AMOSI 8
8
Ukisuku na Nkusha wa Madala
1Nndumi Iruva wa matorito kashoora kindo kingyi, “Mmbo aleshoora kikabu kitiri ndunda ta ngata shiingi. 2Nndumi Iruva kavesa Amosi, Nkyokyi ekyi kulollye?” Kammbia, “Nkikapu kitiri ndunda.” Nndumi Iruvan kashivia, “Kwa vandu vakwa va Israeli ekyi nkyo kyeeri kyeefurummya. Nshikialashaa-se kilya kyeevakapa-fo. 3Elyi nkonu yeto wiishaa, fiimbo fyawo mmbo fishevaa kiiyo na kyoorongye. Minying'a ishekwaalalaa koose, wo nndu namalallye sau.”
Ngapo ya Vana va Israeli
4Aranyiny, yeni mwavavara yewo valatiri kindo, neemamita vakiva kunu urukeny. 5Mukaamba, “Llushidimaa isisirya kutani nkonu yeto mweele weera lundekumbany findo fyeru-fo. Ni indii Sabato ishiraa naambo lupooke yeenda singireny? Naambo lulembe efo wuuruny, lwivikaa-u mawe nalasumani efo meseny ya yeesya findo. 6Lukumbe na nganu shiporu na wuuru uniini. Na nndu nkiva nalashidimaa itaa sye yakwe, nta yuura fyaaru fya yaaiya, lunkumbe ushingeny.”
7Nndumi Iruva, wa Israeli mmbo aamba, kya dede, “Nshirekywaa uravi elu lwawo-fo.” 8Uruka mmbo lushereremaa, wo nndu naangare, Uruka loose mmbo lurwaa na iwa sha mura wa Naili. 9Fyeeri fiifo fishaa elyi nkyeere usheangaa nsanyiny, neerema lyishe nsanyiny. Ni yeny Nndumi Iruva wa matorito shaamba indo. 10Mmbo nshealashaa ifura lya sukukuu tany lyive kiiyo kyeerika, na fiimbo fyany fya nsia five kiiyo kya ting'wa. Muute mirwe neraa makunnya, muvake vafee vaiyaa mwana waawo umwi-nsi. Mmbo ushevaa nkonu wa ting'wa dede deny.
11Wiifo ushaa nkonu yeto nshendee shaa urukeny. Vandu mmbo vashetirwaa nshaa, nshi yeetura shoonga-fo. Vatirwa nnyura, lyo nshi yeetura kyeena-fo. Mmbo vasheturaa Irero lya Nndumi Iruva. Ni yeny Nndumi Iruva muni matorito shaamba indi. 12Vandu mmbo vasheerevee vauka yeeve lya ndoo veende ya sinde. Varuuye Irero lya Iruva lyo valakilyikooyaa. 13Nkonu yeto vandu vakoo vatiri finya, womi na vaka mmbo vasheumaa kimaruma kya nyura. 14Yewo veinndya maruva a Samaria, yewo vashambaa “sswa iruva wa Dani, ao sswa iruva wa Beerseba, yewo mmbo vashewaa valakikwipoo lyingyi.”
Currently Selected:
AMOSI 8: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
