1 SAMUELI 27

Davidi Akee kwa Vafilisti

1Numa ya yeefyo fyoose, Davidi kaamba, “Sauli asheshiwoo nkonu umwi.” Kisha kyakwa ulaalu niinderishya urukeny lwa Vafilisti, naambo noote-u pa deny yeeshikooya elyi ashiruuyaa kunu Israeli koose nashiture, shikkye iwaawa mmbwe. 2Nalyo Davidi kakupoo na vandu yewo vakwe mayana arindaru, kandefika kwa Akishi mwana wa Maoki ekee mangyi ya Gati. 3Davidi kakaa efo Gati na Akishi, we na vandu vakwe. Nawe Davidi eeriani na vaka valya vakwe vavii, Ahinoamu wa Yezreeli na Abikaili wa Karmeli, ulya ekee nka wa Nabali. 4Nawe Sauli kashefityo mbony kavio Davidi mmbo anrishya kulya Gati, nta we nalakinsore-fo.

5Davidi kavia Akishi, “Kwakooya kwanshiwarya mmbo shakutereva kushiniinge ando kwekaa, muriny umwi wa kunu mareminy, shikae-fo, mashika nkivaa yeny nsero wafo shikae muriny wa kimangyi ando amwi na mangyi-fo.” 6Llyo Akishi enniinga muri uvaangwa Fiklagi. Nkyo kimaruma muri wa fiklagi ukee muri wa vamangyi va Yuda fika inu.

7Nafyo fyeeri Davidi alekaa kulya urukeny lwa Vafilisti fyeefikye mwaaka umwi na miiri yiina. 8Veekee kulya vandu va Davidi vakavesoka indekapa Vageshuri na Vagirisi, na Vaameleki mmbo vekee vandu va uruka elo, uka Telemu fika Shuri na kundefika Misri. 9Nawe Davidi kakapa uruka elo, nalare-fo nta nndu, kava nndumi ao nka. Keepoofo findo fyawo ng'umbe na mburu na mishungu ngamula na masara eeraa, kawuyany kwa Akishi. 10Nawe elyi awuyaa Akishi mmbo avembesaa, “Inu nkwi mwandekapa-se?” Nawe Davidi kammbia, “Nkulya taari ya Negebu Yuda na Negebu ya Vayerameeli, ao Negebu ya Vakeni.” 11Davidi nnyekiva nndu-fo, vengi mmbo ekeveende kulya Gati kaamba valasheende uriingi, vaambe, “Niindo Davidi aletana, shaasa eeshivye itana llya alekaa kulya urukeny lwa Vafilisti.” 12Nawe Akishi kasennywa n'Davidi, kaamba, “Mmbo ansukya vandu va Israeli deny, nkyo Davidi mmbo asheshirundyaa llung'anu.”

Currently Selected:

1 SAMUELI 27: MAS2

Highlight

Compare

Copy