DANIELI 8

Usukyo lwa Danieli kya suva na woro

1Kwiike mwaaka wa kararu, ukya Belshasa, ammbe mangyi, lyikashisheya yoorya lyingyi yen Danieli kuuta-fo llya lya mbee. 2Kyeeri shelollya mmbo shekee Susa, muri nniini wa Elam. Shiiselalyi mbai ya mura wa Ulai. 3Kyeeri shepoo miso mmbo shelollya suva yiisalelyi mbai ya mura. Suva itiri mbembe ivii shaasha, lyo elo lumwi, mmbo lwekee waasha ngota elo lungyi; neelo waasha mmbo lumiiye numa ya elo lungyi. 4Shalollya suva yeyo iikapanaa ilella na taari ya nkwaany, na ya ndoo na taari ya sinde, kuleefo ifisi lyimwi lyileidima isalala nta ikweesa finya nayo; mmbo yekeetana ngata yakukunndya na ilyang'aa deny.

5Elyi shiifo nsoongyaa, shalollya mburu ya woro yuuka na taari ya nkwaany ilapaana sumbai, ngata yekeerisha; nayo mmbo yeetiri wombe lutiri finya yoo nnang'ani a miso a vayo. 6Ikalatya suva ilya ya mbembe ivii sheelollya yiiselelyi mbai ya mura. Ikairishya suva ilya kwa finya ta-vayo toose. 7Woro ilya ikasha kufii, ikakapa suva ilya kituri kwa finya, na mbembe tilya ivii ta suva tikafika. Suva ilya ikatura finya yekusiika, ikatuulwa-si ikakashywa-u, nta kulakee-fo nndu aidima yeekya. 8Nalyo woro ilya ikeengera ilyang'aa neekung'anisa. Ikitima deny wombe llwa lwavayo lukafika. Ando a-vayo tikammya-u mbembe iinya wo lumwi lulollye taari ya-vayo. 9Efo wombeny llwa lumwi lukammya-u wombe lungyi udu, lukang'ana nnu finya ya-vayo ikalamya taari ya sinde, na ya ngama na efo Urukeny lwa Kyaasa. 10Elu mmbo luleng'ana deny lukafikya ando, ikapana na ironda lya iruveeu, na nyinyiri, lyikafwallya maata-si lyikatikakasha. 11Lyikakurosa kutani lyakapana neeto Nniini wa ironda elyo llya iruveeu neemmbinga. Lyikaseleesa firaso fyeekora na muro, lyikatefusa na mwiinndye wa mmba ya Iruva. 12Lyikeepwa ironda amwi na firaso fya muro fya wo nkonu iteeryeny. Nalyo yiindya lya dede lyikarewa-fo, wombe elu lukavinga kya wo kindo lulekunda itana.

13Naasa sheeta nsu umwi ereraa, na nsu ungyi kammbesa; a nkishiipoo kyeeri kifie inda yoorya elyi: Firaso fya muro iteendwa, iteere, na itefusa ando erasya na ironda ikakashwa na marende?” 14Nsu ulya ungyi kandouwa kammbia, “Mmbo kivaa indo ando a mikonu fiku fivii na mayana araru ngama na nkwaany. Llyo mmba ya Iruva ishevauwaany.”

Nsu Gabrieli atambashwa yoorya

15Kyeeri shekesoongya kya yoorya, naasa llya yeni, kukasalala-u yoo mbee yakwa avakye nndu. 16naasa sheeta unyanga lwa nndu, luuka kulya nnang'ani ya mura wa Ulai lukaamba, “Gabrieli, nrambuye kya filya alollya.” 17Nawe kashesalala kufii neeny, shaawukwa nnu, shawa-si kifulu-fulu. Nawe kashivia, “Yewe mwana wa nndu, manyaany mbony yeti. Moorya yaa, mmbo yoora kyeeri kya mafurumyony a ulana.”

18Kyeeri ekerera neeny, shatirwa nrwe shiroo, shalala-si kifulu-fulu. Indi-we kashitira kashiseleesa. 19Kashivia, Arannya shikuvie, kumanyi, nyashi eyo ya Nndumi Iruva ishekaa ishe, na ngata ishevaa. Moorya ya ashoora fyeeri fya mafurumyony.

20“Suva ilya kulelollya itiri mbembe ivii ni vamangyi va Umedi na Persia. 21Nayo woro ni umangyi lwa Ugiriki. Nalo wombe llwa lwa finya yoo nnang'ani ya miso ni Mangyi wa mbee. 22Wombe llwa lulefika, na ando a vayo, tikamya-u tingyi iinya, mmbamangyi vaana vashesalalaa, lyo vamangyi valatiri finya sha-we. 23Kyeeri ngyumangyi yeto tishefikya umando lwa-vayo, lwaisisya na ituuro vandu, llyo asheshaa-fo mangyi ungyi, nkaari, eeshi fyaaso, atiri finya. 24Mmbo ashetiraa finya niini nnu, nndu aeresye, mmbo ashelyamaraa na itana findo fiingyi fikasha. Nndu ashiidimaa irumata, newaa naakwa ni vandu veele va Iruva veni. 25Kimmba akee nndu llyang'a na llembi mmbo ashevesyoo deny, neekung'anisa we muni, we muni nashemamita vandu vengyi kulaore vamanya, ashefikya ando a ikunda ikapana na mangyi yeto nniini ya vamangyi vengyi woose. Lyo we mmbo ashemamitwaa, kuleefo ipaanwa ni woko lwa nndu wa vandu. 26Myoorye ilya ya nkwaany na ngama, ni ya dede, ndesa kulevio, niindo kishevaa. Lyo ulaalu kive mbele kirika kyafo kumuni, kimmba kushiiraa-u fyeeri kwiite nkonu wafika.”

27Kyakwa yeny Danieli, mmbo shilerovywa shalwaa ando a mikonu mive. Numa shakwiipo, shandewuya mashoreny akwa kulya kwa mangyi. Indi moorya yoo mmbo ileshifulukya, shalemwa-deny iimanya.

Currently Selected:

DANIELI 8: MAS2

Highlight

Compare

Copy