ESEKIELI 2

Esekieli Avaangwa Nave Nkisuku

1Nawe kashivia, “Mwana wa nndu salala oroka shumu shikunndye irera neewe.” 2Kyeeri ekerera neeny, Mumuyo wa Iruva ukashaanga, ukashisaleesa shooroka shumu; na sheeta arera neeny. 3Kashivia, “Mwana wa nndu, mmbo shikeekuruma kwa vandu, va Israeli, kwa isanga lya vamini, valeshimina yeny, wo na vandeeye vaawo yewo valeshiila, mmbo kilasha kyakwa kutani kwafika inu. 4Vandu yewo ni mbafu na vakaidi, mmbo yewo shikeekuruma kwawo, kundevavia sheelyi, ‘Yeny Nndumi Iruva, mmbo shaamba ule na ule!’ 5Kwakooya vaarannya ao valema yaarannya, mashika mmbo vakee vandu vaniini, indi vamanyaa sheelyi eefo nkisuku nnang'ani yaawo. 6Kya indi, yewe mwana wa nndu, kulavaereye nta kulasheyereya marero awo-fo. Naakwa kwaringitywa miinga, na kwakaya nguluva, kulaereye marero awo nta kulasheyereswa ni miso awo-fo. Mashika yewo ni vandu valyang'a. 7Yewe mmbo kuvavia marero akwa vakaita ao vakalema iita, mashika ni vandu valyang'a. 8Lyo yewe mwana wa nndu, arannya kindo shikeekuvia, kulave nnlang'a shawo-fo, ambira kana kwalya yekyi shikekuniinga,”

9Naasa shavelollya shooroywa woko lutiri mareiyo akeemoososye kiraaweny. 10Kalyoororwa mbee yakwa, llyekelyireyye taari toose mbee na numa, na mareiyyo ekee ni marero a ting'wa, fiyyo na oshi.

Currently Selected:

ESEKIELI 2: MAS2

Highlight

Copy

Compare