MASHORA 9

Ikirwa lya Sauli

1Naasa Sauli keengera ilyilyisa neekusara iwaa vakiloshyony va Nndumi, keengya Nkohani Nniini. 2Kakunda nanniinge barrwa teenda Dameski tikeeshireiye kwa mmba ta teeterevya ta Vayuda, naambo vakalollya-fo vandu va shia yei ya Nndumi, vomi na vaka naambo vakalollya-fo navafinge neeveende Yerusalemu. 3Kyikava elyi eefo ashendaa, kufii afike Dameski, pari pari karingityo koose nsa niini yuuka iruveeu, 4Kawa si, kaita unyanga lummbia, “Sauli, Sauli-ro, nkikyi elyi kukeeshivavisa?” 5Kaamba, “A ni yewe vi Nndumi?” Nawe kaamba, “Ni yeny Yesu yeto kukemmbavisa yewe.” 6Lyo salala, kwaange muriny llyo kushevioo ekyo kyikukooye itana. 7Na vandu valya veriani nawe vakasalala sau, vakaita unyanga, lyo valalollye nndu. 8Sauli kakwiipoo alya si, na kyeeri aletarammbwa miso, nalalollye nta kindo; vakantira woko vakamfita Dameski. 9Kakaa mikonu iraru nalalollye; nalakeelya nta ina. 10Naasa alya Dameski kweiyo wa kiloshyony umwi evaangwa Anania. Nndumi karera na Anania yooryeny. Kaamba, “Ekau yeny, Nndumi.” 11Nndumi kammbia, “Salala kweenda kundekooya shia ivaangwaa Shisaari, kundevesa efo mmba kwa Yuda nndu avaangwaa Sauli, wa Tarso, mashika kushenkoyaa eterevaa, 12nawe allolya nndu avangwaa Anania eshangaa neemwekerya maako, needimi ilollya lyingyi.” 13Kyaindi Anania karouwa, “Nndumi, mmbo shilemmiita mbony ta nndu yeu kwa vandu veengyi, kya makasha meengyi atannya veele vafo vakee Yerusalemu; 14naako ni kunu mmbo arye ivavaso alyuutye kwa vaniini va makohani nashefinga woose vakeevaanga Irina lyafo.” 15Kyaindi Nndumi kammbia, “Kweengye tupu; Mashika yeu ni kiiya kisauwe kyakwa, narwaa irina lyakwa kwa vandu va masanga, na vamangyi na vana va Israeli. 16Mashika mmbo nshemoraa shaasa fikee fingyi efyo ashelyisywaa ukiva kimaruma kya Irina lyakwa.”

17Anania keenda, kaanga kulya mmba ilya, kamwekerya maako kaamba, “Mwanama Sauli, Ni Nndumi ashiruma, we Yesu, yeto alekoora neewe efo shia kulesha nayo, naambo kwiidimi-se ilollya, kuveishurwa na Mumuyo Mweele.” 18Llya yeni fikaangara findo misony akwe fivakye mavala, naasa kaidima ilollya, kasalala, kapatiswa; 19kalya na shoonga, kawuiyo mmuu. Kakaa-fo ando a mikonu mive na mive ando amwi na vakiloshyony vakee Dameski.

Miloshye ya Paulo kulya Dameski

20Nalyo yeni kapooka ivambisa mbony ta Yesu efo fisomyony fya Vayuda, sheelyi we ni Mwana wa Iruva. 21Na woose valeita vakafulukyo vakaamba, “A yeu nshi we yeto ekesaveesa yewo veekesenda irina elyi kyulya Yerusalemu?” Na yaa-da mmbo alesha kwa kimaruma ekyo, navafinge neevarwaa kwa vaniini va makohani? 22Sauli keengera iva nkaari, kasaveesa Vayuda valya va Dameski, eeringisyaa sheelyi Yesu ni Kristo.

23Naasa kwikyiira mikonu miingyi Vayuda vakaumburana vammbwaa, 24kyaindi Sauli kamanya kyama kyawo, vakallaya efo ngiriny kio na nsanyiny naambo vammbwae. 25Vakiloshyony kyakwe vakamwipoo kio vakammbika kikabuny vakamoolota na isimamba lya mmba.

Sauli awuya Yerusalemu

26Kyeeri Sauli alefika Yerusalemu kakunda isanga na vakiloshyony, lyo wo vakamweereya woose, valaidimi ikusara iirikya sheelyi nawe ni wakiloshyony. 27Kyaindi Barnaba kammbwarya kanrwaa kwa Varumi, kavaongoya shaasa alekwanannya na Nndumi efo shia, na kingyi sheelyi alerera nawe, na kingyi shaasa aleamba Nrumi ya Nsia na ukaari kulya Dameski na irina lya Yesu. 28Nawe kakaa nawo efo Yerusalemu eshangaa neesomuka, kaamba mbony na irina lya Nndumi nookaari, eereraa na irouwana na Vayuda va Kigriki. 29Llyo nawo valeesa immbwaa. 30Kyaindi wooroye veekimanya vakamwiipoo vakanrwaa Kaisaria, naambo neende Tarso.

31Naasa Siri ikakaa na ifura efo Uyuda koose na Galilaya na Samaria, siri ikavangiswa ikeengera ing'ana neetirya Nndumi vio, ina iviiryo muu ni Mumuyo Mweele.

Petro Kulya Lida na Yafa

32Naasa kyeeri Petro ekeiringitya taari toose kashesokkya kulya kwa veele vakee muriny uvaangwa Lida. 33Efo kalollya-fo nndu avaangwa Ainea, nawe ellala kitareny ando a myaaka nyanya, mashika mmbo ekee muumu malungo. 34Petro kammbia, “Ainea, Yesu Kristo akushiisa, kwiipoo kwaalye kitara kyafo kumuni, llya yeni kakwiipoo.” 35Na vandu woose valya veeke Lida na Sharoni vakallollya, nawo vakaalukkya Nndumi.

Dorkasi Ashiiswa

36Na kulya Yafa kweefo wa Kiloshyony umwi irina lyakwe ni Tabita, kwaallwa ni Dorkasi (nkyo ni sarya); nka yeu mmbo ekee mwitana mesha kasanda na firaso fyakwe eshuutaa. 37Naasa fyeeri filya-da kalwaa, kavefwa; nawo vekimaa insangya vakansaamisa ghorofeny. 38Na kimmba Lida kweeke kufii na Yafa, na vakiloshyony vammaa iita sheelyi Petro mfo akai, vakaruma vandu vavii kwakwe vantereve neemmbia, “Kulakyeeyo isha kweru.” 39Petro kakwiipoo keenda nawo. Kyeeri alefika-fo vakansaamisa na kulya kai, vaka va ding'u woose vakasha na yoo akai veiyaa neemora kansu tilya Dorkasi eefumaa kyeeri kilya eeke nawo. 40Petro kavasomuta poo woose, kafiirya ndi, katereva, naasa keendukya nnyinga ulya, kaamba, Tabita, kupoo. Nawe katarammbwa miso akwe, na ekilollya Petro, kakwiipoo, kakaa rembo. 41Kantira woko kansaleesa, naasa ekimaa ivaanga vandu va Nndumi na vaka valya vading'u kammbika yoo mbee yaawo, ekee na muu. 42Kikamanyika kulya muriny wa Yafa koose; vandu veengyi vakakusirya na Nndumi. 43Naasa Petro kakaa mikonu mive na mive efo Yafa, kyeny kwa nndu umwi, avaangwaa Simon, mwisisa shony.

Currently Selected:

MASHORA 9: MAS2

Highlight

Copy