ESEKIELI 23

Ohola na Oholiba

1Irero lya Nndumi Iruva lyikashisheya, lyikaamba; 2“Yewe mwana wa nndu, kweifo vana vavii, vefu va nnka umwi; 3nawo vakakapa usonga kulya Misri; kyeeri kyoose kya ukoo lwawo; mavee awo kyeeri kyoose akava afotwa-fotwaa, vakalyamara ukoo lwawo. 4Marina awo yeto nniini ni Ohola na yeto n-du irina lyakwe ni Oholiba. Vakava vakwa, vakeera vana va kyuumi na va kyika. Kya marina awo Ohola ni Samaria na Oholiba ni Yerusalemu!

5“Ohola mmbo ekapa usonga ekee wakwa, kakunda nnu womi vakwe Vaashuru, 6Vasero veraa soori ta Samawati, veeshillya na vasongoru vakoo vesha woose yewo vensennya miso, vesaamye frasi tawo. 7Kakapa usonga lwakwe kwa vasongoru woose va Vaashuru, kakwaanisa, kakwaaruva kakwaana kwa mafwanu a wo ngata ya yewo alevakunda. 8Nta nnyalekunda ilakana na mbony takwe ta usonga kupookya mikonu ilya ekee Misri-fo, mashika kyeeri kya ukoo lwakwe mmbo vandu veengyi vellala nawe, vakalamya mavee a ukoo lwakwe, vakalletya utuusi lwawo. 9Kyimaruma yekyo shanrambikya maakony a vakunde vakwe, yefo maakony a Vaashuru valya eevakunndye. 10Yewo vakamwaammbwa soori vakansoka vana na vefu vakwe, nawe vakammbwaa na usu kya iimuutya uvingo, kyikaenngye katukwa kaniny ka vaka woose.

11“Mwanawo Oholiba kalollya mbony yeto toose, lyo keengyera ilyamarika kailannya, usonga lwakwe lukailannya usonga lwa mfwamaye. 12Kakunda nnu Vaashuru, veeshillya na vasongoru; vasero vakwe yewo varee soori ta utore, vesaama frasi vesaamye frasi tawo, na vakoo woose vasennyi misony. 13Shalollya sheelyi ammeekutefusa, woose vavii mmbo vekee va shia imwi. 14Nawe kyeengera iva ntuusi mwasi, mashika elollya firishe fya womi vaambike yefo isimambeny, fwana ta Vakaldayo tireiyywa na fwana idodorye yefo isimambeny. 15Vakee vafinngye mikanda ya soori fisiny fyawo, na fitambaa fitiri fwana idodorye mirweny yaawo, woose vakavaka vasongoru va Vababeli ewo waparikye yefo Ukaldayo. 16Kyeeri alevalollya kafura nnu, karuma vandu kutani vafika Ukaldayo. 17Vandu va Babilony vakansheya kiriny kya uutusi, vakantuusa, vakantefusa na lango tawo vekimaa-itana indo, nrima wakwe ukasswa nnu kalakana nawo.

18“Naasa ekyeengera itana utuusi yelu nsanyiny kyere, amwi na ikusukkwa paa, llyo nrima wakwa neeny welakana nawe, ngata ilya sheni shelakana na mfwamaye. 19Indi kyeengyera usonga lwakwe eekummbwa mikonu ya ukoo lwakwe kyeeri eekapa usonga lwakwe kulya Misri. 20Na kakunnda vakunde vawo, valya watiri lango ta vaka sha nshungu, na finya ta ituusaa sha frasi.”

Iruva arummbwa mwaandu wa Oholiba

21“Niindo kulekummbwa usonga lwa kyeeri kya ukoo lwafo llya Vamisri veetiraa na isisira mavee a ukoo lwafo.”

Nndumi Iruva na uvingo lwakwe

22Ulaalu, mmbo shakuvia, “Yewe Oholiba! Nndumi Iruva mmbo aamba indi: ‘Mmbo shikuipoiyoo vakunde vafo, valya nrima wafo ulellakana nawo, shiveende vakuwoye wooka taari toose. 23Vandu va Babilony na Vakaldayo woose Pekodi na Shoa na Koa, sanda na Vaashuru woose na vakoo yewo vasennyi woose, vashilyi na vasongoru woose, masiingo na vandu vasuri woose na vesaama frasi. 24Nawo mmbo vashaa kwafo na fisha fyawo na matika ya fira, wooka taari ya ndoo, itorito lya masanga vakuringitye riti, veetiri ngao na mafumu veree kofia ta minya shivaniinge muumu vashekurumbuya mwaandu kweelatya ngata yaawo. 25Shikuutye usiro vakutannye kindo kyuumu. Vashekumashwa-fo mmbwa na maarwi yoo afo na valya vaturunnya vashewaawa na usu. Vasheipoo vana vafo va kyuumi na va kyika na valya vasaa-fo vashemamitwa na muro. 26Vashekwaammbwa soori tafo neekusoka mawe afo a wuurru uniini. 27Niindo shishekutannyaa ikulakanisa na usonga lwafo kuukye nalo kulya Misri, nkuvalla nta iwakumbwa lyingyi Va-misri-fo.’

28“Mashika Nndumi Iruva mmbo aamba indi; Mmbo shishekurambikya maakony a vakiduva vafo, valya kuvasuuye na nrima wafo moose valya kwelakana nawo kyaa iwasswa. 29Mmbo vashekutannya findo fya nkuushu vashekusoka umasi lwa nrike wafo moose, vakure yoo mbereto na ruu na usonga lwafo yelo lulekweengye kwatannywa indo lulollywa paa. 30Neewe mmbo kuletannywa indo kyimaruma kya usonga lwafo na vandu va masanga, ikutefusa na yiinndya mafwanu. 31Mashika mmbo kulelatya ngaa ilya sheni ya mfwamau, kweekyo mmbo shikurambikyaa upata lwakwe maakony afo. 32Naasa Nndumi Iruva aamba;

‘Mmbo kuniiya upatany lwa mfwamau;

lukusummye mmwasi na ing'ana.

Kuminwa mmbandu na yiipallwa mashika lutiri nkuka.

33Mmbo kunangwaa ni unango na irovyo ni fyoova,

upata lwa ting'wa na mwaangaya,

llyo upata lwa mfwamau Samaria.

34Yee, mmbo kunaa kunikire,

kukurrwe fii tafo na irattwa mavee afo,

mashika ni yeny Nndumi Iruva shaamba.

35Naasa Nndumi, Nndumi Iruva, mmbo aamba; kimmba kwanshirekywa, kwasheera na mungo, mmbo kukamara kumuni yuutika lya usonga na utuusi lwafo.”

Uvingo lwa Iruva kwa Ohola na Oholiba

36Nndumi Iruva kashivia: “Yewe mwana wa nndu, kusheutyaa uvingo Ohola na Oholiba? Kyasia, vavieny kya mitannyi yeyo yaawo maravi. 37Mashika mmbo valetuuswa na samu nnyefo maakony awo ifwani, vakakutuusa na mafwanu naakwa ni vana vawo valya veshiiryee vakaniingya firaso fyekora murony naambo filyiwa mmafwanu. 38Nshi yefyo-da valeshitannya-fo, mmbaletefusa ando akwa kweele, na nkonu yeto mweni vakeepala mikonu yakwa myeele ya imuya. 39Mashika llya vemeerasa vana vawo kwa maruva awo a wongo, nkonu yeto mweni llyo veanga ando akwa kweele vakandetefusa-fo. Lolaany, yekyi nkyo valetana yefo mmba yakwa.

40“Vakaruma mashinga vandevaanga vandu wooka kwaasha, nawo vakasha. Neewe kwakusangya kimaruma kyawo, kwaamba miso fwana, maarwi kwaraa fipulyi 41Kwandekaya kiri kya utore, na mesa ikeeshaale mbee ya vayo, na uwe ya vayo kukavikwa-u ubani na mafura akwa afwaamaa kisha. 42Ngyunyanga ta vandu veengyi vatiri ifura vekee amwi nawe, amwi na vandu valatiri wiindi, vakeendwa vanangwa wooka kasa koomu, vakavavika mise maakony a vaka na kofia shisha mirweny yaawo. 43Llyo shaamba, ‘A ndesa woorotu yewo mmbatuusa elyi valalaa nawe?’ 44Vakamwaanga sha nndu ashangaa kwa isonga, ni indo veanga kwa Ohola na Oholiba, vakakapa usonga. 45Naasa vandu vasumanu, mmbo vashevautyaa uvingo, uvingo yelo lukwaani na vatuusi, na uvingo yelo lwaa vaka valepuswa samu, mashika mmbo vakee masonga na maako awo mmbo atiri samu. 46Mashika Nndumi Iruva mmbo aamba indi, ‘Ende mamwiingi wa vandu shishevarambikya veerwa yefo na yefo; na ikamarwa mifungwa.’ 47Mmbo mamwiingi yeto ushevakapaa na mawe, vashe vawaa na ngyusu tawo, vashewaa vana na vefu vawo, na mmba tawo vashetimamita na muro. 48Ni indo shisherongaa umando lwa utuusi urukeny, naambo vaka woose vakuloshe, valashetuuswa ngata muletuuswa. 49Na mmbo mushekurika fya usonga lwany na itaiyywa utefusu lwa mafwanu any; llyo mushemanyaa sha yelyi yeny mmbwe Nndumi Iruva.”

Currently Selected:

ESEKIELI 23: MAS2

Highlight

Copy

Compare