YUUKA 17
17
Mura Wuuka Iweny
(Mee 20:1-13)
1Ironda lyoose lya vana va Israeli lyikauka uruka lwa Sini na marende shaasa Nndumi Iruva alevavia vakafika Refidimu, nan'gu nkweiyo mura weena-fo. 2Vakasalala na Mose vakaamba, “Ende mura lune.” Mose kavavia, “Nkyiki elyi mukeesheesa? Niinda elyi mukeekunun'gunnya Nndumi Iruva?” 3Vandu vakatirwa nyura, nawo vakakunun'gunnya Mose vakaammba, nkyiki elyi kulelusaamisa luuke Misri, kusheluwaa na nyura yese na vana veru na findo fyeru? 4Mose kaiya na Nndumi Iruva kammbia, “Shatannya-ki vandu yeva mmbee? Mashika ulaalu nkufii vashikape na mawe.” 5Nndumi Iruva kammbia, “Ira mbee ya vandu yeva kuute-u vamiku maata va Israeli, na mbiiri ilya yafo kulekapa nayo mura, kweende nayo wokony. 6Neefo lola nshesaleesaa-fo mbee yafo ngereko ya iwe efo Horebu, neewe kusheikapaa, na mura usheukaa-fo, naambo vandu vani.” Mose katana indo vamiku ewo va Israeli velollye. 7Ando alya vakafisha-u irina ni Masa, na Meriba, kimaruma kya ufiri lwa Vana va Israeli, mmashika llya valeesa Nndumi Iruva, vashambaa, “Nndumi Iruva akee neese ao ode?”
Misa ya Vamaleki
8Naaasa kyeeri ekyi Vamaleki vakasha, vakakapana na vana va Israeli alya Refidimu. 9Mose kavia Yosua, Lusauye vandu, kweende nawo kundekapana, na ndesi mmbo nshesalala uwe ya ifumbu lilya alya, na mbiiri ilya ya Iruva nsheitiraa wokony lwakwa. 10Nalyo Yosua katana shaasa Mose alemmbavasya kandekapana na Vaameleki, na Mose, Aron na Huri vakasaama kulya uwe ya ifumbuny lyilya. 11Naasa kyeeri Mose ammiipo woko-uwe, Israeli vakavinga, kammolota woko-si, Vaameliki vakavinga.
12Ni llya maako a Mose ekeyaaraa, naasa vakoonndwa iwe vakalyivika yoo-si Mose kalyikaya. Aron na Huri vakakaa taari yei na yei vakaorrwa maako a Mose na uwe kutani kyeeri mwi uleolokkya, 13Yosua kamamita Vaamaleki na usu, ando amwi na vandu vawo. 14Nndumi Iruva kavia Mose, “Reiya mbony yei kyitabuny kya mikumbuye naambo ilareke, kuringisye Yosua mbony yei, sheelyi mmbo nshevarumata Vaamaleki deny yaa ulaniny valakilollywaa-se.” 15Mose katannya kitara kyerasya kakivaanga, “Nndumi Iruva ni Bendera yakwa” 16kaamba, “Nndumi Iruva alelya mboo, Nndumi Iruva mmbo ashevaa mwikapana fira na Vaamaleki wo irika lya vandu.”
Currently Selected:
YUUKA 17: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
