VAEFESO 3
3
Urundi lwa Paulo kwa vandu va masanga
1Nkyo kimaruma yeny Paulo shikee mfinge kimaruma kya Kristo Yesu kimaruma kyany yeni vandu va masanga. 2Kwakooya mulemmiita mbony ta ungari lwa isarya lya Iruva shileningwa kimaruma kyany 3sheelyi mmbo shileorwa kyama ekyo, shaasa shilesongwa imuvia kyaangu. 4Naasany, elyi musomaa mmbo mushidimaa ilollya imanya lyakwa lwa kyama ekyo kya Kristo shaasa kyikai. 5Nkwiifo vandu va fyeeri fingyi valeorwa kyama ekyo-fo, kive shaasa varumi va Yesu veele na vakisuku va kyeeri ekyi kwi Mumuyo, 6sheelyi vandu va masanga ando amwi neese ni veni ding'u va ngata imwi-nsi, va-mwiili umwi, na veakana ando amwi neese kyaasa kilya kya Kristo Yesu kya Nrumi ya Nsia. 7Nrumi yeyo ya Nsia shileivaangywa shiifurukannyi, kiinani na simbo ya isarya lya Iruva shilenningwa kiinani na wiidimi lwakwe. 8Yeny Paulo, shinyiiye yeto akee n-du wa veele woose, mmbo shilesimbwa isarya elyi naambo shoongoye vandu va masanga mbony ta usimba lwa Kristo lulavaa yeesa. 9Na imikkya vandu woose naambo vamanyi mbony ta wiidimi lwa kyama ekyo, kyikee efo kwa Iruva yeto aleumba findo fyoose. 10Naambo ulaalu kimaruma kya siri, waarya lwa Iruva lukee lwa ngata shiingyi lumanyike ni ngyumangyi na vaitori va ulana lwa ngata ya mumuyo, 11kimaruma ekyo kya llunga'nu kyikee kideesye kyuuka na Kristo Yesu Nndumi weeru. 12Kyeendwa mmbwe mmbo lutiri ukaari na wiidimi lwa iserikya kyuuka na ivika nsia kyeendwa ni inkusirya. 13Naasa mmbo shamutereva mulaute pa kimaruma kya fyuure efi fyakwa fishitiri kimaruma kyany-fo, nato ni nnduma wany.
Ikunda lya Kristo
14Naasany we Nde mmbo shamfirrya ndi. 15Yeto u-nde lwakwe lukeesendwa yaa ulaniny na efo iruveeu. 16Nawe namulyimyi iwona finya neevangiswa kiinani na usimba lwa itumbe lyakwe, kyiriyani na mashora a Mumuyo wakwe alukayaa efo nnang'ani. 17Kristo nakae efo miriminy yaany na kikusiryony mwiikutiri tapu uvasheny lwa ukundi. 18Naambo mwiidimi na imanya ando amwi na veele woose shaasa waasha na ivari, na yeenda uwe na yeenda si, 19neemanya ikunda lya Kristo shaasa lying'ani lyikailannya urango lweru shaasa lung'ani, naambo mwiidimi ivangisywa efo wiidiminy lwa Iruva. 20Naasany naitikiswa yeto aidima itana findo finiini nnu ngota efyo lwatereva na ikusara, kiinani na finya yeyo yakwe irunda mashora efo nnang'ani yeeru, 21yee, naitikiswa kunu siriny ando amwi na Kristo Yesu marika moose a llung'anu na llung'anu. Amen.
Currently Selected:
VAEFESO 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
