YUUKA 35

Uramba lwa Sabato

1Mose kasanyirya ironda lya vana va Israeli kavavia, Marero yoo Nndumi Iruva aleluvia ng'ng'u yaa, naambo muainndye. 2Rundeny mashora any mikonu irindaru, kyeendi nkonu wa mfungare mmbo ushevaa nkonu mweele kwany, ni nkonu wa yiimuya deny kwa Nndumi Iruva, nndu moose yeto asherundaa nkonu yeto mmbo awaawaa. 3Nta mmusheataa muro efo mmba kwany nkonu eto wa sabato-fo.

Kiraso kya Yeema Yeele

(Yuu 25:1-9)

4Mose karera na ironda lyoose lya vana va Israeli kavavia, “Irero elyi llyo Nndumi Iruva alevavasya kaamba,” 5Sye uteny firaso fyany kwa Nndumi Iruva, nndu moose yeto atiri nrima wa ilanga, neende firaso, fesa, sahabu na minya ya arera 6nruu ta fwana ya buluu, na ta sambarau na tidodorye, na fitambaa, na mafwaa a mburu; 7na masara a suva akee malongelonge fwana idodorye na masara a mburu, na maboo a mshita. 8Na mafura a taa yeyo na findo fifwaama fya mafura a yaamba a nrungo eto nsha, 9na fimawe fya uuru na fevika efo sooriny yeyo yeevanika meeveny na mbolokony eyo ya yoo mbafuny.

Fiyya fya Yeema lya Nndumi Iruva

(Yuu 39:32-43)

10Na wo nndu wa kwany yeto atiri nrima wa urango ashe natane efyo fyoose Nndumi Iruva alavavasya, 11ni ando yoo na yeema lya vayo na nruve wa vayo na fifungo fya vayo na maboo a vayo, na fiiya fya vayo fyoose na firembo fya vayo; 12isanduku elyo na firi fya vayo na kitima ekyo kya isarya, 13na mesa yeyo na firi fya vayo na fiiya fya vayo na mikate yeyo ya meseny meele, 14na kirembo ekyo kya taa yaake nishaa na fiiya fya vayo na taa ta vayo na mafura naambo iveu sa, 15na kitara ekyo kyekurya nrungo nsha, na firi fya vayo, na mafura yoo a yaamba, na findo efyo fifwaamaa, na kyeeko ekyo kya mwango yoo mwangony wa ando eele, 16na kitara ekyo firaso fyekora na muro na waafu lwa vayo lwa arera na firi fya vayo, na fiiya fya vayo fyoose, na birika yeyo na kirembo kya vayo; 17na uvaare elo lwa kari na firemmbo fya vayo na soori yeyo yesikya ruu mwangony wa kari na fiwoye fya vayo, 18Mbambo ta yeema yeele amwi na mbambo tilya ta ngiri na mikony ya-vayo. 19Na masara mooke nisha, eerundya ando yoo eele, masara yoo a Aron we nkohani, na masara a vana vakwe, yoo airundya ishora lya ukohani.

Vandu Vakeende Firaso Fyawo

20Na vandu woose va Israeli vakandekwiipo mbee ya Mose. 21Wo nndu kakwiita iniingya masaa akwe, kya mashora a mmba ya Iruva, na fia fyoose ando kweele kweekwanannya amwi na soori ta-vayo kulefo wiitiki. 22Niiindo valetana valya woose vatiri nrima wa iniinngya, vomi na vaka, vakeende fipulyi, nrashi ta firingisyo, na samana timikaa ta saabu ta-wo-ngata, vakaningya yefo kwa Nndumi Iruva, 23Niindo mbony tileenda, wo nndu keende kilya etiri, kyikee ni mafwaa a fwana ya buluu, na adodorye, sambarau, na engyi kitani kisha, mafwaa a mburu ya savana ao shonyi ya ishoonri ikee shaambe fwana idodorye. 24Wo nndu aleidima iniingya fesa, ao arera, mmbo aleende kwa Nndumi Iruva. Naakwa ni valya vetiri mbau, mmbo valeende kya mashora yoo. 25Vaka woose, valya veeshi ifuma nisha, mmbo valeende findo efyo vafummye kwa sufu ya fwana ya buluu, sambarau, idodorye, na kitani kisha kyikee kyoosose. 26Na vaka woose veishi yooka na ifuma, mmbo valeososa mafwaa a mburu. 27Vasongoru vengyi mmbo valeende findo fya mawe a wuuru a fwana shisha, eevika kisibau kya uwe yoo mbafu. 28Vakeende na fyoongye, mafura eyaata-taa mafura ekwaamba, na ubani lutiri nrungo nsha. 29Vaisraeli woose vomi na vaka, valya vekwiita iniinngya kya mashora yaa a Iruva, ngata Mose evavasywa niindo vandu valeniinngya kuleefo wiitiki, kive ni kiraso kyawo valeniinngya kwa Nndumi Iruva.

Veefurukannya Yeema lya Nndumi

(Yuu 31:1-11)

30Naasa ironda lyoose lya vana va Israeli lyikauka yoo mbee ya Mose, 31Vakasha wo nndu eto nrima wakwe ulemwitika na wo nndu nrima wakwe uleniing ilanga vakeende firaso fyeninngya Nndumi Iruva, na ishora lya yeema yeele na urundi la vayo, na kwa masara yoo meele. 32Nawo vakasha, womi na vaka, woose yewo vetiri nrima wa ilanga, vakeende findo fisenyi fyelonga-longa, fya maarwiny, na nrashi, na fipuli, na fiiya fya sahabu; na wo nndu aleningya kwa Nndumi Iruva, 33na wo nndu alewonisa kwa nruu ta fwana ya buluu, na ta fwana ya sambarau na tidodorye, na kitambaa kisha, na mafwaa a mburu na masara a suva akee maambe fwana idodorye na masara mesha kaeende. 34Nawe mmbo alenrangusa naambo needimi ilosha, we, na Oholiabu mwana wa Ahisamaki wa ufyari lwa Dani. 35Mmbo aleishura vandu yewo urango lwa nrimeny, naambo varunde mashora a wo ngata, ya mwishopa mawe, mashoraa urango na ya mwilonga longa mawe, na ya nruu ta buluu, na ta sambarau na ta fwana idodorye, na soori shisha, na ya mwooka soori; yewo veerunda mashora engyi moose a urango.

Currently Selected:

YUUKA 35: MAS2

Highlight

Copy