2 SAMUELI 11
11
Davidi na Batsheba
1Kyeeri kya mwaaka mwiiya vamangyi vashendaa fireny. Davidi karuma Yoabu na vasongoru vengyi, na Israeli woose veende vandemamita vana va Amon neetira muri wawo wa Raba. Lyo Davidi we kasaa kyeny, Yerusalemu
2Kyeeri kya nkwaany Davidi kooka kitareny elyi eelele, kasaama kulya uwe ya mmba ya mangyi. Eefo kulya vidi na uwekalollya nka akeekusangya koose. Nka yeu mmbo ekee nsha nnu deny. 3Nawe Davidi kandevesa mbony takwe. Nalyo nndu umwikammbia, “Yeu nshi Batsheba, mfu wa Eliamu, nka wa Uria, Mhiti?” 4Nalyo Davidi karuma vandu vakandemweende, kamwaata kwakwe, kakaa nawe (kimmba emmiita). Naasa nka ulya kawuya na kyeny. 5Nawe nka ulya kakufinga, karuma nrumi kavia Davidi, “shikufingye.” 6Naasa llyo Davidi aleruma nrumi kwa Yoabu, kammbia, “Nkyeruma Uria, Mhiti nashe yaa.” Nawe Yoabu karuma Uria kwa Davidi. 7Kyeeri Uria aleenda kwa Davidi kambesa mbony ta Yoabu na ta vandu vengyi na ta fira, 8Nalyo Davidi kavia Uria, “Kweengye mbele kyeny, kundekusangya, nawe Uria kooka alya kwa mangyi, kanrikya shoonga.” 9Lyo we Uria kalala alya mwaangony wa mmba ya mangyi ando amwi na vasero vengyi va mangyi, nalakunde yeenda kyeny. 10Llya vandu valevia Davidi sheelyi Uria nnyaleenda kyeny, Davidi kavaanga Uria kammbia, “Kulooka kyaaro-se? Nki kilekwiima yeenda kyeny?” 11Nawe Uria kavia Davidi, “Isanduku lya mavavaso na Israeli woose, na Yuda woose, na Yuda woose nkulya ulaneny vakai, na nsongoru wakwa na vasikari nkulya imungony vamannyi ulale, vai neeny sheende kyeny shindelya na ina neekukaya na nka wakwa? Woi mangyi wakwa nshishiidimaa itana kindo kya ngata yeyo-fo.” 12Naasa Davidi kammbia, “Irisha yaa inu na ndesi, llyo shikusameeny kukweengye.” Nalyo Uria kakaa alya nkonu ulya neelyi lya ndesi. 13Nawe Davidi kambaanga nalye nawe shoonga, kalya, neena kanangwa. Kyeeri kya nkwaany kakupoo kandelala na vasero va nndumi wakwe, nta naleende kyeny.
14Elyi lya ngama Davidi kareiya Yoabu barrwa, kairika Uria nanrwaaye. 15Efo barweny yeyo kareiya-fo indi, “Vikeny Uria yoo fira ikee shinyaasi deny, muuke-u, munreeye naambo nawaawa.” 16Nkyo kyeeri Yoabu ekeengya muri ulya nandeukaba, kavika Uria alya alemanya vakiduva vakaarye deny. 17Vakiduva vakasha na finya vakakabana na vasikari va Yoabu, vandu va Davidi maata vakawaawa, Uria ekee umwi waawo. 18Llyo Yoabu alerumya Davidi mbony eembyaa mbony tafira shaasa tava, 19Eerumaa nndu kammbia, “Kyeeri kumaa ivia mangyi mbony eti toose ta fira, 20na kwakooya mangyi arooyo nngoo na yaamba, ‘A nkiki elyi mwaanga muriny yeto indo, a mmbo kulore mwamanya sheelyi vashaasaa mife neefo isimambeny? 21A mmbi alewaa Abimeleki mwana wa Yeru-besheti? Nshi nka ulya alemweerya songoro ya isewe yuuka na isimambeny? Nawe kafiiya alya Tebesi? Nkiki elyi mweenda kufii na isimamba indo?’” Llyo kumbie, “Naako ni nsero wafo Uria amfwa-da.”
22Nawe nrumi ulya keenda kandevia mbony toose shaasa arumwa ni Yoabu. 23Nrumi ulya kavia Davidi. “Vandu yewo mmbo valelulyimba finya, mashika mmbo valelusora fika kyaandaany lukawaana nawo fika ngiriny ya muri. 24Absalomo kasheya mangyi kammbia, ‘Mmbo shakuvaanga mbee, yeny ishinga lyafo mashika shambika sukukuu na veesema moonri mafwaa.’” 25Nawemangyi kammbia. “Nkivaa indo-fo mmbo lushekurovyaa mwasi. Absalomo kalelemba mangyi deny, lyo we kalema fushu, lyo kankundya mesha.”
26Nka wa Uria ekiita mmi wakwe amfwa, kaiiya-nnu kya mmi wakwe. 27Ekimaa kiiyo, Davidi karuma nrumi nandeondowa, neendwa kyeny kwakwe kava nka wakwe; kammbonnya mwana wa kyuumi. Lyo mbony yei Davidi etana nnyesennya Nndumi Iruva-fo.
Currently Selected:
2 SAMUELI 11: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
