ESEKIELI 31

Misri yavakaniswa na Mweresi mwaasha

1Kwikee mwaaka wa ikumi na lyimwi, mwiiri wa kararu na nkonu wa mbee wa mwiiri; irero lya Nndumi Iruva lyikashisheya lyishaamba; 2“Mwana wa nndu, endevia Farao mangyi ya Misri, we na vandu vakwe: A yewe, mmbo kuvakye-vi, yefo umangyiny lwafo? 3Yewe Mwashuri, mmbo ekee mweresi mwaasha efo Lebanoni, utiri maramba mapala.

4Mura ukanisa ukamya

ukeenda-si ukang'ana ukava mwaasha,

mira ikasoka, ikakwaana taari toose,

ngyusoka tikanisa miri myoose ya ngoroshony.

5Waasha lwa yeenda uwe lukarumishwa,

kilanya ya miri myoose ya mareminy;

maramba akatira finya na maasha

kimaruma kya mura mwiingyi.

6Ndeye toose ta ng'iniiu, tikaoka fifuri yefo marambeny a vayo;

kwasi ya maramba a vayo mafisi a ngoroshony moose akeende nang'u fivana fyawo,

na kwasi ya kirishe kya vayo, masanga ang'ani moose akakuummbyau.

7Naasa ukava nsha kwa uniini lwakwe,

kya waasha lwa maramba a vayo,

mashika miraari ya vayo

mmbo yekee kufii na mura mwiingyi.

8Nkwiifo nri weshiidimaa ivakaniswa nato yefo nndeny wa Nndumi Iruva-fo

nta kweifo nri ungyi utiri maramba sha yoondo-fo,

miri ingyi moose ikava-ruu

nri yeto ukava nsha ukailannya

miri ingyi myoose yefo nndeny wa Iruva.

9Shawallwa yendo nsha,

shawaambika maramba meengyi,

na miri ingyi myoose ya Edeny ikalollya nkuushu;

ilya yekee yefo nndeny wa Iruva.

10“Kweekyo Nndumi Iruva mmbo aamba indi: Kimmba kwanrumishwa indo kya waasha lwafo, lwanfika indo nnang'ani a mafishi, na nrima wakwe ukatira kyiila kya waasha lwakwe, 11mmbo shishenrambikkya maakony a isanga lyitiri finya, lyishensisa ngata kyikwaani, mmbo shamwaanta kyimaruma kya makasha akwe. 12Nawo veny vandu va masanga vaeresye, vammweera kwaasha, vakanra uwe ya mafumbu, firamba na maramba a vayo mmbo ashewaa yefo mamungony moose, akwaani yefo sokony ta mura efikyefikye; na vandu woose va ulana valekaa kwasi ya kirishe yekyo mmbo vashesamaa. 13Uwe ya maramba yoo, mfo kundo ndeye toose ta nginii-u tishekaa, na yefo marambeny kushekaafo mafisi a ngoroshony. 14naambo kulashekaa-fo nri moose ukushopaa yeto ukee kufii na mura kimaruma kya waasha lwa vayo, nta iva mwaasha lyingyi uleenda uwe nginiiu naakwa ni miri ilya ikeeniswa nisha, ilakyikaa ing'ani ileenda uwe, woose yewo vakeena mura, woose mmbo vafwaa, vandesumywa sumbai nnang'ani a vandu, ando amwi na valya vakesumywa sumbai.

15“Kweekyo Nndumi Iruva mmbo aamba indi: Kipookya nkonu ulya olooka kafika kwa varumu llyo evika kyiiyo, sharaya ndilyi kyimaruma kyakwa shatindila mira, na mura moose ukashingwa; Lebanoni kaiya kyimaruma kyakwe, na miri myoose ya ngoroshony ikanaa kyimaruma kyakwe. 16Ntiri ukareremisa masanga moose kyeeri kilya alewa shamweera-si fika kwa varumu, sanda neewo vakeyooloka marininy, na miri myoose ya Edeny, miri misha misauwe ya Lebanoni myoose yeyo inii mura ikang'ana kisha taari ta uruka toose. 17Yewo nawo mmbo wooloka kwa varumu kyimwi shawe kwa vandu valya vemmbwaawa na usu, yee, valya veveekya, vekee kwasi ya kirishe kyakwe nnang'ani a masanga.

18“A mmbo kuvakyani navi, yefo nnang'ani ya itumbe na uniini, yefo miriny ya Edeny? Indilyo mmbo kushoolotwaa ando amwi na miri ya Edeny, kufike si deny, kushaarwa ando amwi na maseka, amwi neewo valewaawa na usu. Yeto mmbwe Farao ando amwi na vandu va mmba yakwe woose, ni Nndumi Iruva aamba.”

Currently Selected:

ESEKIELI 31: MAS2

Highlight

Compare

Copy