ESEKIELI 45

Irema lyeele ya Nndumi Iruva

1Elyi mufikyaa yaava marema, iniinga wo nndu ekyo kyikwaani nawe, ni kuti muutye-u Nndumi Iruva kyaawu kyakwe kya mashora akwe mukyivike kyeele. Waasha lwa vayo luve kilomita ikumi na ivii na kyenga, na ivari lyavayo kilomita ikumi na ivii. Yoo mmbo kushevaa ando kweele mikonu myoose. 2Efo nnang'ani yavayo kusheka-fo, uvasha lwiinani taari shoose mita mayana avii na makumi araanu kuve kweele. Luringitywa ni uvasha lungyi taari toose lutiri ivari lya mita mayana avii na makumi araanu. 3Efo kyaawuny elyo kusheesa-fo kyiparwe kyingyi kitiri waasha lwa kilomita ikumi na ivii na kyenga na ivari lya kilomita isaanu. Efo mmbo kushevaa ndaleny yakwa ando kweele nnu. 4Yekyi ni kyaawu kyeele deny; nakyo mmbo kyishevaa ni kya vakoani yewo vefurukannya Nndumi Iruva, neefo kyaawuny ekyo mfo kundo kushetannywa mmba tawo, efo ndaleny kweele, kwa Nndumi kweekaa. 5Kyaawu kyingyi kyitiri waasha lwa kilomita ikumi na ivii na kyenga, na ivari lyavayo kilomita isaanu, ando kwetannya mmba ta Valevi, yewo vefurukannya mmba ya Iruva kyive masaa awo.

6Mmusheesaa-u kyaawu kyingi kufii na ekyo kyeele, kitiri waasha lwa kilomita ikumi na ivii na kyenga, na ivari lyavayo kilomita ivii na kyenga. Ekyo mmbo kyishevaa kya yewo woose va mmba ya Israeli.

Irema lya mangyi

7Mangyi mmbo asheniingwa kyaawu kilya kikee taari ya ngama, lyo taari ya nkwaany mmbo kyiifiitani na kyaawu kilya kyikee kivike kyeele kwa Nndumi Iruva taari ya nkwaany, mmbo kyikwaallye kyikandefika yeeve lya Meditrania, na taari ya ngama kutani kwandefika nnyanuny wa uruka taari ya ngama. Waasha lwa vayo mmbo lushevaa sha llwa luniinngywa vandu woose va Israeli. Llo lushevaa masaa akwe efo Israeli. 8Nawe nnyakivaa-se mangyi alamyaa vandu vakwa-fo, indilyo mmbo asalallyaa uruka lwaavywa Vaisraeli, ndesa kyikwaani na masanga a vana va Israeli.

Mashora a mangyi

9Nndumi Iruva aamba indi: Kyifye, Yeni vamangyi va Israeli, reny ungala na iwonnya vandu, mwantana ulyamari kyikailannya. Tannyeny vandu mesha na usumanu. Reny yuumbuta vandu vakwa urukeny, ni yeny Nndumi Iruva shaamba. 10“Ni kuti kurunde na misani ya usumanu ya fyeeso fya dede. 11Kwa kyeeso kyiinani, efa kwa nswa na bati kwa mafura mmbo fiinani. Kweekyo homeri imwi iyaani na efa ikumi kiwo ikainana na bati isaanu. 12Kwayeesa kilo; gera makumi avii ni shekeli imwi, shekeli makumi arindaru ni mina imwi.

13“Fimu fyany fya mareminy mmbo fivaa indi: Kyimwi kya firindaru kya efa nnang'ani ya homeri imwi ya nganu, na kyimwi kya firindaru kya efa nnang'ani ya homeri imwi ya shayiri. 14Kyeeso kya mafura mmbo kyivaa indi: Kyimwi kya bati imwi ya mafura yuuka koriny imwi (kori imwi kyimwi na homeri imwi, na hori imwi kyimwi na bati ikumi). 15Mmbo vaniinngya yoonri lyimwi, nnang'ani a moonri mayana avii, uka efo mmbeny ta vana va Israeli. Mmbo vasheendee firaso fya mareminy, firaso fyeemamitwa, na firaso fya urilalyi, naambo vaidimi itannywa usandi. Ni Yeny Nndumi Iruva shaamba. 16Vandu va uruka woose, mmbo vasheniinngya firaso efyo kwa mangyi ya Israeli. 17Ni ishora lya mangyi nasalallye na imanya sheelyi, kiraso kyeemamitwa, kiraso kya mareminy, na firaso fyeena fyaniinngywa kyeeri kya sukukuu, ukombe lwa mwiiri. Sabato na sukukuu tingyi toose tikeeshideesye efo Israeli fyanniingywa. Mangyi mmbwe ashedeesyaa firaso fyeyuuta ulyamari, firaso fya mareminy, firaso fyeemamitwa, na firaso fya urilalyi naambo vaidimi itannywa usandi vandu woose Israeli.”

Sukukuu

(Yuu 12:1-20; Val 23:33-43)

18Nndumi Iruva aamba indi: “Kwikee mwiiri wa mbee, na nkonu wa mbee wa mwiiri, mmbo kusheninngya ngashe ya shau ilatiri mfere isheva nnduma yoo ando kweele. 19Nkoani mmbo asheniinngya samu ya kiraso kya yuuta ulyamari, nasheivika efo fyeekony fya mmba ya Nndumi Iruva, na ndumba shoose yiinya ta masapahu, na ngo ta ngiri yoo mwaangony we yaanga efo ulaleny lwa nnang'ani. 20Mmbo ashetanaa indo nkonu wa mfungare wa mwiiri yeto mweni, kyeyuuta nndu aletana ulyamari eiishi ao naleeshi. Niindo mushekooya yiilyisa mmba ya Nndumi Iruva.

21“Nkonu wa ikumi na kaana, wa mwiiri wa mbee, mmbo mushevikaa sukukuu ya Pasaka. Ando a mikonu mfungare mwiilyaa mikate ilatiri ntarang'o. 22Nkonu yeto, mangyi mmbo asheniingyaa, kimaruma kyakwe, na kya vandu woose va uruka, ngashe ya shau ive kiraso kya ulyamari. 23Mikonu eyo mfungare myoose, mmbo asheutyaa Nndumi Iruva, kiraso kya ngoleta mfungare, na suva mfungare wo nkonu teemamitwa tilatiri mfere. Ni kuti aniinngye ndafu imwi wo nkonu ive ni kiraso kya yuuta ulyamari. 24Numa asheniingya kiraso kya nswa wo shau kilo ikumi, na kilo ikumi ta suva imwi, ashemarisya na lita isaru ta mafura kwa wo kilo ikumi ta nswa.

25“Mikonu ikumi na iraanu ya mwiiri wa mfungare, na ando a mikonu mfungare ya sukukuu mangyi mmbo asheniinngya firaso fya yuuta ulyamari, firaso fyeemamitwa, firaso fya mareminy na fya mafura.”

Currently Selected:

ESEKIELI 45: MAS2

Highlight

Compare

Copy