ESEKIELI 37
37
Imungo lya maffwa moomu
1Shaolokywa ni finya ya woko lwa Nndumi Iruva, uwe yakwa, kashisomuta poo kwa shia ya mumuyo wa Nndumi Iruva; kandeshifita imungony nnang'ani kundo kwiishwe maffwa moomu. 2Kandeshiita kufii nalyo taari toose, ate mmbo kweishwe maffwa meengyi nnu kulya imungony lyilya! Nang'u mmbo yekee moomu pony. 3Kashivia, “Yewe mwana wa nndu, maffwa yaa ashiidimaa isalala?” Neeny sharouwa, “Woi Nndumi Iruva, ni yewe kwiishi.” 4Kashivia lyingyi, “Awuya kisuku maffwa yaandi, kwaavia, ‘Yeni maffwa moomu, aranyiny irero lya Nndumi Iruva. 5Nndumi Iruva avia maffwa yaandi marero yaa: Lola mmbo shishevika mumuyo wakwa nnang'ani yaany, neeni mushesalalaa. 6Neeny shishevika miraari uwe yaany, neeny shisheende nyama uwe yaany, neemusikya na kishong'u, shishevika mumuyo nnang'ani yaany, neeni mushesalala, llyo mumanyaa sheelyi yeny mmbwe Nndumi Iruva.’”
7Naasa shaawuya kyisuku ndesa shilevavasywa; kyeeri shekeeyawuya kyisuku; kukaitiwa ntiri niini nnu kukasanga-fo na kidina-si, na maffwa alya akasembeya iffwa kwi iffwa lyingyi. 8Shalola, ate! Kweifo miraari uwe yavayo, nyama ikasha uwe yavayo, shonyi ikasikya uwe yavayo, indi kkweifo mumuyo nnang'ani yavayo-fo.
9Naasa kashivia, “Awuya kyisuku kwa uraato yewe mwana wa nndu, kuvie uraato, Nndumi Iruva aamba indi: ‘Osho kuuka na taari yiinya ta uraato, yee mumuyo, kushaanga kwa vandu yeva valemmbwawaa, vaidimi isalala.’” 10Neeny shawuya ukyisuku ndesa aleshivavasya, vakaangwa ni mumuyo, vakava na muu, vakasalala kwa marende awo itorito iniini nnu.
11Nalyo kashivia, “Yewe mwana wa nndu, maffwa yaa, ni mmba ya Israeli shoose; lolate, wo mmbo vaamba maffwa eru ammuuma, kilya lwevikye nsia kyammaya, lukeerwa kwaasha nnu. 12Naasa awuya ukyisuku, kuvavie, Nndumi Iruva, mmbo aamba indi; Lolate, mmbo shisukwaa fifu fyany, shimusaamise muuka yefo fifuny fyany, yeni vandu vakwa, shishemuvika kulya urukeny lwa Israeli. 13Neeni mumanyi sheelyi yeny mmbwe Nndumi Iruva; kyeeri shishesukkwaa fifu fyany, neeshemuuta yeni yefo fifuny fyany, yeni vandu vakwa. 14Neeny shishevika nrima wakwa nnang'ani yaany, neeni mushekaa na muu, neeny shishemuvika yefo urukeny lwany, neeni llyo mumanyaa sheelyi, yeny, Nndumi Iruva, mmbwe shaamba yefyo neefiinutya, yeny Nndumi Iruva.”
Yuda na Israeli umangyiny lumwi
15Irero lya Nndumi Iruva lyikashisheya-se lyikaamba; 16“Yewe, mwana wa nndu, ipoo kiri kyimwi, kureiye uwe ya vayo Yuda, na kwa vooroye vana va Israeli, kwammaa kwiipoo kiri kya kavii; kureiye uwe ya vayo kwa Yosefu, kiri kya Efraimu na kya mmba shoose ya Israeli na vooroye; 17Kundefilunga ando amwi, yekyi neekyi five kyiri kyimwi yefo wokony lwafo. 18Neelyi vana va vandu vakwa, vashekuvia, ‘Kukundye-se iluvia yekyo kwiifo kutanaa?’ 19Vavie, ‘Nndumi Iruva mmbo aamba indi; Lolate mmbo nshipoo kiri kya Yosefu, yekyo kyikee yefo wokony lwa Efraimu, na masanga a Israeli vaoroye, neeny shishefisanda ando amwi na kiri kya Yuda, na ifyaallwa five kiri kyimwi, nafyo fisheva kyimwi wokony lwakwa.’”
20Nafyo firi filya kulefireiya uwe yavayo, mmbo fivaa maakony afo mbee ya usangu lwawo. Naasa kuvavie; 21Nndumi Iruva aamba indi: Lola mmbo shishiipoo vana va Israeli wooka yefo nnang'ani a masanga kundo valeenda, neeny shishevasangirya wooka taari toose, shisheveende yefo urukeny lwawo veni; 22neeny shishevaallwa vave isanga lyimwi yefo urukeny yelo, uwe ya mafumbu a Israeli; na mangyi umwi, nave mangyi waawo woose, nta mmbakikwaava lyingyi masanga avii-fo, nta mmbakikwaava vave mangyi ivii-fo, fika llung'anu. 23Nta mmbakikwaamba lyingyi waarrwe, lwa mafwanu awo-fo, nta kwa findo fyawo fya tangalu, nta kwa ulyamari lwawo lumwi, indi mmbo shishevaturunyaa, shishewoota yefo tangaluny, kundo vekeetannya ngyulyamari tawo, shisheveelyisa vave vandu vakwa neeny shive Iruva waawo.
24“Nawe nndundi wakwa Davidi nave mangyi uwe yaawo; nawo woose vasheva na mwiisi umwi-nsi, nawo vashelatyaa yekyo shivavyaa, neetira mavavaso akwa neerunda. 25Nawo vashekaa yefo urukeny yelo shileniinga Yakobo nndundi wakwa, kundo vekaa vande vany, nawo mfo kundo vakaa, wo na vana vawo, na vana va vana vawo llung'anu, na Davidi nndundi wakwa mmbo ashevaa mangyi yaawo llung'anu. 26Shishevika kyaasa kya urilalyi kimwi nawo, ni kyaasa kya llung'anu nnang'ani yaawo neeny, shishevavikya mbora neeveengyera ulaniny; nawo vashekaa nnang'ani yakwa llung'anu. 27Mmbo shishekaa ando amwi nawo, shisheva Iruva waawo, nawo vasheva vandu vakwa. 28Na masanga moose, mmbo ashemanyaa sheelyi yeny mmbwe Nndumi Iruva, yeny shiilyisaa Israeli, kweele kwakwa, mmbo kuvaa yefo nnang'ani yaawo llung'anu.”
Currently Selected:
ESEKIELI 37: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
