ESEKIELI 21

Usu lwa Iruva

1Irero lya Nndumi Iruva lyikashisheya lyishambaa: 2“Yewe mwana wa nndu, induka kwalla taari ya Yerusalemu, losha kyilasha kya ando kweele, niingya ukisuku kilasha kya uruka lwa Israel kuvavie, 3Nndumi Iruva aamba indi: ‘Lola nshikee kyilasha kyafo shisommwa usu lwakwa shombony ya vayo, shimumamanyi moose kushu, vashimanyi vesha na veesi.’ 4Kimmba usu lwakwa lushemamanya vandu woose vasumanu na veesi mmbo shisommwa usu shombony yavayo lushemanya vandu woose vatiri mwiili kupookya taari ya sinde kundefika taari ya ndoo; 5llyo vandu woose vatiri mwiili vashemanyaa sheelyi ni yeny Nndumi Iruva shasommwa usu lwakwa shombony ya vayo; nta lulasheviirwa-fo lyingyi.

6“Kweekyo kurye, yewe mwana wa nndu, kunyiise na ivavywa nnu nriminy wafo na mavavywaa meengyi mbee ya miso awo. 7Neelyi vashekuvesaa, ‘A nkyikyi yelyi kuvavywa mmu?’ Mmbo kusheambaa, ‘Ni kyimaruma kya mbony yeto. Kyeeri kyishefikaa, wo nrima mmbo usheekaa, na maako moose ashetura finya, na wo mumuyo ushefwa na ndi toose mmbo tishevaa shifwafwa nayeeka sha mura. Lola, yefi mmbo fisheutikaa, na yiinukya,’” ni yeny Nndumi Iruva shaamba.

8Nalyo irero lya Nndumi Iruva lyikashisheya lyishaamba: “Yewe mwana wa nndu, niingya ukisuku kwaamba, 9Nndumi Iruva aamba, indi:

‘Akalo usu, lwannuwa,

nalo lwansingwa;

10mmbo lwannuwa naambo lushishe,

naisingwa naambo lumike sha ukova. Ao mmbo mwaallwa uraawe?

Mmbo kwammina umbiiri mwana-kwa na wo kyindo kitani nkyiri.

11Kweekyo usu mmbo luniinngywa lutokopwa luveitira;

lukesingwa na inuwa luniingwa mwiwaa.

12Yewe mwana wa nndu, kapa kyoorongye,

kuffwe na unyanga lwa mavavyo,

mashika vandu vakwa vammipoiywa usu,

nkyilasha kya vasongoru woose va Israeli,

Vamiipowa vandewaawaa ando amwi na vandu vakwa.

kweekyo kapa shoro yafo.

13Mashika nshe yeeswa-fo,

nalyo mmbo kivaany kyikwi,

kwakooya kyiila kyeengereka?

Niindo Nndumi Iruva aamba.’

14“Yewe, mwana wa nndu, niingya ukisuku,

kwakakapa maako na kwara usu looloke si kavii,

yee kararu, usu lwa yewo wawauwa

Ni usu lwa umariso uniini luwaringittye taari toose.

15Naambo mirima yaawo yeeke na veengyi wakawoiyywa yefo ngyiriny tawo toose,

Shanningya usu lumikaa; yee,

lukelusongosye sha kimwii lukeeuturwe kya iwaa.

16Kwiinive, kwamanya vyany taari ya woko usha na umuso yefo usu lukeella.

17Neeny shishekakapa maako,

shifweere ngoo yakwa;

ni yeny Nndumi Iruva sharera.”

Usu lwa mangyi ya Babiloni

18Irero lya Nndumi Iruva lyikashisheya lyingyi; 19“Yewe mwana wa nndu, songosya shia ivii, kundo usu lwa mangyi ya Babilony lushiiraa; toose ntooka urukeny lumwi. Na kwasongosya kiring'isyo kwakyiseleesa mapookyony a shia ya yaanga muriny. 20Kwareiyya, shia ya usu lukesheya Raba wa vana va Amoni na Yuda na Yerusalemu utiri turuve. 21Mashika mangyi ya Babilony; asalalyi ando kukee shia ta mbasero, yoo nrweny wa shia yeto ivii naambo ashekooya ilafya, asisikaa mife kunu na kunu, evesaa maruva na ilola marina. 22Taari ya woko lwakwe usha kasauwa Yerusalemu, itarammbwa kana isaamisa unyanga, ikapa kyoorongye kyiniini nnu, naambo navike nsiria ngyiriny, ivika ulale na itana turuve. 23Lyo mbony yei kwawo ishevakaa itemeena lyilaishiwa usanguny lwawo, mmbo vallya mma indi aveengyee ukasha lwawo lukumbuwa naambo vaidimi itirwa.” 24Nawe Nndumi Iruva mmbo aamba indi, “Kimmba ni yeni mutevettye makasha any akakumbuwa mashika a ngyulyamari tany na mitannyi yaany mmbo ilollywa paa ni kuti mutirwa.”

25“Neewe, yewe nndu nkasha, kukee mmbike kishavere, nsongoru wa Israeli; yewe kwamfikya nkonu wa mafurummyony a ngapo afo. 26Nndumi Iruva aamba indi; ‘kuute utore na ureto kuree, mashika mbony ntikyivaa shaasa tikai-fo, ng'anisa kilya kyikee sumbai, na nyiisa kilya kyikee uwe. 27Sama, sama, sama shikyaallywa, kulalollywa-fo lyingyi nta ngyayo kutani asheshaa yeto kyikee usumanu lwakwe; na yeny shinniinge.’”

Usu na Vaamoni

28“Neewe, mwana wa nndu; niingya ukisuku kwaambe, Nndumi Iruva, aamba indi kya vana va Amoni, kyeendwa ni utefusu lwawo, aamba indi:

‘Usu, usu lwansomuwa iwaany,

usu lwammenuwa,

ni wokony lukai mmbo lukee usinge

lukamikamika sha kimwii kya ukova;’

29Veifo veekoongoyaa moorya na yeelelisa wongo lwawo kyafo, yewo valyang'a vakandekweekyerya uwe ya singo tawo, na makasha awo, na mikonu yammisya, mikonu ya ngapo ta mafurummyony. 30Luviire yefo shombony ya vayo, kundo kulya kwewonikya, yefo urukeny kundo kuparikye shishekuutya uvingo. 31Uwe yafo shishekupusuya unyafi lwakwa; shishekwaatya muro wa ngoo yakwa uwe yafo, shishekurambikya maakony a vandu vakee sha mafisi, veetuuro. 32Kusheva mafura eyaata muro, samu yafo yiikwale urukeny kulakyikumbuwa lyingyi; mashika ni yeny Nndumi Iruva shaamba irero yelyi.”

Currently Selected:

ESEKIELI 21: MAS2

Highlight

Copy

Compare