2 SAMUELI 4

Ishbosheti Awaawa

1Nawe mwana ulya wa Sauli Ishbosheti ekiita amfwa indo kulya Hebron kasia piny, na Vaisraeli woose vakasokyo mfyoova. 2Nawe Ishbosheti mmbo eetiri vandu vavii efo vasikariny vakwe vekee vasongoru, umwi ni Baana na ungyi ni Rekabu, nawo ni vana va Rimoni wa Beeroti va ufyari lwa Benyaminy mashika Beeroti mmuri wa Benyaminy, 3na vandu va Beeroti mmbo verishya Gitaimu vakakaafo kufike inu.

4Naasa mwana ulya wa Sauli we Yonatan eetiri mwana wakwe afirikye marende, nawe ekee wa myaaka iraanu. Kyeeri mbony ta Sauli na Yonatan tilefika Yezreeli, mweeri wa mwana ulya kanrishisa, eerishaa kawa kafirika marende; yeu mmbwe Mefiboshet. 5Nalyo vana va Rimoni wa Beeroti, wo Rekabu na Baana vakandefika kyeny kwa Ishboshet kyeeri mwi usimbikyi, vakankooya eemuyi. 6Vafikau vakatana sheelyi vakundye yiipoo nganu yoo mmba, vakakapa Ishboshet ifumu lya ndewu naasa vakarisha. 7Kyeeri valeanga kulya mmba kwa Ishboshet mmbo valenkooya kitareny eerekye nrony, vakankapa kafwa. Vakaukafo vakarumbwa nrwe wakwe vakarua nato kio kyoose kulya Araba imungony lwa Yordan. 8Vakanderwaaya Davidi nrwe wa Ishboshet kulya Hebron, vakammbia, “Lola mangyi yeu ni nrwe wa Ishboshet mwana wa Sauli, ulya nkiduva wafo eekeruuya ikuwaa. Nawe Nndumi Iruva mmbo eekya mangyi nataiye Sauli kiduva ando amwi na vandu vakwe.” 9Naasa Davidi kavia Rekabu na Baana, “Deda ya Nndumi Iruva yeu aleshitiryau na muu kafika inu, 10llya nndu umwieshivia, ‘Sauli amfwa,’ eekusarye vai mmbony shisha akeeshivia, mmbo shavavasya nawaawa alya Siglagi sha waavi lwa uravi lwakwe. 11Nkyo kwakooya vandu varavi vammbwaa nndu nalatiri mbese elyi efo alele kyeny ulaalu mmbo shiraa shilamuvesa kya samu yakwe shimuute yaa ulaniny?” 12Nalyo yeni Davidi kavavasya vasoro vakwe varumate vandu valya, vakavarumbwa maako na marende vakandevavanika yoo mbai ya iruva kulya Hebron. Naasa vakeepoo nrwe wa Ishboshet vakandeurika ando amwi alya Abineeri erikwa kulya Hebron.

Currently Selected:

2 SAMUELI 4: MAS2

Highlight

Compare

Copy