ESEKIELI 39
39
Matorito a Gogu amamitwa
1Neewe mwana wa nndu, awuya kyisuku kwa Gogu kummbie, Nndumi Iruva aamba indi: Lola, yeny, mmbo shisuuye kyafo, yewe Gogu nniini wa Roshi, Meshaki na Tobali; 2neeny shikwiindutaa, neekutetera kweende mbee, neekwiipo uwe kuuka kwaasha taari ya ndoo, kutani kwashefika uwe mafumbu a Israeli. 3Neeny shishekapa ura lwafo luuke yefo wokony lwafo umuso, na mife yafo ishewa yuuka yefo wokony lwafo usha. 4Kushewa uwe ya mafumbu a Israeli, yewe na matorito afo moose, na vandu va masanga meengyi yoo akee kyimwi na yewe. Neeny shishekuniingya ndeye yeto tilyee vandu, ndeye ta wo ngata na mafisi a ngoroshony ashekulya. 5Mmbo kushewaa waandeny, ando kwaa pyai; ni yeny shaamba irero yelyo, ni yeny Nndumi Iruva shaamba. 6Neeny shisheruma muro kwa Magogu, na valya vakaa kippwa mbaambaa ya yeeve; llyo vamanyaa sheelyi yeny mmbwe Nndumi Iruva. 7Na irina lyakwa lyishemanyika nnang'ani vandu vakwa Israeli, nta nshiniingyaa mwaanya irina lyakwa yeele lyitefuswa lyingyi-fo. Nawo masanga vamanye sheelyi yeny mmbwe Nndumi Iruva, yeto Mweele umwi wa Israeli.
8“Lola, ukeesha nato ukeendwa, ni Nndumi Iruva aamba yeu nto nkonu ulya shileamba. 9Yewo vakaa miriny ya Israeli vashesomukaa, nawo vasheataa muro wa fisha fya fira neefimamita, ngao, ngyura, mife, mafumu na rungu, five ngwi teeyata, muro wa vayo mmbo ushaaka ando a myaaka mfungare. 10Mmbashesanaa ngwi mareminy nta imanya ngwi ngoroshony-fo, mashika mmbo vasheata muro kwa fisha filya valetira mifungwa, vashetira mifungwa vandu valya valevatira wo, neesoka vandu valya valevasoka wo, ni Nndumi Iruva aamba.”
Gogu arikwa
11“Nkonu yeto, mmbo nsheniinga Gogu, kundo kweerika, kunu Israeli. Imungo lya veny, taari ya ngama ya yeeve, nalyo shia yeyo isheraywaa yefo mfo kundo vasherikaa Gogu na ngyeeri ya vandu vakwe woose. Nawo vashelyivaanga imungo lya Hamon-gogu. 12Ando a miiri mfungare vana va mmba ya Israeli mmbo vakaa veerikaa, naambo vakooye yiilyisa uruka. 13Yee, vandu woose va uruka yelo mmbo vashevarikaa, nato mmbo ushevaa nnduma nsha kwawo; yelyi nkonu yeto weeshiinndya ushefikaa, ni Nndumi Iruva aamba. 14Nawo mmbo vashesauwa vandu veerunda, kyeeri kyoose, veshiira yefo urukeny, verika valya vasaae-fo vanderikwa kyeiilisa uruka, miiri mfungare ikammiira mmbo vashiira lyingyi isununda mbony. 15Na vandu yewo, vasheera lyingyi vesunundaa mbony; kwakooya nndu moose alollya iffwa lya nndu, llyo ashevikaa-u kiring'isyo kyeyoora kutani veerika valya vaurika kulya imungony lya Hamon-gogu. 16Nalyo Hamon llyo irina lya muri. Niindo vashekooya yiilyisa uruka.
17“Nawe, Nndumi Iruva aamba: ‘Yewe, mwana wa nndu, Rera na ndeye ta wo ngata, na ifisi lya ngoroshony kusangyiryeny, mushe kusangyiryeny muuka taari toose, mushe sukukuuny ya kiraso; shikeideesya kyimaruma kyany kiraso kya sukukuu shiniini yefo uwe ya mafumbu a Israeli, mushelya nyama na ina samu. 18Mmbo mushelyaa nyama ta masiingo a vandu, na ina samu ta vashilyi va uruka na ya suva na ya ngurana, na ya mburu, na ya ngoleta, neeto shoose tivanndye ta Bashani. 19Mushelya mafura muwuure shapu, mushena samu kutani yamunanga, kunu kyirasony kya sukukuu yei shikemudeesya. 20Neeni mushewuutiswaa meseny akwa, amwi na frasi na veesama frasi, na masiingo a vandu, na vasikari woose va wo ngata; ni Nndumi Iruva aamba.’”
Israeli vaviirwa
21Neeny shishevikaa itumbe lyakwa nnang'ani ya masanga, na masanga moose, ashelollyaa ngata shilerumbwa mwaandu, na woko lwakwa shileluvika uwe yaawo. 22Nawo va mmba ya Israeli, kupookya nkonu yeto vashemanya sheelyi, yeny, mmbwe Nndumi Iruva, Iruva waawo. 23Nawo masanga vamanye sheelyi mmba ya Israeli, mmbo vesamiswa vakeenda kyifingony, kyimaruma kya makasha awo; na kyiila kyawo, neeny shavasuruma kisangu kyakwa, nalyo shavarambikya yefo maakony a vakiduva vawo, nawo woose vakawaawa na usu. 24Kyeendwa ni utefusu lwawo na ulyamari lwawo, niindo shilevatannya, neeny shavasuruma kisangu kyakwa.
25“Kweekyo Nndumi Iruva kaamba: Ulaalu, mmbo shisheviira vandu va Yakobo, valya valesamiswa shishelillya mmba shoose ya Israeli, yiinndya irina lyakwa yeele. 26Nawo mmbo vashekurika usutu lwawo, na ngyulyamari tawo na kyiila kyawo kyoose, kyeeri vashevaa na urilalyi yefo urukeny lwawo veni, nta kulakaa-fo nndu asheveeresee. 27Kyeeri shisheveende lyingyi wooka yefo masangeny a vandu neevasangyirya wooka yefo nnang'ani a ngyuruka ta vakiduva vawo, nesheilyiswa nnang'ani na mbee a miso a masanga meengyi. 28Nawo vamanyaa sheelyi, yeny, mmbwe Nndumi Iruva, Iruva waawo. Mashika shevasamira veende ushingeny, nnang'ani a masanga, na yeny shavasangirya shaveende urukeny lwawo veni; nta nshivaraa lyingyi yefo, nta umwi waawo-fo; 29nta nshivasuruma lyingi kyisangu kyakwa-fo, kyeeri shishevapusuyaa mumuyo wakwa uwe ya mmba ya vana va Israeli, ni Nndumi Iruva aamba.”
Currently Selected:
ESEKIELI 39: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
