2 MBONY TA FYEERI 29
29
Mangyi Esekia wa Yuda
(2 Vam 18:1-3)
1Esekia mmbo epooka ishillya Yuda etiri myaaka makumi avii na iraanu, kashillya kulya Yerusalemu ando a myaaka makumi avii na kyeenda. Maaye ni Abiya mfu wa Sekaria. 2Mmbo etana mesha mbee ya Nndumi Iruva, mitannyi yakwe ikavaka ilya ya mangyi Davidi saawoye wakwe.
Mmba ya Nndumi Iruva yavikwa Sheele
3Kwikee mwiiri wa mbee na mwaaka wa mbee ukya Esekia ammbe mangyi, mmbo erua lyingyi myaango ilya ya mmba ya Iruva kaisongosya. 4Kandevika-fo vakohani na Valevi, kulya kirieny kyeekwaanannya taari ya ngama 5karera nawo. Kavavia, “Yeni Valevi arannyiny mmbo mwukwiilyisaa mwiilyise na mmba yei ya Nndumi Iruva, Iruva wa vasaawoye vany. Muute-fo findo fitefusu fyoose yoo ando kweele. 6Vasaawoye veru mmbo vemina Nndumi Iruva, Iruva weeru, vakantannya findo fikasha filavaa yaamba vakankapa mungo na yoo ando kwakwe kwekaa. 7Vakaraya myaango ya mmba ya Iruva, vakarumya taa, nta valakunde iniingya firaso fya ikora fya mmba ya Iruva, Iruva wa Israeli. 8Nkyo kimaruma Nndumi Iruva kasamya Yuda na Yerusalemu, neekyo alevatannya kikailannya na yeerese wo nndu, nakyo kikamanyika ni vandu woose. 9Vande veru vakawaawa ni misa, vaka na vana veru vakakamarwa mifungwa. 10Ulaalu mmbo shanrummbwa shila ivika kyaasa na Nndumi Iruva, Iruva wa Israeli, naambo nalasheesua-se lyingyi kimaruma kyeeru. 11Mmbo shamuvavasa vana vakwa, mulasheteere lyingyi. Mashika Nndumi Iruva mmbwe alemusauwa yeni, muve veekora ubani na itetera vandu kya imwiindya-we.” 12Yeva niwo Valevi va mashora: va ufyari lwa Kohati vekee ni: Mahati mwana wa Amasai na Yoeli mwana wa Asariya va ufyari lwa Merari: Kishi mwana wa Abdi na Asariya mwana wa Yehaleli Vaufyari lwa Gershoni: Yoa mwana wa Sima na Edeni mwana wa Yoa. 13Va ufyari lwa Elisafani: Shimori mwana wa Yeneli, 14va ufyari lwa Yedutuni: Shemaya na Usieli 15Yeva mmbo vesangyirya Valevi vengyi vakakwiilyisa. Naasa vakaangany yefo mmba ya Nndumi Iruva, shaasa vevavasyo ni mangyi, naambo vasangye na yiilyisa kyeiindya shaasa Nndumi Iruva alevavia. 16Vakohani vakaanga yefo mmba ya Iruva, vakiilyisa na isomuta poo findo fitefusu fyoose fyekee yefo mmba. Kupookya yoondo Valevi vakakurika findo yefyo vakandefyeera kwaasha kulya imungony lya Kidroni. 17Mashora a yiilyisa mmba ya Iruva akapooka nkonu wa mbee mwiiri wa mbee, kwifikaa nkonu wa nyanya, vakakooya vamma irunda mashora moose sanda na mwaango wa kiria kyeyaanga mmba ya Iruva. Vakeengera irunda mikonu ingyi nyanya, kwifikaa nkonu wa ikumi na karindaru wa mwiiri, mashora ideesya mmba ya mwiindye akasia.
Mmba ya Iruva yavikwa wakfu wiiya
18Naasa Valevi vakaeenda ivia mangyi Esekia, “Lwamma isangya na yiilyisa mmba ya Iruva, kitara ando kweniingya firaso fyeekora na mesa ya mikate myeele na findo fya vayo fyoose. 19Na findo fyingyi fyoose filya mangyi Ahasi emfyeera kwaasha, kyeeri kya ushilyi lwakwe llya alemina Iruva, lwamfiilyisa lukafivika yoo mbee ya kitara kyeerasya kya Nndumi Iruva.” 20Llya yeni mangyi Esekia kaumbya vandu vasongoru va muri, woose vakeenda fika mmba ya Iruva. 21Naambo vedimi ikuuta ulyamari lwa yefo mmba ya kimangyi, na lwa vandu va Yuda na yiilyisa mmba ya Iruva, mmbo veniingya ngoleta mfungare, suva mfungare, ngurana na suva mfungare na ndafu mfungare. Naasa mangyi kavia, Vakohani valya va mmba ya Aron, vaniingye findo filya yoo kitareny kyeerasya. 22Naasa nkohani kashisha mbele ngoleta, kalatya suva, kafurumya na ngurana ta suva, samu ilya yavayo kaifwallya kulya kitareny kyeerasya. 23Mafurumyony vakarwaaya mangyi ndafu tilya na vandu valya vengyi veiiyo nawe, vakateekyerya maako. 24Naasa vakohani vakandeshisha ndafu tilya, na samu ya vayo ikandeletywa uwe ya kitara kyerasya kyeyuuta ulyamari lwa vandu woose, shaasa mangyi aamba kiniingywa kiraso kyekora na kiraso kya ulyamari kya Israeli. 25Mangyi Esekia kalatya uramba llwa Nndumi Iruva enningya mangyi Davidi shaasa emma iniingya nkisuku Gadina Natani vekee ni vakisuku va mangyi. Nawe kandevika-fo Valevi vetiri matuwasi, finanda amwi na fivale kulya mmba ya Iruva. 26Vakasalala-u vetiri findo fyeeimba sha filya fya mangyi Davidi. Na vakohani nawo veiiyo vetiri mbembe. 27Esekia kaveetika iniingya kiraso kyeekora na muro uwe ya kitara kyeerasya shaasa vepooka iniingya kiraso yekyo vandu woose vakapooka yiimba fiimbo fya irumisha Nndumi Iruva, veembi na valya woose vetiri fia fyeiimba, na valya vetiri mbembe vakaimbya nafyo Iruva. 28Vandu vekee alya woose vakaanga mwindeny veshiimbaa nairumisha Iruva, amwi na veembi na valya woose vetiri mbembe vakeemba kutani firaso fyoose fyamaa ikorwa. 29Naasa mangyi Esekia na vandu vakwe woose vakafiirya-ndi vakainndya Iruva. 30Mangyi amwi na vasongoru va uruka woose kavia Valevi veembe fiimbo fya irumisha Nndumi Iruva, filya fyereiywa ni Davidi na nkisuku Asafu. Naasa vandu woose vakeemba vetiri ifura iniini veefiirye-ndi na yiindya Iruva. 31Esekia kavia vandu, “Kimmba ulaalu mwamma ikwiilyisa, engyeny Nndumi Iruva firaso fyeekora fya imwaana.” Woose vakairikyana nawe, na vengyi maata vakaniingya firaso fyeekora na muro. 32Vakaniingya ngoleta makumi mfungare suva iyana lyimwi, na ngurana ta suva mayana avii kwa nndumi Iruva fikee ni firaso fyeekora na muro; 33vakeende-se ngoleta mayana arindaru, na suva fiku firaru fikee ni kiraso kyelyiwa ni vandu. 34Kimba kulare vetiri vakohani vashiidimaa ishisha findo yefyi fyoose, mmbo vetereva weeki kwa Valevi kutani vainutya ishora yelyo. Mashika kyeeri yekyi, veengyi vemma ikwiilyisa. (Valevi mmbo vekee vandu vatele mmwasi, vakainndya wiilyiso ngota vakohani) 35Kuuta-fo firaso filya fyekora na muro, vakohani mmbo vetiri mashora engyi endekora mafura alya a firaso filelyiwa ni vandu, kweifo na kiraso kya mfinyu ulya uleniingywa amwi na firaso fyeekora. Kweekyo vakandepookya mwiindye lyingyi yefo mmba ya Iruva. 36Mangyi Esekia kava na ifura iniini nnu we na vandu vakwe mashika nndumi Iruva mmbwe alemwiidimisya kunu mashoreny ya kwa kyeeri kifii indo.
Currently Selected:
2 MBONY TA FYEERI 29: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
