2 MBONY TA FYEERI 22
22
Ahasia mangyi ya Yuda
(2 Vam 8:25-29; 9:21-28)
1Vandu va Yerusalemu mmbo veniinga Ahasia umangyi nashillye ando a ndeye Yehoramu, mwana n-du wa woose, mashika vana vaniini mmbo vewaawa ni misa yesha iryani na Vaarabu. Kweekyo, Ahasia mwana wa Yehoramu kaniingwa umangyi nashillye Yuda. 2Ahasia mmbo eniingwa ushilyi etiri myaaka makumi aana na ivii, Enshillyase Yerusalemu ando a mwaaka umwi. Maaye evaangwa Atalia nshuku wa mangyi Omri. 3Kimmba maaye ekee wa miloshye mikasha, nawe mmbo elatya ngaa ilya sheni ya mmba ya Ahabu. 4Mitannyi yakwe ikava mikasha mbee ya Nndumi Iruva ikavaka ilya ya vandu va mmba ya Ahabu, kateere na umangyi lwakwe lukawa. 5Elatya makusaro awo, kashekulunga na mangyi Yehoramu mwana wa Ahabu mangyi ya Israeli, vakandekapana fira na Hasaeli mangyi ya Shamu kulya Romati-gileadi nawe Yoramu kawoywa ni renga. 6Naasa kawuya Yesreeli naambo ashekooya ivavara maresi alya evonisa ekee fireny kulya Rama, vekapana na mangyi Hasaeli wa Shamu. Nawe Ahasia mwana wa Yehoramu, mangyi ya Yuda kandesaiya Yoramu mwana wa Ahabu kulya Yesreeli mashika elwee. 7Indi yeu ukava ni nreiyo wemmbikwa ni Iruva muni wa inrumata deny kyeeri Ahasia ndesaiya Yoramu. Mashika kyeeri alefika kulya mbo alendekulunga na Yoramu vakandekapa Yehu mwana wa Nimshi fira, yeto Nndumi Iruva emunndesya kyerumatadeny mmba ya Ahabu. 8Kyeeri Yehu ekerummbwa mbony ta mmba ya Ahabu na vaniini woose va Yuda na vana va vana vamaaye ya Ahasia na valya vekee mashinga va Ahasia mmbo alevamamita kushu. 9Karuuya kundo Ahasia akai, nawe kandetirywa Samaria kundo ekusurumye. Nawe vakamwenngye Yehu kawaawa. Nnying'a wakwe ukarikwa kimaruma ekee nshuku wa Yehoshafati, nndu eyiindye Nndumi Iruva na nrima wakwe moose.” Nkwekisaa-fo nndu nta umwi yefo mmba ya Ahasia eshiidimaa iva mangyi fo.
Malikia Atalia wa Yuda
(2 Vam 11:1-3)
10Atalia maaye wa Ahasia, ekilollya shelyi mwana wakwe ammbwaawa mmbo ekwipoo karumata vandu woose va mmba ya kimangyi vekee kulya Yuda. 11Indi Ahasia etiri mfwamaye avangwaa Yehosheba, mfu wa mangyi Yehoramu, mmi wakwe ni nkohani avangwaa Yehoyada, etirisha Yoashi mwana wa Ahasia, ekee nnang'ani ya valya vekeewaawa kandensuruma kiriyeny kya ilala we na mwiiri wakwe naambo nalashe iwaawa ni Atalia. 12Nawe kandekaa nawo ando a myaaka irindaru ensurumye mmba ya Nndumi Iruva, kyeeri Atalia ekee nshilyi wa uruka
Currently Selected:
2 MBONY TA FYEERI 22: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
