ESEKIELI 35
35
Ngapo ya Iruva ya Edomu
1Irero lya Nndumi Iruva lyikashisheya lyishaamba: 2“Yewe mwana wa nndu, enda kwafika ifumbuu lya Seiri, 3kwaambe, Nndumi Iruva aamba indi: Yewe ifumbu lya Seiri, mmbo shishoorwa woko lwa ngapo uwe yafo, kushelolya ukyiva na ngapo niini. 4Mmbo shilyamaraa miri yafo myoose, neewe kushelollya ukyiva, llyo kushemanyaa sheelyi yeny mmbwe Nndumi Iruva. 5Mashika yewe mmbwe nkiduva wa mikonu myoose va vana va Israeli, kwashevasuya mwaandu, vakakooya ngapo shiniini kyeeri vekee ukyiveny, kyeendwa ni ulyamari lwawo. 6Shaamba, yeny Iruva shiifo na muu ni kuti ufu lukukooye, ni kuti kufwe, nkushiidima ikutirisha ufu-fo, mashika yewe mmwiiwaa neewe ni kuti kufwe. Ufu mmbo lukekuruuya. 7Niindo shishaallwa ifumbu lya Seiri lyive weeresi na ukyiva. Mmbo ashewaawa wo nndu ashiiraa kunu urukeny yelu. 8Mmbo shishekwaanisa minying'a yefo mafumbuny afo, na yefo mamungony, neefo mireny yafo, mmbo isheeshwaa-fo minying'a yeyo ishewaawa na usu. 9Mmbo shishekwaallwa ukyiva llung'anu, na miri yafo ilakaa ikaywa lyingyi ni vandu llung'anu. Llyo kumanyaa sheelyi yeny mmbwe Nndumi Iruva.
10“Mashika mmbo kulaamba, Masanga yaa avii, na ngyuruka yeti ivii, mmbo tishevaa takwa; nato shishetishillya, lla neelyi Nndumi Iruva ekee nawo. 11Kweekyo mmbo shaamba indi, yeny Iruva shiifo na muu, mmbo shishekutannya kikwaani na nyashi yafo, amwi na nkuushu yeto kuleloora paa, woose mmbo vashelollya kyeeri shishekuutya uvingo. 12Neewe llyo kumanyaa sheelyi yeny Nndumi Iruva shammiita fyaararo fyafo fyoose kulaamba kya mafumb u a Israeli, kwishaamba, vamboywa ni ukyiva, vakarambikywa maakony eru luvalye. 13Neeni mukakurosa uwe yakwa kwa kana kyany muveni, na yeengera marero meengyi uwe yakwa neeny shimuni sheeta. 14Nndumi Iruva aamba indi: Mmbo shishekutannya kitere kuve ukyiva, na uruka loose lukooye ifura kyeeri shishekweengye ngapo. 15Ngata ilya sheni kulekooya ifura kya ding'u ya mmba ya Israeli kyeeri valekooywa ni ngapo, niindo shishekutannya, kuwoywa ni ngapo, mafumbu a Seiri, na Edomu koose piny. Llyo kyeeri vamanyaa sheelyi yeny mmbwe Nndumi Iruva.”
Currently Selected:
ESEKIELI 35: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
