ESTA 9

Vayuda vamamita Vakiduva Vawo

1Nalyo ukifika mwiiri wa ikumi na kavii, uvangwaa Adari nkonu wa ikumi na kararu, llyo filya mangyi arumbuye fishiinutywaa, llyo na nkonu vakiduva va Vayuda vekundye yoora finya yawo ilammya Vayuda, lyo mbony tikavarevekya, Vayuda vakava mmbo vavashillyaa. 2Kulya urukeny koose Vayuda vakasanga ando amwi efo miriny na fyuungony koose, naambo vafishe kyama kyetaiya vakiduva vawo, kulaore kulaonika nndu aveema, nawo vakeereywa nnu. 3Naasa vasongoru va ngata toose valya veesalallya mashora a mangyi, vakasanga na Vayuda ivatarama, kimmba nawo valeereya Mordekai. 4Mordekai mmbo ekee mwiisalallya efo mmba kwa mangyi, nnduma wakwe ukakwaana urukeny koose eerumishwaa. 5Naasa Vayuda vakeepoo ngyusu tawo vakawaa vakiduva vawo, vakavatannya kilya vakundye vakavarumata deny.

6Naakwa n'kulya Susa turuveny kweni mmbo valewaa-fo womi mayana araanu. 7Vakasanda na vana valya ikumi va Haman wa Hamedata ulya eesuuye Vayuda. Vana yewo ni Parshandata. Dalfoni na Aspata 8na Porata, Adalia na Aridata, 9na Parmashta na Arisai, Aridai na Waisata. 10Lyo Vayuda mmbaleipoo findo-fo.

11Nkonu yeto mangyi kashevio yeekyena lya vandu valewaawa kulya Susa kweni. 12Mangyi kavia nkaamangyi Esta, “Kulya Susa kweni Vayuda mmbo valewaafo vandu mayana araanu vakasanda na vana valya ikumi va Hamani. A kyavaany indo kya Susa, a efo kunginy? Ulaalu amba kindo kingyi-da kukunndye kindetanwa. Nkyoki kingyi kukunndye kuniingwa?” 13Na Esta kaamba, “Mmbo sheekuterevaa mangyi mmbee kwakooya kushiirikyaa, weele lukapwa lyingyi, Vayuda va Susa vandevanika vana yewo ikumi va Hamani nriny ulya.” 14Nalyo mangyi kavavasya kive indo shaasa Esta atereva, weele lukakapwa, na vana valya ikumi va Hamani vakandevanikwa nrii-u. 15Naasa Vayuda va Susa vakandesanga lyingi nkonu wa ikumi na kaana wa Adari, vakawaa lyingi vandu mayana araru, lyo mmbaleipoo kindo kyingi-fo. 16Na Vayuda yewo vekee efo urukeny vakasanga ando amwi, vave kindo kimwi ivinga nkiduva, vakavawaa, vafikye fiku makumi mfungare na firaanu, lyo findo mmbaleipoo-fo.

17Naasa ukafika nkonu wa ikumi na kararu wa Adari, na nkonu wa ikumi na kaana vakeemuya, Vayuda vakeemuya vakakyesa. 18Lyo Vayuda va Susa nkonu yeto wa ikumi na kararu, ikumi na kaana na ikumi na karaanu vakakyesa neefura. 19Nkyo Vayuda yewo vakaa kundo kwa mareminy na miri ilatiri turuve vakeendya nkonu yeto wa ikumi na kaana wa Adari uve nkonu wa sukukuu, vakakurikya wo nndu na urooye findo fya pya.

Sukukuu ya Purim

20Na Mordekai kareiya mbony yeto naambo tikumbuwa. Kookafo karika barrwa kwa Vayuda woose efo urukeny lwa Ahasuero, va kwaasha na va kufii, 21naambo veendye nkonu yeto wa ikumi na kaana wa Adari, na ya ikumi na karaanu, mashika nnyo mikonu 22Vayuda valewona ivinga vakiduva vawo vakakooya ufoo, na ifura ando a kiiyo, tive sukukuu na ifura, vavekuutya findo fya pya wo veni na veni vaveniinga na vaturi.

23Nawo Vayuda vakairikya itana shaasa Mordekai alevavia. 24Mashika Hamani mwana wa Hamedata, Mwakakyi nkiduva yeto wa Vayuda mmbo emfisha kyama imamita Vayuda woose 25Lyo kyeeri mangyi erwaayo mbony yeto, kavavasya sheelyi uriingi elo enkunda lusheye Vayuda lumbuiye we muni sanda na vana vakwe vandevanikwa nrii-u. 26Mikonu yeyo Vayuda vakaivaanga Purimu kyuukana na Puri, ni llya kura yakapwa. Nawo kyeeri kilya Mordekai alevavia na filya valelollya veni, 27Vayuda vakawarya neevavasya vana vawo neewo vashekaa kwawo naambo veendye mikonu yeyo shaasa valevyo, wo mwaaka kyeeri ekyo. 28Wo ufyari na mmba vaindye mikonu yeyo, mikonu yeyo ya Purimu ilarekyiwa kwa Vayuda fyeeri fyawo fyoose.

29Naasa nka-mangyi Esta, mfu wa Abihaili, ando amwi na Mordekai, Myuda, vakareiya-se barrwa yeekaarisa ivavasyo elyo lya sukukuu ya Purimu. 30Barrwa ikarikywa Vayuda woose myuungony 127 ya uruka lwa Ahasuero mangyi, katira ufoo na dede. 31Ikakaarisa kya mikonu yeyo ya Purimu, shaasa Mordekai na Esta valevavasya yiindyo mmbo, veni na vana vawo fyeeri fyoose, shaasa veshiindyaa fyeeri fya ikootoya na kiiyo. 32Esta kavavasya mikonu yeyo ya Purimu iringwa yiindyo indo, nakyo kikareiyo efo kyitabuny.

Currently Selected:

ESTA 9: MAS2

Highlight

Copy

Compare