ESEKIELI 42

Mmba ivii kufii na mmba ya itereva

1Naasa nndu ulya kandeshirwaa poo ando kutiri uvasha, kufii na ando kutiri mmba taari ya ndoo, nawe kandeshaata firieny fya nnang'ani yefo mmba fikee usumanu na mmba ya iterevia ikee taari ya ndoo. 2Waasha lwa mmba yeyo yekee taari ya ndoo ni mita makumi araanu na ivari mita makumi avii na isaanu. 3Kweiyo mmba tikeshilunge, kulella uwe gorofa isaaru, tilunngye mita ikumi, ta ulale lwa nnang'ani usumanu na ulale lwa poo. 4Taari ya ndoo mmba eyo kweiyo shia itiri ivari lya mita isaanu na waasha lwa mita makumi araanu; myaango ya vayo yeeke taari ya ndoo. 5Firia fya uwe fya mmba mmbo yeyo fyekee fisiise mmwasi, ya filya fya nnang'ani, na filya fya kwasi mashika fyekee kwaasha mmwasi. 6Nafyo filya fiingyi fya uwe ni gorofa isaru kuleenda uwe filatiri ngo sha filya fya ulale lwa taari ya poo. 7Kweiyo isimamba usumanu na firia fiindukye kulella uvasha taari ya poo, lutiri waasha lwa mita makumi avii na isaanu. 8Firia filya fikee ulale lwa poo fiitiri mita makumi avii filya fya usumanu na mmba ya iterevia, mmbo fyeetiri waasha lwa mita makumi araanu. 9Kwasi ya firia efyi, kweiyo shia yeyiira yuuka na taari ya ngama ya mmba kwakooya nndu aanga ookya na ulale lwa poo yoo ando isimamba lya poo lyipookye. 10Taari ya sinde kweiyo mmba sha eyo, una ukasumana mmba a iterevia-fo. 11Usanguny lwa firia yefyo kweiyo shia ingyi ya yiira ivakye ilya ya taari ya ndoo. Mmba yeyo ramani na fyeeso fya-vayo fyoose mmbo yeevakyani na ilya ingyi. 12Kweiyo mwaango kwasi ya firia taari ya sinde ya mmba, kulya mafurumyony taari ya ngama, alya isimamba lyipookye.

13Nndu ulya kashivia, “Firia yefyi fyoose ni fyeele. Nnang'ani ya firia yefyi ni vakoani mmbo vaanga mbee ya Nndumi Iruva, vakalya firaso fyeele, firaso fyeele deny, mfo kundo kuvikwaa firaso fya nswa, firaso fya yuuta ulyamari, na firaso fya yuuta nsindara, mashika ando yoo ni kweele. 14Vakohani valya vekeeninngya nndumwa mweele, vakakunda isomuka poo, ni kuti wote-fo soori tilya veekeniingya nato nndumwa mbee ya Nndumi Iruva, mashika soori yeto ni sheele. Ni kuti varaa soori tingyi kulaore vansomuka indekwaanannya na ikwaanu lya vandu yefo poo.”

Fyeeso fya uvasha lwa mmba ya Iruva

15Nndu ulya ekimaa yeesa taari ya ki-mmba ya uvasha lwa mmba ya Nndumi Iruva, kashisomuta poo eera na mwaango wa taari ya ngama kandeesa uvasha lwa ki-poo. 16Kandepoo urungo llwa lwakwe lweyeesa kandeesa taari ya ngama mita mayana avii na makumi araanu. 17Kandeesa taari ya ndoo mita mayana avii na makumi araanu. 18Kandeesa lyingyi taari ya sinde mita mayana avii na makumi araanu, 19kawuya-se kandeesa taari ya ngama kwa urungo llwa lwakwe lweyeesa, mita mayana avii na makumi araanu. 20Niindo etana, kamaa yeesa taari shoose yiinya, nato mmbo teetiri mita mayana avii na makumi araanu wo-imwi. Isimamba yelyo lyikaavanisa uvasha weele na uvasha lwa vandu woose.

Currently Selected:

ESEKIELI 42: MAS2

Highlight

Compare

Copy