2 VAMANGYI 6

Kyaara kyaakooywa

1Naasa vakisuku vakavia, Elisha, lola, andu yaa lukai kwankunyiya. 2Lwakutereva lweende loose lufike Yordan, lundemanya-fo firi wo nndu kimwi, lundetana-fo kundo kwekaa. Kawarouwa, Kyasia! Endeny. 3Umwi waawo, kwa ikunda lyafo kumuni, mmbo shakutereva, kweende ando amwi na mashinga afo. Karouwa, Nshendaa. 4Naasa keenda amwi nawo, Vekifika Yordan vakamanya miiri. 5Indi kyeeri umwi waawo ekemanya firi, kyaara kikailuka-fo kikawa mureny kaffwa, kaamba, Oshi lwakwa nndumi wakwa, kyindo kyeyaakwa. 6Nndu wa Iruva kammbesa, Nkilewa kwi? Kamoora andu kweni. Kamanya kiri kakyeera mureny aleronga alya kweni, kyaara kikasaama. 7Kammbia, Kiipo, Nawe kaorwa woko, kakyiipo.

Itorito lya Vaaramu lyavingwa

8Naasa mangyi ya Shamu atiri fira na mangyi ya Israeli, kavika shila na varundi vakwe kaamba, nshivika ulale andu kuve. 9Nndu ulya wa Iruva karwaaya mangyi ya Israeli mbony, kaamba, Kwiise, kulaseima andu kuve, mashika kulya mfo Vaashami vakai. 10Mangyi ya Israeli kanderuma-fo vandu vakandefika andu kulya alevyo ni nndu ulya wa Iruva, kyemwiikyimba kakyiia-u, nshi lyimwi nta kavii-da-fo. 11Naasa mbony yei ikasaaveesa nnu makusaro a mangyi ya Shamu, kavaanga varundi woose kavavia A kye shivieny, mmbovi yeto nnang'ani yeeru akee kyaalu kya mangyi ya Israeli? 12Umwi nnang'ani ya varundi vakwe kaamba, Ode, mangyi nndumi wakwa; indi Elisha, nkisuku ulya akee kulya Israeli; mmbwe yeto avia mangyi ya Israeli mbony tafo toose, yeto kureraa kulya kirien kyafo kyeelala. 13Kaamba Endeny mukandelola kundo akai, naambo shirumi-fo vandu vandeshimweengye. Kavyo kusyedo, Oothani mfo kundo akai. 14Karuma-fo frasi na mitika na itorito iniini lya fira; vakafika-fo kwikee kio, vakashingillya muri ulya taari shoose. 15Naasa, elyi ngama shuru, nndundi wa nndu ulya wa Iruva kasumuka neefo poo, ate mmbo kweifo itorito iniini lya vandu veshingillye muri ulya neefo poo, ate ulya amwi na frasi tawo na mitika a fira. Nndundi ulya wakwe kammbia woshiny llweru nndumi wakwa, lukatana inda? 16Karouwa, kammbia, kuleereye-fo, mashika ewo vakee neese mmbeengyi ngota yewo vakee nawo. 17Elisha katereva, kaamba, Woi Nndumi Iruva shakutereva, kutarammbwe miso akwe naidimi ilollya. Nndumi Iruva katarammbwa miso a nndundi ulya nawe kalollya, nalyo kidooro kilya mmbo kyeishwe frasi na mitika a muro akaringitya Elisha taari toose. 18Na llya vakunda immboya, Elisha katereva Nndumi Iruva, shakutereva kapa, vandu eva ufu miso. Nawo vakafwa miso kiterewo kya Elisha kyikainukya. 19Elisha kavavia, mwanreka shia, na muri, nshi kunu-fo, shilatyeny shimoore nndu yeto mukennduya. Kavarwaa Samaria. 20Llya valemaa ifitwa kulya Samaria, Elisha kaamba, Nndumi Iruva, tarammbwa miso a vandu eva vaidimi ilollya; ate! Ni Samaria nnang'ani vakai. 21Nawe mangyi ya Israeli ekivlollya, kavia Elisha, Ale ndeye akwa shavakapa? Shavakapa? 22Kammbia Kulavakape-fo; a mmbo kushekapaa vandu kwammaa ivatira na ura a usu lwafo? Vakuniingye shoonga na mura, valye na ina vaidimi ikweengya kwa nndumi waawo. 23Naasa kavadeesya shoonga shiingyi, vekimaa ilya na ina kavalekyeiya, vakawuya kwa vandumi wawo. Vaaramu nnyefika lyingyi urukeny lwa Israeli-fo.

Muri wa Samaria watirwa

24Numa ya vayo, Benhadadi mangyi ya Shamu kaumbya itorito lyakwe lyoose, kasaama kandeshingillya Samaria. 25Vakatirwa ni shaa shiniini nnu, kulya Samaria, vakanshingillya kutani nrwe umwi wa nshungu wakumbwa fyenga makumi fya fesa, na kibaba kya maafi ya mbeta akakumbwa fyenga firaanu fya fesa. 26Naasa mangyi ya Israeli afo ashiraa uwe ya isiimamba wa mmba, nka umwi kammbaanga kammbia, Sheekya mangyi; nndumi wakwa, 27Kaamba, Nndumi Iruva alaankweekkya, yeny mmbo nkweekyaa inda, nshipookya na sumbai-ro ao nshipookyaa na uwe? 28Mangyi kammbia, nkyokyi kikutinnyi? Karouwa, ni Nka yeu ashivia shiniingye mwana wakwa lullye inu na yeto wakwe lullye ndesi. 29Naasa lukakora mwana wakwa, lukallya, ndesi ya vayo shammbia neende mwana lullye, indi-we kasuruma mwana wakwe. 30Naasa mangyi ekiita marero a nka ulya karanndwa soori takwe; (nawe ekeiira uwe ya mbombo) na vandu vakalollya eree makunnya efo mwiiliny mmbwakwe. 31Nawe kaamba, Iruva ashitannyi indo na mmwasi, kwakooya Elisha mwana wa Shafati alala eefo na muu inu. 32Indi Elisha kulya kyeny kwakwe, na vamiku andu amwi nawe, na mangyi kamrumya nndu indi kulare nta nndu ulya arumwa amfika kwakwe, kavia, vamiku mulollye, mmbwai yeu ndesa ankudeesya ishuuta muu wakwa? Loleny-nnu yeto arumwa kansha rueny mwaango mukanraya efo mmba mulaunlekeye-fo; nkyo! Nndumi wakwe eto anruma nnyakee numa yakwe? 33Llya mangyi afo areraa indo, ulya alerumwa kwakwe kaafukya, nawe kaamba, lla-te, makasha yaandi ni kwa Nndumi Iruva ooka, nkyokyi mmbereya mmwasi kwa Nndumi Iruva?

Currently Selected:

2 VAMANGYI 6: MAS2

Highlight

Compare

Copy