YUUKA 5
5
Mose na Aron Vakwaanannya na Mangyi ya Misri
1Naasa numa Mose na Aron vakaenda vakavia Farao, “Nndumi Iruva, Iruva wa Israeli, aamba indi, ‘Niinga vandu vakwa mumu veende, naambo vandeshivikya nndumwa kulya kasa.’” 2Farao kaamba, “Nndumi Iruva ni vi? Kutani sheeta unyanga lwakwe, shininge Vaisraeli mumu vakweenngye deny. Yeny nshiishi Nndumi Iruva-fo, nta nshiniinga Israeli mumu veende-fo.” 3Vakaamba, “Iruva wa Vaebrania mmbo alekoora neese, lwakutereva luniinge mumu lweende kyaaro kya mikonu iraru efo kasa, lundeutya-fo Nndumi Iruva kiraso, we Iruva weeru, naambo nalashelukapa na ndwari shuumu ao fira.” 4Mangyi ya Misri kavavia, “Ewe Mose na Aron nkyiki elyi mukunndye irokosa vandu vare mashora? Endeepoony mario any.” 5Naasa Farao kaamba lyingyi, “Lolen-te, ulaalu vandu va uruka ni veengyi, neeni mmbo mukunndye ivaallwa vave varoko a vare yiipoo mario awo.”
6Kupookkya nkonu yeto Farao keema vesalallya vandu na varingyi vawo eevaviaa, 7“Mulakiniinge vandu mamburu eesongosia matofwari-fo, shaasa mwekeetana uka elyo; reny veende vanderuuya mamburu veni. 8Kyeendi yeekyena lya matofwari vekeesongosya lyive elyo yeni, mulaanguse-fo, mashika mmbo vakee varoko, nkyo kimaruma vekee irorongya vakaamba, ‘Luniinge mumu lweende lundeutya Iruva weeru kiraso.’ 9Niingeny vandu yewo mashora maroo mmwasi, vaatarike, lyo mureny yaarannya marero a wongo.”
10Naasa veesalallya na varingyi yewo vawo vakasomuka-u, vakarera na vandu vakavavia, Farao mmbo aamba indi, “Yeny nshikimuningaa mamburu-fo, 11Endeny mukanderuuya mamburu efo mwakooyaa muveni; mashika mashora any nnyasheanguswaa-fo.” 12Naasa vandu yewo vakara-raka vakakwaana urukeny lwa Misri koose veeruyaa mbulula ya efo mbuveny ando a mamburu. 13Varingyi vawo vakavaitika neevaavyia, “Inutyeny mashora any, kyeeso kyany mikonu myoose, sha kyeeri kilya mamburu eiyo.” 14Na vesalallya va vana va Israeli, yewo varingyi va Farao valevavika vavakallye, vakakapwa, vakavio, “Nkyiki elyi kulaore muleinutya ishora lyany ukwau neenu, musongosye matofwari affye sha llya mbee?” 15Naasa veesalallya va vana va Israeli vakeenda, vakaiya mbee ya Farao, vakaamba, “Nkyiki elyi kwalutannya indi yese mashinga afo? 16Mashinga afo nnyakeeningwa mamburu-fo, mmbo vakeeluvia, Songosyeny matofwari, na lyingyi, mashinga afo mmbo akeekapwa, kyeendi ukasha elo ni lwa vandu vafo kumuni.” 17Kavavia, “Mmbo mukee vapeere, vapeere deny, nkyo kimaruma mukeyaamba, ‘Luningeny mumu lundeutya Nndumi Iruva kiraso.’” 18Kyasia, ulaalu endeny mukanderunda mashora, mashika mmuningwaa mamburu-fo, na kilamaa mmmbo mushendee yeekyena llya yeni lya matofwari. 19Naasa vesalallya va Vana va Israeli vakalollya ulaalu mmbo kyammuma deny, llya valevio, mmushaangusaa yeekyena lya matofwari, any nta kinnywa-fo, yoo ng'u mashora any a mikonu myoose.
20Kyeeri valeuka kwa Farao vakandekwaanannya na Mose na Aron, mashika mmbo vevavereye yoo shia. 21Vakavavia, “Nndumi Iruva nalole, na irummbwa kyany, mashika elyi mwalweenngye lukaraa deny mbee ya Farao, na mbee ya vandu vakwe, mukavaniinga mwaanya wa iluwaa.”
Mose Afuuya Nndumi
22Mose kawuya kwa Nndumi Iruva kammbia, “Ale Nndumi Iruva nkyiki elyi kwatannya vande yeva kya ukasha indo? Nkyiki tupu elyi kuleshiruma?” 23Mashika uka llya kuleshiruma kwa Farao, sharera nawe na irina lyafo, llyo aleengera ivatannya makasha; neewe nta kulaauwe vandu vafo nta kinnywa.
Currently Selected:
YUUKA 5: MAS2
Highlight
Share
Copy

Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.