyo ya Iruva ya Yerusalemu lyikamanda kyikaenda indo fika mwaaka wa kavii wa ushilyi lwa mangyi Dario wa Uajemi.
Currently Selected:
ESRA 4: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
