2 MBONY TA FYEERI 14
14
Mangyi Asa avinga Vaesopa
1Mafurumyony Abiya kafwa, karikwa kulya muriny wa Davidi na mwana wakwe Asa, kashillya ando akwe. Kyeeri kya Asa, mmbo kwekaa-fo urilallyi urukeny ando a myaaka ikumi. 2Mikaaye na mirundye ya Asa, mmbo yeva misha usanguny lwa Nndumi Iruva, Iruva wakwe. 3Mmbo oota-fo mirumwa myoose yeyo yeekwaani na mwiindye ya maruva a wongo yefo urukeny lwakwe. Kawunndwa fisingiti na imamanya mafwanu moose yoo a iruva lya ashera. 4Kavavikya ishingo vandu va Yuda valatye Nndumi Iruva, Iruva wa vasaawoye waawo, na yiinndya mavavaso. 5Kawundwa wo ando kutiri mwiindye wa maruva a wongo na mesa ta ifwallya ubani yefo miriny ya Yuda myoose katifishafisha, na umangyi lwakwe lukava na urilalyi kyeeri yekyo kya ushilyi lwakwe. 6Katana miri itiri finya yefo Yuda kyeeri yekyo kya urilalyi, na ando a myaaka maata nkweitiwa fira-fo mashika Nndumi Iruva enniinga urilalyi. 7Naasa kavia vandu va Yuda, “Luvangise miri luiringitye na isimamba na minara itiri myaango ivikwaa-fo misirya. Uruka ni maakony eru lukai kimaruma elyi lulelatya mavavaso a Nndumi Iruvaweeru, nawe kaluniinga urilalyi taari shoose.” Naasa vakaidimisywa itana indo. 8Mangyi Asa mmbo etiri itorito lya vasikari fiku mayana araru wooka Yuda vatiri ngao na mafumu, na vengyi fiku mayana avii na makumi nyanya wooka Benyaminy vatiri ngao na ura. Woose mmbo vekee vandu vatiri finya na wiidimi nnu. 9Sera mwesopia kandekapa misa urukeny lwa Yuda etiri itorito lya veekapa misa fiku ka fiku, na mitika mayana araru, kavakapa kutani avafita Maresha. 10Asa kakwipoo kandekapana nawe. Taari toose ivii tikakwaala kulya imungony lya Sefatha kufii na Maresha. 11Llyo Asa efuuya nndumi Iruva, Iruva wakwe eshambaa, “Woi Nndumi Iruva, nkwiifo ungyi atiri wiidimi lwa yeekya vafwafwa ao vatiri finya kuuta yewe-fo.” Lweekye woi Nndumi Iruva, Iruva weeru, mashika ni yewe lukuvikye nsia, ni kwa irina lyafo lwasha ishekapana na itorito yelyi lyitiri finya ing'ani indo. Woi Nndumi Iruva, yewe mmbwe Iruva weeru, nkwiifo nndu ashiidimaa ikapana na yewe-fo. 12Nawe Nndumi Iruva kavinga Veesopia na itorito lya Asa na vandu va Yuda. Veesopia vakarisha. 13Asa amwi na itorito lyakwe kavarishya kavafita Gerari, vakafwa Veesopia veengyi nnu, kavakomba kombi kulasaa-fo nta umwi mashika Nndumi iruva emmaivavinga amwi na itorito lyakwe. Vakakurika findo na vandu veengyi mifungwa. 14Vakawunndwawunndwa miri miingyi ilya yeefitani na Gerari, mashika vandu valya vekee yefo miriny yeyo mmbo ventirwa mmbweeresi uniini lwa Nndumi Iruva. Vasikari vakakurika-fo masaa meengyi, mashika yefo miriny yeyo mmbo kweifo masaa meengyi nnu. 15Naakwa ni valya vekeisa findo, nawo vakakapwa vakasokwa moonri meengyi nnu amwi na ng'amula. Mafurumyony vakawuya Yerusalemu.
Currently Selected:
2 MBONY TA FYEERI 14: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
