YUUKA 19

Vaisraeli Ifumbuu lya Sinai

1Naasa kwikee mwiiri wa kararu uka Vaisraeli vambuka Misri, nkonu yeto mweni vakafika kasa ka Sinai. 2Nawo llya valemaa yuuka Refidimu neefika kasa ka Sinai, vakaimuya alya kasa kalya, Israeli vakamanyau ulale yoo mbee ya ifumbu. 3Mose kasaama uwe kwa Iruva, Nndumi Iruva kammbaanga auka efo ifumbuny, kaammba, “Mmbo kusheviaa mmba ya Yakobo, neevia vana va Israeli marero yaa; 4Mulelollya kindo shiletannya Vamisri, neeni shamwipoo na maaru a ngoru, yeni shamoomuya kwakwa. 5Naasany ulaalu kwakooya mushitaa unyanga lwakwa neetira kyaasa kyakwa, llyo mushevaa vandu vakwa vasauwe ngota vandu vengyi woose, mashika ulana woose nalo llwakwa, 6neeni mmbo mushevaa kwakwa umangyi lwa makohani, na ufyari weele. Yaa nng'u marero kushevia vana va Isreli.” 7Mose keenda kavaanga vamiku na vandu, kavarambuya mbony yeto toose, shaasa Nndumi Iruva alemmbia, 8Vandu woose vakaarannya vakairikya woose, vakaamba, “Fyoose efyo Nndumi Iruva alekuvia, lushetanaa.” Na Mose kavia Nndumi Iruva shaasa vandu valeamba.

9Nndumi Iruva kavia Mose, “Kushelollya shikusheya shikee ifishiny iroo, naambo na vandu yeva veete shiireraa neewe, naambo veedimi ikwiirikya kyeeri kyoose.” 10Nndumi Iruva kavia Mose, “Enda yaata vandu yewo, mashoreny inu na ndesi, nawo vasangye soori tawo.” 11Vakudeesye kya nkonu wa kararu, mashika nkonu yeto wa kararu Nndumi Iruva asheolokaa auka efo Sinai ifumbuny vandu woose valollye. 12Neewe kushevavikya minyanu, kwaambe, “Kwiiseny, mulasaami yaa-fo, nta mulapaani nnyanu-fo, na nndu yeto ashepaana ifumbu mmbo ashewaawaa. 13Na nkwifoo nndu atiri mumu wempaana-fo, llyo mmbo ashekapwaa na mawe ao ifumu, kavaa nndu wa vandu ao kindo kitiri muu, mmbo awaawaa. Kyeeri iranda lyishekapwaa llyo vasheserikyaa na yoo ifumbuny.” 14Mose kaoloka ifumbuny kafika yoo vandu vakai, kavailyisa nawo vakailyisa soori tawo. 15Kavia vandu, “Kudeesyeny fika nkonu wa kararu, mulakae kufii na nndu wa kyika.” 16Kwikifika nkonu wa kararu, kyeeri kya ngama, ngova tikafika fika na fimwii fikamika, na ifishi iroo yoo ifumbuu, na unyanga uniini lwa iranda lukaitiwa. Vandu woose vakairyaa na irerema. 17Naasa Mose kauta vandu valya ulaleny, kaveende vashekwaanannya na Iruva, vakasalala alya kitaari ya kwasinde ya ifumbu llya. 18Na ifumbu lyoose lya Sinai lyikoota nsu, mashika Nndumi Iruva mmbo alesha sha muro, na nsu eto wakwe ukasha nsu wa ituuru, ifumbu lyoose lyikarerema nnu. 19Na kyeeri unyanga lwa iranda lyilya luleengera nnu, Mose karera, na Iruva karouwa na unyanga. 20Nndumi Iruva kasokyau kulya urorony lwa ifumbu, Nndumi Iruva kavaanga Mose nasaame kulya urorony lwa ifumbu. Mose kasaama nafo. 21Naasa Nndumi Iruva kavia Mose, “Oloka si, kundeikimba vandu, valashepara shia vasembeye kufii isheimaiya mashika veengyi vawo mmbo vashesarumyaa.” 22Na Vakuhani yewo vasheshaa kufii na Nndumi Iruva nkuti akwiilyise, naambo Nndumi Iruva nalasheimukapa. 23Mose kavia Nndumi Iruva, “Vandu yeva mbashidimaa iserikya ifumbu elyi-fo, mashika kuleluvia luvike nnyanu naambo vandu valaidimi isembeya kufii.” 24Nndumi Iruva kammbia, “Enda oloka, kuuke-fo kusaami ando amwi na Aron, kyeendi makohani na vandu valaire vafike kufii na Nndumi Iruva-fo, naambo Nndumi Iruva nalashevakapa. 25Naasa Mose kaoloka kandevavia.”

Currently Selected:

YUUKA 19: MAS2

Highlight

Copy