DANIELI 6
6
Danieli efo irininy kya miiso
1Naasa mangyi yeu Dario kavika vashilyi iyana na makumi avii efo umangyiny lwakwe koose. 2Kyeengera-fo vashilyi vengyi vavii, amwi na Danieli naambo vasalallye veeshillya yewo, neelola filya fisenyaa mangyi. 3Naasa llya yeni Danieli kalollywa mmbo ailanyi valya vengyi vavii kwa urango na veeshillya valya. Kimmba kileva indo mangyi kammbika nave nsongoru wa valya vengyi woose kulya umangyiny lwakwe. 4Naasa veesalallya na vashilyi mbalakisennywa ni mbony yei-fo. Nkyo vakaruuya shia vashiidima ituula nayo Danieli, valaonise, mashika elyi Danieli ekee nndu mwaarya nnu, kulaore etanaa findo fya ntambo. 5Wo veni vakarera vakaamba, “Llushidimaa ikooya Danieli na kindo kyikasha-fo, kulakooye ni kyikwaani na kyikusiryo kyakwe kwa Iruva.”
6Nalyo veesalallya valya vakarumbwa shila, vakeenda kwa mangyi Dario vakammbia, “Mangyi mmbee wara finya llung'anu, 7Yese veesalallya, vashilyi na vasongoru woose va umangyi lwafo, mmbo luleamba lutereve mangyi noote ishingo ando a mikonu makumi araru kulave nndu atereva iruva ungyi ao nndu kuuta yewe Mangyi, na nndu yeto ashealasha ivavasyo elyo, nandeerwa kulya irininy lya miiso. 8Woi mangyi Nndumi, utany ishingo elyo, kuvike-u woko lwafo kumuni, kive ni ivavasyo lya kunu Umedi na Upersia lyilashalashwaa.” 9Na mangyi Dario kairikya kavika-u woko lwakwe. 10Kyeeri Danieli emanya sheelyi mangyi ammbika woko ishingo llya mmbo eenda kyeny, kaanga mmba efo kirieny kya uwe, ando kutiri idirisha usumanu na Yerusalemu. Yoo idirisheny elyo nng'u ando Danieli eefiryaa-ndi, elolaa Yerusalemu, katereva neyaarafuma Iruva wakwe kararu wo nkonu; ndesa yeeke miishivye yakwe uka numa. 11Nawo vandu valya vevika nreiyo yeu, vakava vallaya vakandekooya eefo aterevaa Iruva wakwe. 12Naasa vakawara shia yeenda kwa mangyi Dario vakammbia, “Ale mangyi mmbe, kulevika-se woko lwafo alya ishingony, sheelyi ando a mikonu makumi araru, nndu moose yeto atereva iruva lyingyi kuuta yewe mangyi, mmbo anderwaa irininy kya miiso.?” Mangyi kaamba, “Ee, niindo, elyo ni ishingo lya Vaamadi na Vapersia lyilashaalashwaa.” 13Llyo nawo varouwa mangyi vakammbia, “Danieli ulya ekee nkamare mifungwa kulya Yuda, nnyakekwiindya-fo mangyi mmbe; nta ishingo kulevika-fo. We mmbo akeetereva na irumisha Iruva wakwe kararu wo nkonu.”
14Kyeeri mangyi aleeta indo kasokywa nnu fyoova ekusaraa ngata ashiidimaa yeekya Danieli kupookya ngama kutani kweela. 15Vandu valya vakaviya mangyi Dario kya ishingo llya vakammbia, “Kwiishi deny sheelyi ivavasyo elyi lya Vaamedi na Vapersia mangyi kammaa ilyivika woko nkwiifo yaalashika-fo.”
16Llyo mangyi evavasya Danieli natirwa andeerwa kulya irininy lya miiso. Mangyi kavia Danieli, “Iruva yeu wafo kumwindyaa fyeeri fyoose nakukire.” 17Nalyo iwe iniini lyikeendwa yoo kaniny kya irininy llya, na mangyi kavika-u kiringisyo kyakwe na kya vasongoru va uruka, naambo kulakae-fo asheidimaa yaauwa-fo Danieli. 18Na mangyi kawuya mmba yakwe ya kimangyi, nalaidimi irera na nndu, ilya nta ina nta nalawoni rwe kio tararaa. 19Naasa kwikee ngama shuru, mangyi kakwiipo aashaangusyaa kandesaiya kulya irininy lya miiso. 20Keeri efika alya irininy kundo Danieli ekai, kammbaanga, esonkywa fyoova woo Danieli, kammbia, “Yewe ishinga lya Iruva eefo na muu, Iruva yeto wafo kunndundyaa myeeri myoose, ammiidima ikukira miiso yeto?” 21Na Danieli kammbia, “Wara finya llung'anu mangyi mmbe. 22Iruva wakwa mmbo aleruma nsu wakwe, kasheraya kana kya miiso yeto, tilasheshipaana, Iruva mmbo aletana indo mashika mmbo eeshi nshilyamarye kindo-fo, nta ikumina yewe-fo mangyi mmbe.” 23Mangyi kafura nnu kikailannya kavavasya Danieli nandesaamiswa ootwa kulya irininy. Naasa Danieli kandootwa-fo, na vandu woose vakalollya nnyalerashuwa nta ando kumwi-fo. Kimaruma elyi ekusirye Iruva. 24Llyo mangyi Dario alevavasya vandu valya woose valeriingya Danieli, vatirwa wo, na vaka vawo, na vana vawo vandeerwa kulya irininy lya miiso, vekeerwa-fo kulaore vamfika alya iriniy-si, miiso tikavashongya neevafisha-fisha maffwa awo fyengafyenga.
25Naasa mangyi Dario kareiya barrwa kwa vandu va ngyufyari toose, masanga moose, va kundo koose na fwana na fishomu fyoose ulaniny: kavavia:
“Nndumi namulyimye unapwe
26Mmbo shavavasya, vandu woose-si
ya ushilyi lwakwa, vaereye na yiindya Iruva yeu wa Danieli.
We ni Iruva akee na muu, nawe mmbo asheshillyaa llung'anu.
Umangyi lwakwe lulamamitwaa
nta wiidimi lwakwe llukaa lumande-fo.
27We mmbwe akira na yaauwa,
katana ngyende na filandelollyo lyingyi,
iruveeu na kunu ulaniny.
Yeto alekira Danieli nalashelyiwa ni miiso.”
28Na Danieli kavikywa mbora kakaa nisha kyeeri kyoose kya Dario na kya Koreshi vamangyi va Vaajemi.
Currently Selected:
DANIELI 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
