DANIELI 10

Ukisuku lwa Danieli mbai ya Mura wa Tigrisi

1Kwiikee mwaaka wa kararu wa ushilyi lwa Koreshi mangyi ya Persia, nrumi ikasheya Danieli, ulya evaangwa Belteshasa. Yekee nrumi ya dede ikava shuumu imanyika, nkyo kaimanya neetambashwa ukisuku lwavayo. 2Kyeeri yekyo mmbo shekee kiiyon ando a fimaa firaru. 3Kuloore shakomba nta kindo nta nyama, nta ina kindo sha mfinyu, nta nshilesongosya fii ta nrwe-fo, ando a fimaa firaru sele.

4Wikee nkonu wa makumi avii na kaana wa mwiiri wa mbee, wa mwaaka ulya, mmbo sheselellyi yoo mbai ya mura ulya, mura nniini wa Tigrisi. 5Shaipoo miso shalollya nndu aree soori shimamiri na nkanda wa saabu. 6Mwiili wakwe ukamika sha yaambo, kisangu kyakwe kivaka kimwii kya stimu; miso akaaka sha kipalapala kya muro. Maako na marende akwe akavaka minya ya arera, unyanga lwa marero akwe lukaitiwa sha irunduma lya nsemu wa vandu. 7Nyeny shimuni shilelollya kindo ekyo, mashika vandu valya vengyi, shekee nawo mmbalelollya-fo. Lyo ngata valeaukwa na irerema mmbo valerisha vakandekusuruma. 8Sharewa alya shimuni shiilolaa kindo ekyi. Shasiiywa mfinya, na fwana yakwa ikaalashika shava nndu ungyi deny. 9Kyeeri shileeta unyanga lwakwe na unyanga lwa marero akwe mmbo shilewa-si kifulu-fulu sharekya rony. 10Naasa woko lukashitira kashiipoo kashiseleesa shireremaa. 11Nalyo nsu wa Iruva kashivia. “Danieli, Iruva akukundye nnu, Salala kushaarannyi nisha kindo shiifo nkuviaa, mmbo nkee nrumi kwafo.” Llya ekeyaamba marero yoo shasalala shu, lyo shiireremaa.

12Naasa kashivia, “Kulaereye-fo, Danieli, Iruva mmbo aleita fiterewo fyafo kupookya nkonu ulya kulekunyiisa mbee ya Iruva wafo. Mmbo sharumwa nshekurouwa fiterewo fyafo. 13Nrumi wa umangyi lwa Umedi mmbo alesalala neeny ando a mikonu makumi avii na umwi. Indilyo, nniini wa vasu, we Mikaeli kashesheekya mashika mmbo shenrewa shimuni kulya Umedi. 14Ulaalu mmbo shisheye ikuvia findo fikaa fishe elyi numa. Eti ni mmbony ta mikonu eyo ishekaa ishe.”

15Kyeeri aleshivia marero yoo, shalola yoo sumbai shava mbimbi. 16Nawe nsu yeu evakye mwana wa nndu, kashipaana firomu fyakwa neeny shatarammbwa kana sharera nawe shammbia, “Nndumi wakwa, kindo ekyi shalollya mmbo kyamaa finya yakwa deny, 17Neeny shavaka ishinga lyiselelyi mbee ya Nndumi wakwe. Niinda ishinga lyishidimaa isalala lyirere mbee ya Nndumi wakwe? Nshitiri finya nta nshikiidimaa irosya muu shirere neewe-fo”

18Kasha ungyi avakye mwana wa nndu kashipaana neeny shawuiywa mfinya. 19Kashivia, “Kimmba Iruva akukundye indo kulaereye-fo wuiywa mmuu, nta kindo kyimwi kilakuniinge usau nta ikweerese-fo.” Ekyaamba indo, shawuiywa mfinya mmwasi, shammbia, “Woi Nndumi shiviany ekyo kushiriye kwanshiviirya muu deny.” 20Naasa kashivia, “Kwammanya kindo kyasheende kwafo? Mmbo shiwuyaa ikapana fira na nsu nringyi wa Persia. Shamma itana indo nsu nringyi wa umangyi lwa Ugriki nawe mmbo asheshaa 21Llyo shishaany ikuvia, filya fikee fireiye efo fitabuny fya usumanu. Nta nshitiri ungyi ashiidimaa isheekya kuuta nsu Mikaeli nringyi waany.”

Currently Selected:

DANIELI 10: MAS2

Highlight

Compare

Copy