ESEKIELI 7
7
Ufisshony lwa Israeli lukee kufii
1Irero lya Nndumi Iruva lyikashisheeya: 2Lyikaamba, “Yewe mwana wa nndu, via vana va Israeli sheelyi yeny Nndumi Iruva shaamba indi: Ulaalu ni ufishony! Ufishyo lwankooya uruka taari toose yiinya! 3Ulaalu ni ufishyo lwammusheya; ulaalu llyo shilekea unyafi lwakwa uwe yaany
Mmbo shimuutya uvingo lwiinani na ngaa yaany.
Na mmbo mmukapaa kya weesi lyany lyoose.
4Nshimulekyeyaa, nta nshimusaryaa-fo
ni kuti shimukape kyikwaani na meesi any,
na ukaidi lwiifo nnang'ani yaany.
Llyo mumanyaa sheelyi yeny mmbwe Nndumi Iruva.
5Yekyo shikeyaamba yeny Nndumi, Nndumi Iruva ni yekyi:
Ni ngapo uwe ya ngapo!
6Lola, umando lwansha!
Yee, umando lwammaafukya!
Lwammafukya! Umando lwammuwoya!
7Yeni veni uruka yelu, urumato lwany lwammaafukya!
Yee vana wa uruka, saa yansha,
nkonu ukee kufii nkonu wa kituuru
nshi nkonu wa ikapa n-ndoro ifumbuu-fo.”
8Ulaalu nkufii mwiite finya ya unyafi lwakwa na wiidimi lwa ngoo yakwa uwe yaany.
Na imuutya uvingo kikwaani na shia tany.
Mmbo mmukapaa ngapo kya ngaa yaany.
9Nshimulekyeyaa nta imusarya-fo.
Nikuti shimukape ngata kikwaani na mitannyi yaany
Na ukaidi lwany lwiifo yefo nnang'ani yaany.
Llyo mushemanyaa sheelyi Yeny mmbwe Nndumi Iruva mwimamita!
10“Kwiiseny, nkonu ulya ukee kufii! Umbiiri lwammbaa, ikung'anisa lyammoora
Urumato lwany lwansha.
11Kituuru kyammbaa kyikaaluka umbiri lwa wo uravi.
Nkwiifo nndu umwi nnang'ani yavo akeekkya,
nta kyindo kyimwi maseeny awo, nta itumbe nnang'ani yaawo-fo.
12Kyeeri kyansha,
yee, nkonu ulya ukee kufii.
Mwiyuura nalashekushela nta mwikumba nalaiye-fo;
mashika ngapo yakwa mmbo ishewoyaa vandu woose.
13Mwikapa mbusha nnyashiidima-se iwuiya kyindo ankumba-fo
na kwakooya eefo na muu.
Mashika ngapo yei ni kwa vandu woose nnyishaalashika-fo.
Kyeendwa ni mikaaye yaany mikasha, kuleefo nndu ashiidimaa ikira muu wakwe.
14Wombe lwankapwa, lweeivya vandu vakudeesye.
Lyo nkwiifo asheenda fireny-fo,
mashika ngapo yakwa ni ya vandu woose.”
Ngapo ya ulyamari lwa Israeli
15“Usu mmbo luringitye, ndwari shikasha na shaa ni mmba tikai,
yeto akee maremeny nnyawaawa ni usu, na yeto akee muriny ni shaa na ndwari shikasha fimmbwaa.
16Valya vaturunyaa mmbo varishyaa mafumbuu sha mbeta ta imungony.
Wo umwi efiiraa kyuumu kya ulyamari lwakwe.
17Wo nndu maako akwe mmbo alelekaa,
na ndi takwe tive selesele.
18Mmbo varaa soori ta makunnya,
vetirwa mmbwerei
na usutu na mirwe yaawo ishuutwa iwoya.
19Fesa yaawo mmbo vasheera yefo shia,
na saabu yaawo mmbo ivaa sha kindo kitefusu.
Fesa na saabu yaawo nnyishiidima ivakira-fo
Nkonu yeto wa ngapo ya Nndumi Iruva-fo,
fesa na saabu ntifweraa shaa nta yiishura ndeu tawo-fo
mashika kiparika kya ulyamari yelu ni umasi yelo vatiri.
20Na usha lwa utore valekusongosya lwa itumbe lyilatiri mbusha,
Vakasongosya mafwanu a maruva a wongo akasaamisa unyafi lwakwe;
amwi na findo fyawo fya usutu;
Yefyo fyoose mmbo shifyaallwa five fitefusu kwawo.
21Shiniingye umasi lwawo vandu va masanga engyi
vandu va masanga vavasoke neetefusa umasi lwawo.
22Mmbo shivakapaa mungo deny
naambo vatefuse mmba yakwa yeeterevya
Vaala shia vaange-fo na iitefusa yaaluke sama.
23Mashika mmbo uruka lwammishwa ngyulyamari ta iwaa na ipuswa samu
na muri wiishwe kituuru ukailannya
24Mmbo nsheende masanga makasha mmwasi
nawo asheshillya findo fya mmba tawo.
Shivamanye furu umbafu lwawo.
na ando kwawo kweerasya kutefuswa.
25Elyi vasherovywaa mmavavyo,
mmbo varuuya urilalyi lyo llulollywa-fo
26Ngapo nnyishaa uwe ya ngapo;
swiiswii ilatye swiiswii
Varuuye mwawuya fisuku vanture
vakoani varekwa mavavaso,
na vamiku vature irero lya ileta.
27Mangyi ashefiira,
yeto nsongoru noote-pa
vandu vatirwa mmbwerei.
Shivatannyi kiinani na mirunndye yaawo;
shivaniinge ngapo sha ngapo ya valya vengyi.
Llyo vamanyaa sheelyi yeny mmbwe Nndumi Iruva.”
Currently Selected:
ESEKIELI 7: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
