2 VAMANGYI 13
13
Mangyi Yehoasi wa Israeli
1Yehohasi, mwana wa Yehu. Kwikee mwaaka wa makumi avii na kararu wa Yoashi mwana wa Ahasia, mangyi ya Yuda, Yehohasi mwana wa Yehu llyo apooka ishillya Israei kulya Samaria; kashillya myaaka ikumi na mfungare. 2Katana makasha usangun lwa Nndumi Iruva, kalatya makasha a Yeroboamu mwana wa Nebati, yoo aleengye vana va Israeli vakateere. 3Nndumi Iruva karooywa ni ngoo uwe ya Israeli, kavavika maakony a Hasaeli mangyi ya Shamu, na Ben-hadadi mwana wa Hasaeli mikonu myoose. 4Nawe Yehoahasi kafuuya Nndumi Iruva; Nndumi Iruva kamwaaranya, mashika enlollya mangyi ya Shamu ngata enlyisa vana va Israeli ukiva. 5(Nndumi Iruva kaniinga vana va Israeli mwiikira yeto aleshewoota yefo ushilyiny lwa Vaashami; vana va Israeli vakashekaa kyeny kwawo sha kasha. 6Indi-lyo mmbalelakana na makasha a vana va mmba ya Yeroboamu, alya aleteere vana va Israeli-fo, indi vakaengera ikaa shallya vekai; nayo Ashera ilya ikakaa indo kulya Samaria). 7Mashika Yehoahasi nnyalereeya vandu-fo kuuta vesaama frasi makumi araanu, na mitika ikumi, na fiku ikumi fya vasikari vashendaa na marende, mashika mangyi ya Shamu emmbavavara kavalyamaradeny vakava sha kiluulyi. 8Naasan mirundye myoose ilya Yehoahasi aleidima itana, kwa wiidimi lwakwe, na ilya ilesaa-fo ndesa mmba kulare ikee mireiye yefo kyitabun kya fyeeri fya Vamangyi va Israeli? 9Yehoahasi kafwa sha vandeye; vakamwaara kulya Samaria. Na Yehoashi mwana wakwe kashilya andu akwe.
Maangyi Yehoashi wa Israeli
10Kwikee mwaka wa makumi araru na mfungare wa ushilyi lwa Yoashi mangyi ya Yuda, llyo Yehoashi mwana wa Yehoahashi epooka ishillya Israeli kulya Samaria, andu a myaaka ikumi na irindaru. 11Keengera itana makasha mbee ya usangu lwa Nndumi Iruva, makasha a Yeroboamu mwana wa Nebati, alya aleteere vana va Israeli; nta nalakunde ilakana nang'u. 12Naasan mirundye myoose ya Yehoashi ilesaau na ilya myoose aleidima itana kyeeri ekapanaa na Amasia mangyi ya Yuda, ndesa mmbo ilakee mireiye yefo kyitabun kya fyeeri fya vamangyi va Israeli? 13Yehoashi kafwa sha vandeye; nawe Yeroboamu kakaya kiri kyakwe kya ushilyi, nawe Yehoashi karikwa kulya Samaria andu amwi na vamangyi va Israeli.
Ufu lwa Elisha
14Naasan Elisha entirwa nndwari yakwe ilya ileshemmbwaa; nawe Yehoashi mangyi ya Israeli keenda indensaiya, kayiiya mbee yakwe kaamba; Nde yakwa! Nde yakwa! Ikari lya Israeli na vesaama frasi vakwe! 15Elisha kammbia, “Ipoo ura mife;” nalyo keepo ura na mife. 16Naasa kavia mangyi ya Israeli, “Tira ura lwafo wokon;” nawe kavika woko lwakwe uwe yakwe Elisha kavika maako akwe uwe ya maako a mangyi. 17Kaamba, “Rua itirisha elyo lya taari lya ngama;” kanyirua. Naasa kaamba, “Ura lwa Nndumi Iruva lwammbinga ee, ura lutiri finya lwammbinga Shamu, mashika mmbo Vaashami vakapwaa efo Afeki kutani vamamikaa.” 18Naasa kaamba, “Ipoo mife.” Nawe keepo. Naasa kavia mangyi ya Israeli, “Kaba nayo uruka,” kakaba uruka kararu, kamalallya. 19Nawe nndu wa Iruva karooyo ni ngoo kimaruma kyakwe, kaamba, Mmbo kyeekwaani kukabe ka matorito a raanu ao arindaru; llyo kwekapaany Shamu kararu yeni. 20Elisha kafwa nawo vakanrika. Naasa ironda lya vasikari va Vamoabi vakaanga kulya urukeny lulya mapokyon a wo mwaaka. 21Ate, nndu eefo arikwaa, pari-pari, valollya vasikari; vakallekeiya yefo ki funy kya Elisha; nelyo nnying'a ulya wikipaana mafua a Elisha karuka kasalala na marende akwe.
Fira ya Israeli na Vaaramu
22Nawe Hasaeli mangyi ya Shamu kasisya Vaisraeli mikonu myoose fya Yehoahashi. 23Indi Nndumi Iruva kavalillya, na itingwa, kyawo kimaruma kya kyaasa kyakwe na Abrahamu, na Isaka, na Yakobo, nta nnyalekunda ivamamita nta ivantya kwaasha na usangu lwakwe-fo. 24Hasaeli mangyi ya Shamu ekifwa, mwana wakwe Ben-hadadi kashillya uruka andu akwe. 25Nawe Yehoashi; mwana wa Yehoahashi kasoka Ben-hadadi miri ilya myoose Hasaeli ensoka Yehoahasi we ndeye kyeeri kya fira. Ka matorito araru Yehoashi kammbinga na itauwa miri ya Israeli.
Currently Selected:
2 VAMANGYI 13: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
